5 ¹ Taim Solomon na ol wokman bilong em i pinisim olgeta wok long haus bilong God Yawe, Solomon i kisim ol silva, gol na olgeta samting papa bilong em Devit i bin makim pinis na i putim insait long bakstua long haus bilong God. ² Orait Solomon i bungim ol lida bilong Israel na olgeta hetman bilong bikpela lain na hetman bilong wanwan famili bilong Israel long kisim bokis kontrak bilong God Yawe long biktaun bilong Devit long Saion i kam insait long Jerusalem. ³ Olgeta man bilong Israel i kam long king na i bung long namba 7 mun, em Bikpela dei bilong i stap long haus win. ⁴ Olgeta lida bilong Israel i kam na ol Livai i karim bokis kontrak. ⁵ Ol pris long lain bilong Livai i kisim bokis kontrak na haus sel bilong Bikpela wantaim olgeta samting i stap long haus sel. ⁶ King Solomon wantaim olgeta Israel i bung klostu long bokis kontrak na i kilim ol sipsip na ol bulmakau man bilong mekim ofa, namba bilong ol man i no inap kaunim. ⁷ Ol pris i karim bokis kontrak bilong God Yawe i go insait long rum tambu tru na putim long ples ol i redim bilong en aninit long wing bilong tupela ensel. ⁸ Wing bilong tupela ensel i op i stap na i karamapim bokis kontrak wantaim tupela stik bilong karim bokis. ⁹ Tupela stik bilong karim bokis kontrak i longpela tumas na man i sanap long rum tambu em inap long lukim na sapos man i sanap ausait em i no inap lukim arere bilong en. Tupela stik istap olsem yet. ¹⁰ Insait long bokis kontrak tupela ston igat tok bilong lo tasol i stap, em Moses i bin putim long taim ol Israel i bin lusim Isip na i kam long Horeb na God Yawe i mekim kontrak wantaim ol. ¹¹ Olgeta pris i bung wantaim na i bihainim pasin bilong kamap klin long ai bilong God Yawe i lusim rum tambu na i kam ausait. ¹² Olgeta man bilong singim song long lain bilong Livai wantaim Asap, Heman, Jedutun na ol pikinini bilong ol na ol brata bilong ol i pasim waitpela laplap na i paitim plet bras, gita na ol samting bilong mekim musik wantaim 120 pris i winim trampet i sanap klostu long alta long hap sankamap. ¹³ Ol man bilong winim trampet na ol man bilong singim song i bung wantaim na mekim musik. Ol i singim song na mekim musik wantaim na i kamap olsem wanpela nek stret na ol i litimapim God Yawe. Ol i singim song olsem, ''Em i gutpela tru long yumi, oltaim oltaim em i save laikim yumi,'' Ol i singim song olsem na wantu tasol haus bilong God Yawe i pulap long smok. ¹⁴ Ol pris i no inap moa long sanap na mekim wok bilong ol, Long wanem smok i pulap na lait bilong God Yawe i lait moa insait long haus.