12 ¹ Ol brata, nau mi laik tokim yupela long ol presen, bilong Holi Spirit.Olsem na mi laik bai yupela i mas save gut long en. ² Yupela yet i save olsem taim yupela i bin i stap haiden, ol arapela man i pulim yupela na i go lotuim ol giaman god i no save toktok, na ol i paulim tingting bilong yupela na yupela i save i go tasol. ³ Olsem na mi laik yupela i save olsem nogat wanpela man i gat Spirit bilong God inap tok, "Jisas i ken bagarap,"na nogat wanpela man inap tok,"Jisas em i Bikpela," tasol long Holi Spirit tasol. ⁴ I gat kainkain presen bilong Holi Spirit, tasol i gat wanpela Spirit tasol i stap. ⁵ Na i gat kainkain wok bilong God i stap, tasol i gat wanpela Bikpela tasol, ⁶ na i gat kainkain wok i stap, tasol i gat wanpela God tasol, em i mekim wok i kamap isi insait long olgeta man. ⁷ God i givim strong bilong Holi Spirit long wanwan man long helpim olgeta man. ⁸ Dispela wanpela Spirit, tasol i givim strong long wanpela man long autim tok bilong gutpela tingting, na long narapela em i givim save bilong autim save bilong God. ⁹ Long dispela wanpela Spirit, tasol em i givim strongpela bilip long wanpela man, na narapela man em givim presen bilong oraitim sik. ¹⁰ Na narapela em i givim presen bilong mekim strongpela mirakel, na narapela em i givim presen bilong autim tok profet, na narapela em i givim save bilong luksave long gutpela spirit na spirit nogut, Na long narapela em givim presen bilong toktok long kainkain tokples, Na long narapela em i givim save bilong tanim ol kainkain tokples. ¹¹ Tasol wanpela Spirit tasol i wok insait long dispela olgeta samting na i givim presen long ol wanwan man God i makim. ¹² Wankain olsem bodi em i wanpela, tasol i gat wanwan hap bilong en i kamapim wanpela bodi, wankain olsem Krais. ¹³ Long wanpela Holi Spirit tasol yumi baptais na i kamap wanpela bodi. Maski yu bilong Juda o bilong Grik o man i stap wokboi nating o man i stap fri, God i mekim yumi olgeta i dring long wanpela Spirit tasol. ¹⁴ Bodi ino wanpela hap bilong em yet, nogat em i gat planti hap bilong en. ¹⁵ Sapos lek i tok, "mi no han olsem na mi no hap bilong bodi," tasol em tu i wanpela hap bilong bodi. ¹⁶ Na sapos ia i tok, Mi no ai olsem na mi no hap bilong bodi, tasol em tu i wanpela hap bilong bodi. ¹⁷ Sapos olgeta bodi em i ai tasol, bodi bai harim tok olsem wanem? Na sapos olgeta bodi em i ia tasol, bodi bai smelim samting olsem wanem? ¹⁸ Tasol God i putim wanwan hap bilong bodi long taim em i wokim em. ¹⁹ Sapos olgeta i bin kamap wankain hap tasol, bodi bai i stap we? ²⁰ Olsem na wanwan hap bilong bodi, olgeta i kamapim wanpela bodi. ²¹ Ai i no inap tokim han olsem,'' yu i no inap i stap wantaim mi'',na het i no inap tokim lek olsem, ''yu no inap i stap wantaim mi'', ²² tasol ol hap bilong bodi yumi ting ol i nogat strong, tasol em i bikpela samting long bodi bilong yumi . ²³ Na ol hap bilong bodi yumi ting ol i no gutpela , em yumi save bilasim ol. Na long ol hap bilong bodi yumi i no inap long lukim em yumi save karamapim ol gut tru. ²⁴ Orait ol arapela hap bilong bodi yumi i no bilasim, tasol ol i kisim biknem pinis. Tasol God i bungim olgeta hap bilong bodi i kamap wanpela, na em i givim biknem long ol hap bilong bodi yumi ting ol i no gutpela. ²⁵ Em i mekim olsem bai i nogat bruk i kamap insait long bodi. Tasol long mekim wanwan hap bilong bodi bai lukautim arapela long wankain pasin tasol. ²⁶ Taim wanpela hap i pilim pen olgeta hap bai pilim wankain pen. Na taim wanpela hap i kisim biknem ol arapela i amamas wantaim. ²⁷ Olsem na yumi olgeta i bodi bilong Krais na yumi wanwan i stap hap bilong em. ²⁸ Na insait long sios God i bin makim wan em ol aposel, na tu em ol profet, na tri em ol tisa, na sampela em i givim presen bilong mekim ol strongpela mirakel, na sampela i kisim presen bilong oraitim sik, na sampela i kisim presen bilong helpim arapela lain, na sampela i kisim presen bilong lukautim wok bilong sios, na sampela em i givim presen bilong toktok long kainkain tokples. ²⁹ Ating yumi olgeta i aposel na profet na tisa a? Ating yumi olgeta inap mekim strongpela mirakel a? ³⁰ Ating yumi olgeta i kisim presen bilong oraitim sik a? Ating yumi olgeta i gat presen long toktok long kainkain tokples a? Na ating yumi olgeta inap tanim dispela tok? ³¹ Yumi mas tingting strong long kisim nambawan presen bilong Holi Spirit. Na bai mi soim yupela long pasin bilong gutpela rot bilong laip.