39 ¹ Wantaim blu na pepol na retpela rop ol i samapim ol gutpela klos bilong lotu insait long ples holi. Ol i wokim klos bilong Aron long ples holi, olsem God i tokim Moses. ² Besalel i wokim klos bai i go baksait na kam long bros wantaim gol na i penim long blu na pepol na retpela rop na em i mekim long rop ol i tanim long en. ³ Ol i paitim gol na katim i go olsem waia na ol i putim i go insait long blu, pepol na retpela rop, dispela em wok bilong ol man i gat save long wokim dispela. ⁴ Ol i wokim liklik mak bilong solda long klos bilong putim i go long baksait na i kam long bros, i pas wantaim tupela kona i stap antap. ⁵ Let ol i wokim gut tru em i wankain olsem klos bilong baksait i kam long bros, ol i wokim long rop ol i tanim gut we em i gat gol, blu, pepol na retpela pen olsem God Yawe i bin tokim Moses. ⁶ Ol i katim ston onix na karamapim wankain olsem gol, ol i raitim na mekim olsem mak na raitim nem bilong 12-pela pikinini man bilong Jekop. ⁷ Besalel i putim ol liklik long solda mak long klos bilong baksait i kam long bros, olsem ol ston bilong tingim God bilong 12pela pikinini man bilong Jekop, olsem God Yawe i tokim Moses. ⁸ Em i mekim bros kapa, em i wok bilong ol man i gat save tasol long wokim. Ol i stretim gut olsem klos bilong baksait i kam long bros. Em i mekim long gol, blu, pepol na retpela rop, wantaim rop ol i tanim long en. ⁹ Olgeta hap kona bilong em i wankain. Ol i brukim bros kapa i go tupela hap. Longpela sait bilong en i olsem 23 sentimita na sotpela sait i wankain. ¹⁰ Ol i putim ol long 4pela lain bilong ston i dia tumas. Long namba wan lain em ol i putim rubi, topaz na ganet. ¹¹ Long namba 2 lain ol i putim emeral, sapaia na daimon. ¹² Long namba 3 lain ol i putim jasint na agate na ametist. ¹³ Long namba 4 lain ol i putim beril na onix na jaspa. Ol i putim ol gol i raunim ol dispela ston. ¹⁴ Ol i bin lainim ol dispela ston long makim 12-pela pikinini man bilong Jekop, bihainim nem bilong wanwan. Ol i wankain olsem mak ol i bin mekim long gol ring, dispela nem i makim wan wan tumbuna lain bilong ol Israel. ¹⁵ Long bros kapa ol i mekim rop olsem sein wantaim gol, ol i mekim gut tru wantaim gol. ¹⁶ Ol i wokim tupela lain bilong gol na tupela ring bilong gol, na ol i putim tupela ring long tupela kona bilong bros kapa. ¹⁷ Ol i putim tupela sein ol i mekim long gol i go insait long tupela ring long kona bilong bros kapa. ¹⁸ Ol i putim narapela tupela arere bilong sein i go long tupela kona bilong bros kapa. Ol i putim wantaim liklik long solda mak bilong klos bilong baksait i kam long bros. ¹⁹ Ol i mekim tupela ring bilong gol na i putim long kona bilong bros kapa, long arere klostu long pinis mak. ²⁰ Ol i mekim tupela moa gol ring na putim wantaim long aninit bilong tupela solda long klos bilong baksait i kam long bros, pasim na samapim let i kam antap klostu long bros kapa. ²¹ Ol i taitim hap bilong bros kapa wantaim ring bilong klos bilong baksait i kam long bros wantaim blupela rop, we ol i pasim wantaim let antap liklik long bros kapa we ol i wokim gut let long en. Ol i wokim dispela long bros kapa i noken lus long klos bilong baksait i kam long bros. Ol i mekim dispela olsem God i tokim Moses. ²² Besalel i mekim longpela klos bilong bros kapa na pinisim wantaim pepolpela laplap, dispela em i wok bilong ol lain husait i save long samap. ²³ Em i gat rot bilong het i go insait long namel. Dispela rot ol i mekim na samapim gut long i noken bruk. ²⁴ Long aninit bilong em ol i mekim piksa bilong pomegrenet long blu, pepol na retpela rop na ol i mekim gut tru. ²⁵ Ol i wokim ol belo wantaim gol na ol i putim arere long laplap, na ol i putim belo i stap namel long pomegrenet, ²⁶ belo na pomegrenet, belo na pomegrenet long arere long klos bilong Aron bai i werim long wokim wok pris. Ol i wokim ol dispela samting olsem God i tokim Moses long en. ²⁷ Ol i wokim ol bikpela klos bilong Aron na ol pikinini man bilong en. ²⁸ Ol i wokim het kapa wantaim laplap i gat gutpela bilas na liklik trausis wantaim, ²⁹ ol i wokim mak arere long klos wantaim blu, pepol na retpela rop, dispela em i wok bilong man husait i save mekim dispela wok. Dispela olgeta samting em God i tokim Moses. ³⁰ Ol i wokim ol plet wantaim gol na ol i raitim ol nem long en, wankain olsem ol mak ol i mekim long ring olsem, God em Holi. ³¹ Ol i putim hat kapa wantaim blupela rop i go antap long hat kapa. Em ol dispela samting God i tokim Moses. ³² Na wok bilong hausel na haus bilong bung i pinis. Ol manmeri bilong Israel i mekim olgeta samting. Ol i mekim olgeta samting we God i tokim Moses long mekim. ³³ Ol i kisim haus sel i go long Moses wantaim olgeta samting bilong en, huk na ain na stronpela pos na ol pos na ol samting i save holim strong ol pos, ³⁴ ol i penim retpela pen long skin bilong man sipsip na ol i penim braunpela pen long skin bilong kau bilong solwara, na ol laplap bilong haitim ³⁵ bokis kontrak, wantaim ol bikpela pos na maus bilong bokis kontrak. ³⁶ Ol i kisim tebol na olgeta samting na bret bilong soim God, ³⁷ pos bilong holim lam ol i mekim long gol na putim lam long lain, wantaim ol samting bilong en na wel bilong lam. ³⁸ Alta ol i bin mekim long gol, tambuim wel na gutpela smel pauda, dua bilong hausel, ³⁹ alta bilong brons wantaim lek bilong brons na pos bilong karim na ol samting bilong kukim kaikai na bikpela sospen wantaim lek bilong em. ⁴⁰ Ol i kisim ol samting bilong hangamapim na ol pos na laplap samting na i kam long pasim ples bilong haus sel, ol rop bilong taitim, rop bilong holim hausel na olgeta samting bilong wokim lotu long haus sel. ⁴¹ Ol i kisim ol laplap we ol i mekim wantaim gutpela rop na bikpela laplap i kam long pasim insait long hausel. Ol i wokim ol klos bilong Aron na ol pikinini man bilong em we bai ol i yusim olsem klos bilong pris. ⁴² Ol manmeri bilong Israel i mekim olsem God i tokim Moses. ⁴³ Moses i luksave olsem ol i wokim olgeta wok olsem God i bin tokim em. Olsem God i tokim em, wankain tasol ol i mekim. Bihain Moses i blesim ol.