13 ¹ Sol i gat 30 krismas long taim em i kamap king, taim em i stap olsem king bilong ol Israel inap long 40 krismas, ² em i makim 3000 man bilong ol lain Israel. Na 2000 man i stap wantaim em long ol liklik maunten ples bilong Betel em long Mikmas na 1000 man ol i stap wantaim Jonatan long Gibia long graun bilong ol lain Bensamin. Na ol narapela lain soldia em i salim ol i go bek long ples, long wanwan haus sel bilong ol. ³ Long Keba Jonatan i winim ol ami bilong ol lain Pilistia na ol Pilistia i harim. Olsem na Sol i winim biugel long olgeta hap graun na tok, " Larim ol manmeri bilong lain Hibru i harim." ⁴ Na olgeta manmeri bilong Israel i harim olsem Sol i winim ol lain ami bilong ol Pilistia na tu ol Pilistia i bel nogut long ol Israel. Olsem na ol soldia i bung wantaim na i go long bungim Sol long Gilgal. ⁵ Na ol Pilistia i bung wantaim na kisim 3000 karis na 6000 man bilong pulim karis na ol lain ami bilong ol i olsem wesan bilong nambis long go na pait wantaim ol lain Israel. Na ol i go wokim kem bilong ol long hap san kamap bilong Bet Aven, long Mikmas. ⁶ Na taim ol man bilong Israel i lukim olsem ol i stap long bikpela hevi na ol manmeri i pret na ol i hait long hul i stap long maunten, insait long bus,aninit long ol ston, insait long hul wara na aninit long hul insait long graun. ⁷ Na sampela lain Hibru i brukim wara Joden na i go long graun bilong Gat na Kiriat. Tasol ol manmeri i bihainim Sol ol i pret na guria long wanem Sol i stap yet long Gilgal. ⁸ Na em i wait inap 7- pela dei, olsem Samuel i makim. Tasol Samuel i no kam long Gilgal olsem na ol manmeri i lusim Sol na i go nambaut. ⁹ Orait Sol i tok, " kisim ofa bilong paia i kukim olgeta na ofa bilong bel isi i kam long mi." Orait bihain em i mekim ofa long dispela ofa bilong paia i kukim olgeta. ¹⁰ Taim Sol i mekim ofa pinis long dispela ofa bilong paia i kukim olgeta, Samuel i kam kamap. Na Sol i go long bungim em na givim gudei long em. ¹¹ Na Samuel i tok, " Yu bin mekim wanem?" na Sol i bekim tok olsem, " Taim mi lukim olsem yu no kam long taim yu makim na ol manmeri i lusim mi na i go nambaut na ol Pilistia i bung long Mikmas, ¹² na mi tok, " Nau bai ol Pilistia i kam daun na pait long mipela long Kilgal, na mi no painim laik bilong God Yawe. Olsem na mi hariapim mi yet long mekim ofa bilong paia i kukim olgeta." ¹³ Orait na Samuel i tokim Sol olsem, "Yu mekim pasin olsem man i nogat gutpela save na yu sakim tok bilong God Yawe, God bilong yu i givim yu. Long dispela God Yawe inap long mekim yu i bosim ol Israel gut oltaim. ¹⁴ Tasol nau wok bilong yu olsem lida bai i no inap go moa. Long wanem yu sakim tok bilong God Yawe na em i makim wanpela man long laik bilong em long kisim ples bilong yu long kamap pikinini bilong king na lukautim ol manmeri bilong em. Long wanem yu no bihainim tok bilong em." ¹⁵ Orait na Samuel i kirap na lusim Gilgal na i go antap long Gibea long graun bilong ol lain Bensamin. Na Sol i kauntim ol manmeri na lukim hamaspela man i stap wantaim, em olsem 600 man tasol . ¹⁶ Orait ol manmeri i stap wantaim Sol na pikinini man bilong en Jonatan long graun bilong ol lain Bensamin long Geba. Tasol ol Pilistia i wokim kem bilong ol long Mikmas. ¹⁷ Na ol man i save ran long hos i kam long tripela grup long kem bilong ol lain Pilistia. Wanpela grup i tanim na go olsem long Ofra long graun bilong ol lain Sual. ¹⁸ Na narapela grup i tanim i go long Bet Horon na ol narapela grup i tanim i go olsem long graun mak i lukluk i go olsem long Ples daun bilong Seboim i go long ples nating. ¹⁹ Long wanem ol Pilistia i tok, " Yupela bai i no inap painim wanpela man i save kukim ain long olgeta hap bilong Israel na nogut ol lain Hibru bai mekim ol bainat na spia bilong ol yet." ²⁰ Tasol olgeta ol ami bilong ol lain Israel i save go daun long Pilistia na sapim ol bainat na ol spia na ol tamiok bilong ol. ²¹ Na ol i save baim sampela mani long sapim na stretim ol poin bilong ol spia, bainat na sapim ol tamiok bilong ol. ²² Olsem na long taim bilong pait ol ami bilong Sol na Jonatan i nogat bainat na spia long han bilong ol. Tasol Sol na pikinini man bilong em Jonatan tupela tasol i gat ol dispela samting. ²³ Na ol lain ami bilong Pilistia i go sanap raunim Mikmas.