17 ¹ Elaija em man long Tisbe bilong taun Gileat i tokim Ahap, "Long nem bilong God Yawe bilong Israel i stap oltaim, long em mi sanap, em bai nogat wara long gras na nogat ren long planti yia inap mi tok." ² Tok bilong God Yawe i kam long Elaija na i tok, ³ "Yu lusim long hia na go long hap san kamap, yu go hait long Kerit i gat liklik wara i ron long hap san kamap bilong Jodan. ⁴ Em bai kamap olsem, bai yu dring long dispela liklik wara. Mi givim tok long ol kotkot long givim yu kaikai long hap." ⁵ Orait Elaija i go na mekim olsem tok bilong God Yawe i tok. Em i go stap long hap liklik wara i save ron long Kerit, long hap san kamap bilong Jodan. ⁶ Ol kotkot i save kisim bret na mit olgeta moning na apinun i kam givim em na em i save kaikai, em i save dring long liklik wara i save ron long en. ⁷ Tasol bihain liklik dispela liklik wara i drai na nogat ren long graun. ⁸ Tok bilong God Yawe i kam long em na i tok, ⁹ "Kirap na i go long Sarefat, em long ples bilong ol Sidom na yu stap long hap. Lukim, Mi putim tok long wanpela meri, man bilong em i dai pinis long lukautim yu long hap." ¹⁰ Taim em i kirap na i go long Sarafat, em i kamap long bikpela dua bilong biktaun. I gat wanpela meri man bilong en i dai pinis i bungim ol stik i stap. Olsem na em i singautim dispela meri na i tok, "Plis givim me liklik wara long kap, bai mi ken dring." ¹¹ Taim em i go long kisim wara i kam givim em, em i tok, "Plis kisim liklik bret tu na kam givim mi." ¹² Na em i bekim tok, "Olsem God Yawe, em God bilong yu i stap laip oltaim tru olsem, mi no gat bret, tasol mi gat wanpela han pulap plaua long dis na liklik oil long kontena. Lukim, mi kam bungim tupela stik bilong paia long mi ken kukim bilong mi wantaim pikinini bilong mi, bai mitupela ken kaikai na dai." ¹³ Elaija i tokim em, "Yu no ken pret. Yu go na mekim olsem yu tok, tasol yu kukim liklik bret i kam givim mi pastaim. Orait na bihain yu kukim bilong yu wantaim pikinini bilong yu. ¹⁴ Long wanem God Yawe, em God bilong ol Israel i tok, "Bai plaua bilong yu long sospen i no inap pinis na tu oil bilong yu long kontena em bai ron yet, inap long taim God Yawe i salim ren long graun." ¹⁵ Orait em i mekim olsem Elaija i tokim em. Em yet wantaim Elaija na husait i stap long haus i kaikai inap long planti ¹⁶ dei.Tasol dis i gat plaua i stap yet na i no pinis, tu kontena i pulap yet long oil, wankain olsem tok bilong God Yawe i tok long Elaija. ¹⁷ Bihain long ol samting i kamap, pikinini man bilong dispela meri Elaija i save stap wantaim em, em i sik. Em i kisim bikpela pen insait long sik bilong em na win bilong em i pinis. ¹⁸ Tasol mama bilong em i tokim Elaija, "Wanem tok bilong mi yu gat em i no gutpela, wok man na profet bilong God? Yu kam bilong painim aut sin bilong mi na kilim pikinini man bilong mi dai?" ¹⁹ Orait Elaija i bekim tok long em, " Givim mi pikinini man bilong yu." Elaija i kisim dispela boi long sol bilong mama bilong em na karim i go insait long rum em i save stap, em i slipim dispela boi long bet bilong em yet. ²⁰ Em i krai long God Yawe na i tok, "God Yawe, yu God bilong mi, yu kisim bagarap i kam long meri man i dai pinis husait mi save stap wantaim em, long kilim pikinini man bilong em?" ²¹ Orait Elaija i slip antap long pikinini tripela taim na krai bikmaus i go long God Yawe na i tok, "God Yawe God bilong mi, plis larim laip i kam bek long em." ²² Na God Yawe i harim maus bilong Elaija na givim laip bilong pikinini i kam bek long em na em i kisim laip gen. ²³ Elaija i kisim pikinini i kam autsait long rum bilong em na givim dispela boi long mama bilong em na i tok, "Lukim, pikinini bilong yu i stap laip." ²⁴ Na dispela meri i tokim Elaija, "Nau mi save olsem yu wokman na profet bilong God, olgeta tok bilong God Yawe i kam long maus bilong yu em i tru."