17 ¹ Nau king i sindaun gut pinis long haus bilong em na em i tok long Profet Natan, "Lukim, mi stap long gutpela haus ol wokim long diwai sida tasol bokis kontrak bilong God Yawe i stap yet insait long haus sel." ² Bihain Profet Natan i tokim King Devit, "Go na wokim wanem samting i stap long bel bilong yu, long wanem God i stap wantaim yu." ³ Tasol long dispela nait tok bilong God i kam long Natan na i tok, ⁴ "Yu go na tokim Devit wokman bilong mi olsem, God Yawe i tok, 'Em i no ken wokim haus bilong mi long i stap long en. ⁵ Mi i no stap long haus inap long taim mi kisim ol Israel i kam aut inap nau. Tasol nogat, mi wok long stap long haus sel bilong lotu na dispela haus sel bilong lotu i save i go long planti arapela hap. ⁶ Long olgeta hap mi raun long en wantaim ol Israel, mi mekim wanpela toktok long ol lida bilong Israel husat mi makim ol bilong lukautim ol manmeri bilong mi na tok olsem "Bilong wanem yupela i no wokim wanpela haus bilong mi wantaim diwai sida?" ⁷ Nau yu go na tokim Devit wokman bilong mi olsem, "Mi God Yawe Bikpela i kisim yu i kam aut long lusim wok bilong lukautim sipsip, na nau bai yu bosim ol Israel, em ol lain manmeri bilong mi. ⁸ Mi bin i go wantaim yu long olgeta hap yu raun long en na rausim ol birua bilong yu. Na nau bai mi mekim nem bilong yu kamap bikpela olsem ol arapela lain husat i bin i stap long dispela graun. ⁹ Mi bai makim wanpela hap graun bilong ol manmeri bilong mi Israel na bai mi givim graun long ol bai ol yet bai stap long en na birua i no inap bagarapim ol. Na bai ol man nogut i no inap mekim nogut long ol olsem bipo, ¹⁰ i kam inap long dispela taim mi givim tok long ol jas long lukautim ol Israel, em ol manmeri bilong mi. Na bai mi daunim strong bilong olgeta birua. Na mi tok olsem, mi God Yawe bai wokim haus bilong yupela. ¹¹ Bai i gat taim i kamap long i dai i bungim yu na yu bai i go slip wantaim ol papa bilong yupela. Bai mi kirapim ol tumbuna bilong yu stret na mi bai kamapim kingdom bilong em. ¹² Em bai wokim haus bilong mi na mi bai kamapim sia king bilong em bai i stap olgeta. ¹³ Mi bai kamap papa long em na em bai kamap pikinini man bilong mi. Mi i no inap rausim na kisim bek promis bilong gutpela pasin bilong mi olsem mi bin rausim long Sol husat i kamap king pastaim long yu. ¹⁴ Mi bai mekim em bilong lukautim haus bilong mi insait long kingdom bilong mi na sia king bilong em bai i stap olgeta. ¹⁵ Profet Natan i tokim Devit long olgeta toktok em i bin harim na i bin lukim long driman. ¹⁶ Orait, king Devit i go long God Yawe na i tok, "God Yawe, mi husat? Wanem gutpela samting i stap long famili bilong mi na yu kisim mi i kam long dispela hap? ¹⁷ God, dispela em i liklik samting long lukluk bilong yu. God Yawe, yu tokaut pinis long wanem samting bai kamap long famili bilong wokman bilong yu na yu soim mi pinis ol tumbuna lain bai i kam bihain. ¹⁸ Wanem samting moa bai mi, Devit i ken tokim yu? Yu mekim gut pinis wokman bilong yu, na givim em gutpela luksave long em. ¹⁹ God Yawe long gutpela bilong wokman bilong yu, na bilong inapim wanem samting yu laik mekim. Yu mekim dispela bikpela samting long kamapim gutpela pasin bilong yu. ²⁰ God Yawe, i nogat wanpela olsem yu, na i nogat narapela God moa i stap, olsem mipela i save harim olgeta taim. ²¹ Wanem kantri long dispela graun i olsem ol manmeri bilong Israel? God yu yet kisim ol i kam aut long Isip, olsem ol manmeri bilong yu, bilong kamapim biknem bilong yu. Yu kamapim dispela long strongpela han na pasin bilong yu. Na yu rausim ol arapela kantri na kisim ol manmeri bilong yu i kam aut long Isip. ²² Na yu mekim Israel i kamap manmeri bilong yu olgeta, na yu God Yawe kamap God tru bilong ol. ²³ Olsem na nau God Yawe, wanem promis you bin wokim wantaim wokman bilong yu na famili bilong em bai i stap olgeta. Em orait, yu mekim olsem yu tok pinis. ²⁴ Larim biknem bilong yu i stap oltaim oltaim, olsem bai ol manmeri i tok, "God Yawe em i kepten bilong bikpela lain ami na em i bikpela God bilong ol Israel." Na yu bai mekim tumbuna lain bilong Devit wokman bilong yu bai lukautim ples na i stap olgeta. ²⁵ God bilong mi, yu soim mi pinis wokman bilong yu olsem bai yu wokim haus bilong em. Olsem na mi wokman bilong yu i gat strong long beten long yu. ²⁶ Na, God Yawe, yu God na yu wokim dispela gutpela promis long wokman bilong yu. ²⁷ Nau em mekim bel bilong yu amamas long mekim gut long tumbuna bilong wokman bilong yu. Olsem na em bai i stap olgeta. God Yawe yu blesim pinis na em bai i stap olgeta."