¹ Ari kam araqab Yesus in Juda gigo bit humab wolaiytab tilah. Lehan i mat araq aben akogan anedan mayim aditinmo usaqta in nab os. ² Ossa Yesus ago bab in Yesus wamuzim nab osiymo, Yesus i gigo lotu akaman kab mat ka wastitayid dimniyid i amalib nan emnan haqad. ³ Haqsa Yesus mat aben meqinta na tubulon, ni boleq mataw ka gimeb tur ham. ⁴ Haqad in mataw na tisusumun nag, i Juda gigo maror usaqta? ham. Lotu akamnib i mataw gidimun tonamta o i gimeqin tonamta? ham. Kam na i mat moqaqta ulum sihamta akaman o i mat na aholib hiqiyid in moqdaqta akaman? ham. Haqan mataw na giqezmo hiqiyim osiy. ⁵ Ossa Yesus mataw na bunmo ginad ahol waqim le bolsa in ginad soqotim us. Ussa Yesus ahol afaqan diq iyad in mataw na ginan agem timeqniy. Agem meqniysa in mat na bulon, NI niben itiwun ham. Haqan mat na aben itiwunan aben akogan na tidimniy. ⁶ Dimniyan Farisi na hidmo lehim in Herot ago dauh nenaq humab wolim osad in ezaq toneq Yesus wolemid moq daqta na agamukan bilaq yaqay. ⁷ Ari yesus ago disaipel nenaq yuw-kurorqanta Galiliy-ib tilehiy. Lehsa mataw kabemmo Yesus muzim inaq tilehiymo. ⁸ Sa mataw saw Galiliy-ibta teq saw Judiya-ibta teq uliq Jerusalem-ubta teq saw Udimiya-ibta teq mataw kabemmo yuw Jodan aqurumnibta teq uliq giger Tair teq saidon-ibta nagan kabemmo diq in kabiy daq bunmo Yesus em yaqta na abin huritim in agerab tuboliymo. ⁹ Bilaqan Yesus in ago disaipel gibilan, na yaqmen muy araq ahol waqad teq usan ham. Luweq mataw ka ya iqisiq daqay ham. ¹⁰ Na izaqgo Yesus in mataw kabemmo gigo moq tuwastitayan biyahta na gigo asor gigo moq inaq na bunmo in gigerabmo diq loq yaqay, i Yesus wazeq teq gihol tidimniy daq haqay. ¹¹ Sa mataw gigo bugaw meqinta inq na in Yesus aholwaqadmo in anognib woqeq usad lileyeq bilaq yaqay, Ni God atatin haq yaqay. ¹² Haqsa in bugaw meqinta na atoran diqmo gibileneq bilaqyaq, Ne ya ihol abin ulalab hibilaqiy haqyaq. ¹³ Ari kam araqab Yesus garah araqab tugwah. Gwalehim in mataw asor in ginan anad bilaqaqta naqmo gibilenan agerab tuboliy. ¹⁴ Bolan in mataw 12 nazaq gitowun emim ginan Aposel haqad tibiy. ¹⁵ In anad mataw na in inaq ossa teq in giqemid in uliq-uliqgo lehad inmo ahol abenab ago gamuk dimunta na gibilenad teq in bugaw meqinta gimuz adqay haqad in anad am. ¹⁶ Ari in mataw 12 giwamta na ginan kazaq. Saimon, Yesus anan araq Pita haqad biyim ugta. ¹⁷ Teq Sebediy atatniz Jems anan Jon inaq. Yesus in maqbab giger na ginan araq Bowaneryes haqad biyiyta. Na Bowaneryes na alulin mat ago daq atoranta kait ahulan iyaq nazaq nogta haqayta. ¹⁸ Teq Andru teq Filip teq Bowaneryes teq Matyu teq Tomas teq Alfiyus atatin Jems teq Tadiyus teq Saimon, mat Rom nenaq bab emyaqta amatin na teq Juda uliq Kariyot-ibta na. ¹⁹ Mat naqmo Yesus waqim bab gibenab amta. ²⁰ Ari Yess bitab tilah. Lehan mataw in ahol waqnan haqad lehim bit nab humab a ta woliy. Humab wolim ossa Yesus ago disaipel nenaq in gikabiyan kabemmo emad didaq neqgo akaman haiq iy yaqay. ²¹ Sa Yesus asenlul huritim in Yesus waqnan haqad tuboliy, i gigo amun ahol agadan tiqiy daqag haqad. ²² Sa mataw Moses ago gunun hurit kimayta na asor Jerusalem-ub osim gewoqim osad teq in bilaqiy. Bugaw meqinta gimuzaqta ham. ²³ Haqan Yesus in mataw aseseqta na gibilenan agerab bolan in gamuk awowun araq kazaq gibilan, ezaq teq Satan inmo ago dauhta tigimuzdaq? ham. ²⁴ Kantri araq ago on mataw gihol husereq an gihar ugad an wolad osad in zaway iyeq a hi tur daqay ham. ²⁵ Teq bit araqab on mataw gihol husereq an gihar ugad an walad a hi tur daqaymo ham. ²⁶ Ad nazaqmo Satan ago dauh nenaq gihol huserad an geg ugad Satan zaway iyeq a hi tur daqay ham. In tihiqiydaq ham. ²⁷ Haqad in bilam, mat araq in mat awaz meqinta ago bit aduganib samanmo gwahtiqeq ago nagah a hi waqdaq ham. Haiq ham. In mataw awaz meqinta abensen irqureq teq in mat na ago bit aduganib gwahtiqeq na ago nagah tuwaq daqay ham. ²⁸ Ya helmo ne gibilenaiq ham. God in on mataw gigo daq meqinta teq in bilawunaiqta na bunmo tigiwalem bug daq ham. ²⁹ Ari on mataw God ago Bugaw Dimunta bilawunid God in gigo daq meqinta na a hi walem daq ham. Haiq ham. Daq meqinta na in giholib tuqus tut daq ham. ³⁰ Ne ezaqgo mataw aseseqta na yesus anan bilaqiy, in aholib bugaw meqinta usaq haqiyta na ago Yesus gibilan. ³¹ Ari kam nab Yesus anen teq in amagniz bolim asanib turad in Yesus ayon nan eman tilah, in gigerab boldaq haqad. ³² Teq mataw kabemmo Yesus lilut ugim osiy. Osad in Yesus buloniy, ni ko gibiy haqiy. Ni ninen teq nimagniz bolim asanib kawa turad ni nan sawaqay haqiy. ³³ Haqan Yesus amenin emim gibilan, ya inen teq ya imagniz gingan diq? ham. ³⁴ haqad in on mataw lilut ugim osiyta na gibiyim leh bolim bilam, ne ahol waqiy ham.Ya inen teq ya imagniz kawa osay ham. ³⁵ Mat aw nog in God anad muzad ago kabiy emayta naqmo in ima teq in ya ihiy teq in ya inen ham.