6 ¹ Sori long ol lain i save stap isi insait long Sion na ol lain i stap gut long maunten kantri bilong Samaria na ol man i gat nem ol i gutpela moa bilong ol kantri we ol lain Israel i save kam long kisim helpim. ² Na ol hetman bilong yupela i tok, "Go long Kalne na lukim na long dispela hap go long biktaun Hamat na bihain go daun long Gat long Filistia. Ating dispela ples i winim tupela kingdom bilong yu? Ating graun mak bilong ol i winim graun mak bilong yu?" ³ Sori long ol lain i ting olsem taim bilong bagarap bai i no inap kam tasol ol i save mekim ol yet i kam klostu long ples bilong bagarap. ⁴ Ol i sindaun long waitpela bet i gutpela tru na sindaun gut tru long ol sia bilong ol. Ol i save kaikai ol pikinini sipsip long banis sipsip na kaikai ol pikinini bulmakau long banis bilong ol. ⁵ Ol i save singim ol song olsem ol lonlong bihainim musik bilong gita. Ol i save mekim samting bilong mekim musik olsem Devit i save mekim. ⁶ Ol drin wain long ol dis na rapim ol yet wantaim gutpela na nambawan oil, tasol ol i no sori long bagarap bilong Josep. ⁷ Olsem na bai ol i go long kalabus olsem ol namba wan kalabus manmeri na pasin bilong bikpela kaikai na ol manmeri husait i save stap gut bai pinis olgeta. ⁸ Mi, Bikpela, God Yawe, mi mekim strongpela promis olsem. God Yawe i tok aut, God bilong bikpela lain ami, mi daunim biknem bilong Jakop, mi no laik long ples hait bilong em. Olsem na bai mi givim biktaun wantaim olgeta samting i stap long en i go long han bilong birua. ⁹ Sapos i gat 10-pela man tasol i stap long wanpela haus, olgeta bai i dai. ¹⁰ Na long taim wanpela wanblut bilong em i kam long kisim bodi bilong em i go. Na man i kukim bodi long paia na i karim kam aut long haus na sapos em i askim, "I gat ol man i stap long haus o nogat?" Sapos em i tok, "Nogat." Orait bai em i tok, "Pasim maus na noken kolim nem bilong God Yawe." ¹¹ Na lukim God Yawe bai givim strongpela tok na bikpela haus bai bruk bruk i go liklik na liklik haus i go liklik tru. ¹² Na yupela i ting ol hos i save ron long ston maunten? Na yupela i ting man i save digim graun wantaim bulmakau long maunten? Olsem na yupela i tanim gutpela pasin long pasin bilong bagarapim ol man na kaikai bilong gutpela pasin long samting i pait. ¹³ Na yupela ol lain i amamas long Lodebar, na i tok, "Ating mipela i no kisim Karnaim long strong bilong yumi yet?" ¹⁴ "Tasol lukim, Mi God Bikpela bai mi salim wanpela kantri i kam pait long ol Israel, dispela em God Yawe Bikpela i tok em i God bilong bikpela lain ami. Ol bai pait long yupela long Lebo Hamat i go inap long wara bilong Araba."