11 ¹ Spirit bilong God i apim mi i go antap na kisim mi i go long geit i stap long hap sankamap long haus bilong God Yawe, haus i stap olsem long hap sankamap na long dua bilong kam insait long geit, i gat 25 man i stap. Mi lukim Jasania, pikinini man bilong Asur na Pelatia, em pikinini man bilong Benaia, em ol lida bilong ol manmeri i stap namel long ol. ² God i tokim mi olsem, "Pikinini bilong man, em ol dispela man tasol i bin kamapim tok hait long mekim ol pasin i no stret na ol i makim rot long mekim pasin nogut insait long dispela biktaun. ³ Ol i tok olsem, 'Em i no taim bilong wokim ol haus yet, dispela biktaun i stap olsem sospen na mipela i olsem mit.' ⁴ Olsem na mekim tok profet long ol. Pikinini bilong man, yu mas mekim tok profet." ⁵ Orait Spirit bilong God Yawe i kam antap long mi na em i tokim mi long tokaut olsem, God Yawe i tokaut olsem, "Ol manmeri bilong Israel, em wanem dispela tok yu mekim, long wanem mi save long tingting bilong yu. ⁶ Namba bilong ol manmeri yu bin kilim i go antap moa na pulapim olgeta hap long biktaun. ⁷ Olsem na Bikpela God Yawe i tokaut olsem, ol manmeri yu bin kilim na putim bodi bilong ol i stap namel long Jerusalem i olsem mit na dispela biktaun i olsem sospen. Tasol ol bai kisim yu i kam autsait long dispela biktaun. ⁸ Yu bin pret lo bainat, olsem na mi bai kisim bainat i kam putim antap long yu. Dispela em i tok bilong God Yawe. ⁹ Bai mi rausim yu i go autsait long biktaun na givim yu i go long han bilong ol man long narapela ples na mi bai i gat kot wantaim yu. ¹⁰ Yu bai pundaun long bainat bilong mi na bai mi kotim yu insait long graun bilong Israel na yu bai save olsem mi God Yawe. ¹¹ Dispela biktaun bai i no inap stap olsem sospen bilong yu long kuk wantaim na bai yu i no inap stap olsem mit namel long hap. Bai mi kotim yu insait long graun bilong Israel. ¹² Na bai yu save olsem mi God Yawe, Bikpela bilong olgeta tok tru na lo we yu no save bihainim. Tasol yu save bihainim ol lo bilong ol kantri i stap klostu long yu." ¹³ Long taim mi bin mekim tok profet, Pelatia, pikinini man bilong Benaia i bin dai. Olsem na mi pundaun i go daun long pes na mi bikmaus na krai na tok olsem, "Nogat tru, Bikpela God Yawe, ating bai yu bagarapim na pinisim ol liklik hap lain i stap yet long Israel?" ¹⁴ Tok bilong God Yawe i kam long mi na i tok olsem, ¹⁵ "Pikinini bilong man, ol brata bilong yu! Ol brata bilong yu! Ol man long lain bilong yu na olgeta manmeri bilong Israel! Ol manmeri husait i save stap long Jerusalem i tok long ol dispela lain bilong Israel, 'Ol i stap longwe tru long God Yawe! Dispela graun God i bin givim mipela long stap na bosim.' ¹⁶ Olsem na tok, 'God Yawe i tok olsem, maski mi rausim ol i go longwe tru long ol narapela kantri na maski mi rausim ol i go nambaut long olgeta hap bilong graun, tasol mi bin stap olsem ples hait bilong ol long graun ol i bin go na stap long em.' ¹⁷ Olsem na tok, 'God Yawe i tok olsem, bai mi kisim yu namel long ol manmeri i kam bek na putim yu long graun yu bin lusim na go nambaut long en na bai mi givim yu graun bilong Israel.' ¹⁸ Bihain ol bai i go long hap na rausim ol samting i no gutpela long tingting na olgeta nogut samting i stap long bagarapim dispela ples. ¹⁹ Bai mi mekim ol wanbel na givim nupela Spirit long ol. Mi bai rausim strongpela bel i stap olsem ston long bodi bilong ol na givim ol nupela bel, ²⁰ olsem na ol bai bihainim gut ol lo bilong mi. Bai ol i kamap olsem ol manmeri bilong mi na bai mi stap God bilong ol. ²¹ Tasol ol man husait i wokabaut wantaim gutpela pasin i go namel long ol samting nogut i stap long en, bai mi givim gutpela tingting long stiam ol gut. Dispela em i tok bilong God." ²² Ol ensel i apim ol wing bilong ol na ol wil i stap klostu long ol na glori bilong God bilong Israel i sain antap long ol. ²³ Orait glori bilong God Yawe i sain namel long biktaun na sain i go antap long maunten i stap long hap sankamap long biktaun. ²⁴ Spirit bilong God i apim mi na kisim mi i go long Kaldia na i go long ol man bilong narapela ples. Long driman, Spirit bilong God i soim mi long ol samting i kamap long mi bai autim. ²⁵ Orait mi tokaut long ol man bilong narapela ples long olgeta samting God Yawe i bin soim mi.