25 ¹ Taim Samuel i dai, olgeta Israel i bung na krai long em na ol i planim em insait long haus bilong em long Rama. Orait Devit i go daun long ples nating bilong Paran. ² Igat wanpela man long Maon, em i gat planti samting i stap long Kamel. Dispela man em i wanpela mani man tru. Em i gat 3 tausen sipsip na 1 tausen meme. Em i wok long katim gras bilong sipsip bilong em i stap long Kamel ³ Nem bilong dispela man em Nabal na nem bilong meri bilong en em Abigel. Dispela meri em i naispela tru na i gat gutpela tingting na save. Tasol man bilong em i save kros na pasin bilong em i no gutpela. Dispela man i bilong lain tumbuna bilong Kaleb. ⁴ Devit i stap long ples nating na i harim olsem Nabal i wok long katim gras bilong sipsip. ⁵ Olsem na Devit i salim tenpela yangpela man. Devit i tokim ol olsem, ''Yupela go long Kamel na i go long Nabal na givim gut dei bilong mi long em. ⁶ Bai yupela i tokim em olsem, 'Yu ken i stap bel isi na i stap gut tru wantaim famili bilong yu na olgeta samting yu gat. ⁷ Devit i harim olsem yu gat ol wokman bilong katim gras bilong sipsip. Ol wasman bilong sipsip bilong yu i save stap wantaim mipela tasol mipela i no save bagarapim ol na i nogat wanpela samting i lus taim ol i stap long Kamel. ⁸ Yu askim ol yangpela man bilong yu na bai ol i tokim yu. Yu mekim bikpela kaikai na mipela i kam, yu marimari long mipela na givim wanem ol samting yu gat long pikinini man bilong yu Devit.'' ⁹ Taim ol yangpela man bilong Devit i kam kamap ol i mekim ol tok bilong Devit i go long Nabal na ol i wet istap. ¹⁰ Nabal i bekim tok bilong ol wokman bilong Devit olsem, Devit em i wanem man na husait i pikinini bilong Jesi? Nau long dispela taim ol planti wokman i save ranawe long ol bosman bilong ol. ¹¹ Yupela i kam long we? Mi no inap kisim bret bilong mi na wara na mit mi kilim long ol abus na givim long ol man mi no save.'' ¹² Olsem na ol yangpela man bilong Devit i tanim i kam bek na tokim em long olgeta tok bilong en. ¹³ Devit i tokim ol lain bilong em, ''Pasim bainat bilong yupela.'' Olsem na olgeta man i pasim bainat bilong ol. Devit tu i pasim bainat bilong em. Olsem 400 man i bihainim Devit na 200 man i stap bek na lukautim ol samting. ¹⁴ Tasol wanpela yangpela man i go tokim Abigel meri bilong Nabal, em i tok, ''Devit i salim ol man long ples nating i kam long bosman bilong yumi na em i mekim nogut long ol.'' ¹⁵ Tasol dispela ol man i save mekim gut long mipela. Taim mipela i stap wantaim ol, i nogat wanpela samting i lus na mipela i no kisim wanpela bagarap. ¹⁶ Long dispela taim mipela i save stap wantaim ol na lukautim ol sipsip, ol i stap olsem banis long mipela long dei na long nait. ¹⁷ Olsem na yu harim dispela na yu tingim wanem samting bai yu mekim, samting nogut tru bai kamap long bosman bilong yumi na olgeta lain bilong em. Em i no wanpela gutpela man bilong harim tok bilong wanpela man. ¹⁸ Orait Abigel i hariap i go na kisim 200 bret, tupela botol wain, faivpela sipsip ol i kukim pinis, 15 kilogram bilong wit ol i draim, 100 mekpas bilong drai wain na 20 kilogram wit ol i kukim pinis long paia na putim ol antap long ol donki. ¹⁹ Em i tokim ol yangpela man bilong em, ''Yupela i go pas long mi na bai mi bihainim yupela.'' Tasol em i no toksave long man bilong em Nabal. ²⁰ Em i sindaun long donki na i raunim kil bilong maunten na i kam daun, Devit i kam daun wantaim ol lain bilong em na em i bungim ol. ²¹ Nau Devit i tok olsem, ''Bilong wanem na mi lukautim ol samting bilong dispela man long ples nating na i nogat wanpela samting bilong em i lus na nau em i bekim gutpela pasin wantaim pasin nogut. ²² God i ken kilim mi sapos long moning mi i no kilim olgeta lain bilong em na i no lusim wanpela man istap laip.'' ²³ Taim Abigel i lukim Devit, em i hariap na i go daun long donki bilong em na i brukim skru long pes bilong Devit na i putim pes bilong em i go daun long graun. ²⁴ Abigel i pundaun long lek bilong em na i tok, ''Bikpela, mi tasol i asua. Inap yu larim wokmeri bilong yu i toktok long yu. ²⁵ Bikman bilong mi, yu noken tingim pasin nogut bilong dispela man, em i olsem nem bilong em yet Nabal, karangki pasin i stap wantaim em. Tasol Bikman, mi wokmeri bilong yu i no lukim ol dispela yangpela man yu bim salim i kam ²⁶ Bikman bilong mi, olsem God Yawe i stap laip na yu i stap laip, God Yawe i pasim han bilong yu long kilim man na bekim rong, olsem na ol birua bilong yu na ol lain i laik mekim nogut long yu i ken kamap olsem Nabal. ²⁷ Olsem na bikman, yu ken givim ol yangpela man bilong yu dispela ol presen wokmeri bilong yu i kisim i kam. ²⁸ Lusim rong bilong wokmeri bilong yu, God Yawe bai mekim lain bilong bikman bilong mi i kamap bikpela, long wanem, God Yawe i save salim bikman bilong mi long pait long ol birua na taim yu stap bai yu i no inap mekim ol pasin nogut. ²⁹ Sapos sampela man i laik kam na kilim yu, bai God Yawe; em God bilong yu i lukautim laip bilong bikman bilong mi, em bai rausim ol birua bilong yu olsem ston ol i putim long katapel na sutim i go. ³⁰ God Yawe bai mekim olgeta samtiing long Bikman bilong mi olsem em i bin promis na em bai mekim yu i kamap king bilong Israel.. ³¹ Long taim God Yawe i mekim gut long yu na yu kamap king, orait yu mas tingim mi. Nogut yu kilim man na yu gat hevi long wanpela man na dispela i stap olsem wanpela hevi long yu. ³² Devit i tokim Abigel olsem, Mi litimapim nem bilong God Yawe, em i God bilong Israel, nau em i salim yu i kam na bungim mi. ³³ Mi amamas long gutpela tingting bilong yu na yu ken amamas. Long wanem, nau yu pasim mi long bekim rong na kilim man long han bilong mi yet. ³⁴ Mi tok tru, long nem bilong God Yawe, em God bilong Israel istap laip i pasim mi long mekim nogut long yu, sapos yu i no bin kam kwiktaim na bungim mi, orait long moningtaim bai i nogat wanpela samting bilong Nabal olsem ol liklik pikinini man i stap yet.'' ³⁵ Na Devit i kisim olgeta samting Abigel i kisim i kam na em i tokim em, ''Yu ken i go bek long haus bilong yu wantaim bel isi, mi harim tok bilong yu na bai mi mekim olsem yu tok. ³⁶ Abigel i go bek long Nabal. Na em i wokim bikpela kaikai tru i stap long haus bilong em i wankain olsem ol king i save wokim kaikia na Nabal i spak na amamas i stap olsem na meri bilong em i no tokim em wanpela samting inap long moning taim. ³⁷ Na long moning, taim spak bilong Nabal i pinis, meri bilong em i tokim em long ol dispela samting na lewa bilong em i pas na skin bilong em i dai. ³⁸ Long tenpela dei bihain God Yawe i kilim Nabal i dai. ³⁹ Taim Devit i harim olsem Nabal i dai pinis, em i tok, ''Mi litimapim nem bilong God Yawe, em i bekim pasin nogut Nabal i mekim long mi na em yet i pasim mi long mekim pasin nogut.'' Devit i salim tok long Abigel long maritim em. ⁴⁰ Taim ol wokman bilong Devit i kam long Kamel na kamap long Abigel, ol i tokim em olsem, ''Devit i laik maritim yu olsem na em i salim mipela i kam long kisim yu.'' ⁴¹ Em i kirap na i brukim skru na i daunim het i go daun long graun na i tok, ''Mi wokmeri bilong wasim lek bilong ol wokman bilong bikman bilong mi.'' ⁴² Abigel i hariap na i kirap na kisim donki bilong em na faivpela wokmeri bilong em wantaim i bihainim em i go, em i bihainim ol wokman bilong Devit i go na em i go maritim em. ⁴³ Devit i bin maritim Ahinaom bilong Jesril. Tupela wantaim i stap olsem meri bilong em. ⁴⁴ Sol i bin givim pikinini meri bilong em Mikal, em i meri bilong Devit, igo long Paltiel pikinini bilong Lais bilong Galim.