5 ¹ Mipela harim olsem i gat wanpela namel long yupela i mekim pasin pamuk em i pasin nogut tru. Dispela em pasin we ol haiden tu i no save mekim. Mipela harim wanpela man namel long yupela i wok long slip wantaim meri bilong papa bilong em. ² Yupela i bikhet tru! Yupela i mas sori tru long yupela yet. Yupela i mas rausim dispela man husait i mekim kain pasin namel long yupela. ³ Long wanem, mi no stap wantiam yupela long bodi, tasol long spirit, mi stap wantaim yupela. Na mi skelim pinis dispela man husait i mekim kain pasin, wankain olsem mi stap long hap wantaim yupela. ⁴ Taim yupela i bung wantaim long nem bilong Bikpela Jisas, spirit bilong mi tu i stap wantaim yupela long hap, na pawa bilong Bikpela Jisas i stap wantaim yupela, ⁵ givim dispela man i go long Satan long bagarapim bodi bilong en, na spirit bilong em i ken stap gut long de bilong Bikpela bilong mipela. ⁶ Em i no gutpela long apim nem bilong yupela yet. Yupela save o nogat, liklik yis tasol i save mekim bret i solap. ⁷ Klinim yupela yet na rausim dispela olpela yis i nap long yupela i ken kamap nupela bret we i no save solap. Long wanem, Krais yet i bin givim laip bilong en long yumi, na i kamap dispela pikinini sipsip we ol i bin kilim long dispela de God i bin larim ol Israel i stap gut. ⁸ Olsem na larim mipela hamamasim bikpela de bilong lotu. I no hamamas wantaim dispela olpela yis, dispela yis bilong pasin nogut na pasin i doti. Nogat, larim mipela i hamamas wantaim dispela bret i no gat yis. Dispela bret i makim gutpela pasin na tok tru. ⁹ Insait long pas mi bin raitim long yupela, mi tokim yupela long noken pas wantaim ol lain husait i save mekim pasin pamuk. ¹⁰ Mi no tok long ol haiden man bilong dispela graun, o ol man bilong tingim ol yet, o ol giaman man, o man bilong lotuim God giaman. Nogat, long mekim dispela ,em bai yu stap longwe long olgeta ol dispela man i stap longwe long dispela graun. ¹¹ Olsem na mi raitim dispela pas long yupela long toksave long yupela long noken pas wantaim dispela kain brata husat i mekim pasin pamuk, o wantaim ol brata husat i save tingim ol yet, ol i save lotu long god giaman, o ol i save tok nogut, o ol i save spak, o ol i save giaman. Long ol kain lain, noken kaikai tu wantaim ol. ¹² Bilong wanem bai mi skelim ol man i stap autsait long sios? Nogat, yupela i mas skelim ol man i stap insait long sios. ¹³ God yet bai i skelim ol man i stap autsait long sios. "Rausim dispela man nogut husat i stap namel long yupela."