12 ¹ Taim yu yangpela yet yu mas tingim man i wokim yu nogut taim yu kamap lapun na yu painim hevi bai yu tok olsem mi nogat amamas. ² yu mekim olsem taim lait bilong san na mun na sta i no kamap tudak yet na bai bilakpela klaut i kamap bihain long ren. ³ Long dispela taim ol wasman bilong haus bilong king bai lek bilong ol i guria na ol strongpela man baksait bilong ol bai i krungut na ol meri bai i no inap rausim skin bilong rais moa long wanem ol liklik lain tasol i stap na ol lain i lukluk i go ausait long windua bai i no inap lukluk gut moa. ⁴ Long dispela taim ol dua long rot bai i pas na olgeta nois bilong rausim skin bilong rais bai pinis na ol man bai kirap nogut long harim krai bilong pisin na singsing bilong ol meri bai i pinis. ⁵ Long dispela taim ol man bai pret long stap long ol ples i antap tumas na ol bai pret long wokabaut long rot na taim gras bilong ol i kamap waitpela na taim ol i no inap moa long wokabaut gut. Ol bai i no inap amamas moa. Na ol man bai i go long ples bilong i stap oltaim oltaim na ol man bai krai na singsing sori. ⁶ Tingim man i bin wokim yu taim silva sen na gol dis i no bruk yet na wins bilong pulim wara long hul wara i no bruk yet. ⁷ taim das bilong graun i go bek long graun na spirit i go bek long God. ⁸ Saveman i tok olgeta samting bai i kamap samting nating na i nogat as bilong em. ⁹ Dispela saveman i gat gutpela save na em i skulim ol manmeri long kisim save. Em i kisim skul na skelim as bilong gutpela sindaun. ¹⁰ Dispela saveman i lukluk moa long raitim stret olgeta tok i tru. ¹¹ Ol tok bilong saveman i olsem ol tok bilong kirapim bel bilong ol man. Saveman i bungim ol tok bilong em long buk i olsem nil i go insait long diwai, em tok skul bilong wanpela wasman bilong sipsip. ¹² Pikinini man bilong mi, mi laik tokim yu long wanpela samting, ol man i raitim planti buk i nogat pinis bilong en na planti skul bai mekim skin bilong yu i les. ¹³ Long pinisim olgeta tok yu i bin harim pinis, em i olsem, yu mas pret long God na bihainim olgeta lo bilong em. ¹⁴ God bai i kotim yumi long olgeta pasin yumi bin mekim, em ol pasin hait, ol gutpela pasin na ol pasin nogut.