4 ¹ Ol man i mas lukim mipela olsem mipela i wokman bilong Krais na lukautim gut ol tok hait bilong God. ² Yumi mas stap tru na mekim wok bilong God we em i givim long yumi, long wanem, em i save yumi i nap mekim. ³ Tasol long mi, em i liklik samting tru long yupela i ken skelim mi o, ol man bilong graun i skelim mi. Long wanem, mi no save skelim mi yet. ⁴ Mi no save ol i skelim mi olsem wanem, tasol mi no i nap tok mi stretpela man. Bikpela tasol inap skelim mi. ⁵ Olsem na yupela i noken kotim wanpela man long wanpela samting long wanem, taim bilong Bikpela i no kamap yet. Em bai bringim olgeta samting i stap hait i kamap long lait na putim ples klia olgeta samting long bel. God bai givim amamas long wanwan man. ⁶ Nau, ol brata na susa, long yupela tasol mi putim dispela tingting bilong mi na Apolos, olsem na long mipela tasol yupela i nap lainim as bilong tok, "Yupela noken abrusim wanem ol i raitim pinis," olsem na yupela i noken litimapim yupela yet na daunim ol arapela. ⁷ Husat i lukim yupela i narakain long ol arapela? Olgeta samting yupela i gat, yupela i kisim fri tru? Sapos yupela i kisim fri, bilong wanem yupela i litimapim nem bilong yupela yet olsem yupela i no kamapim samting? ⁸ Yupela i kisim pinis olgeta samting yupela i gat laik long en.Yupela i gat planti samting pinis, yupela i stap olsem king pinis, we mipela i no bin helpim yupela! Tru, mipela i laik bai yupela i stap olsem king, mipela tu i ken stap king wantaim yupela. ⁹ Mi ting God i makim mipela aposel long i stap las tru, na mipela i stap olsem man kot i tok pinis long mipela i mas i dai. Mipela i stap ples klia stret long ai bilong ol man long dispela graun na long ol ensel. ¹⁰ Long Krais tasol mipela i stap longlong man, tasol long Krais yupela i gat gutpela save tru. Mipela i no gat strong, tasol yupela i strong. Yupela i gat biknem, tasol ol i daunim nem bilong mipela. ¹¹ I kam i nap long dispela taim, mipela i stap hangre na nek i drai long wara, na mipela i no gat klos, na ol i paitim mipela na mipela i no gat haus. ¹² Mipela i wok hat wantaim han bilong mipela. Taim ol i mekim nogut long mipela, mipela i mekim gut long ol. Taim ol i mekim nogut long mipela, mipela i sanap strong. ¹³ Taim ol i sutim giaman tok long mipela, mipela i mekim gutpela tok long ol. Mipela i kamap olsem samting nating bilong dispela graun taim ol man i les na tromoi. ¹⁴ Mi no raitim ol dispela tok bilong semim yupela, tasol long helpim yupela olsem ol pikinini tru bilong mi. ¹⁵ Sapos yupela i gat 10,000 man long lukautim yupela long Krais, yupela i no gat planti papa. Long wanem, mi kamap papa tru bilong yupela insait long Krais Jisas long rot bilong autim gutnius. ¹⁶ Olsem na mi laik yupela i mas bihainim pasin bilong mi. ¹⁷ Dispela as tasol mi salim Timoti i kam long yupela, em i olsem pikinini bilong mi na mi laikim em tru insait long Bikpela, na em i save mekim gut olgeta wok. Em bai kirapim tingting bilong yupela long pasin bilong mi insait long Krais,olsem mi bin skulim yupela long olgeta hap na insait long sios. ¹⁸ Nau, yupela i save apim nem bilong yupela yet na yupela i ting olsem mi no i nap kam long yupela. ¹⁹ Tasol, mi bai kam kwiktaim long yupela, sapos em i laik bilong Bikpela. Mi no laik harim toktok bilong ol dispela bikhetman, tasol mi laik lukim strong bilong ol. ²⁰ Long wanem, kingdom bilong God i no kamap long toktok bilong man, tasol long pawa na strong bilong God. ²¹ Yupela i laikim wanem samting? Yupela i laik mi kam wantaim kanda na stretim yupela o wantaim laikim na spirit bilong pasin isi?