¹ Juda nebere bori fati usu wainga, Maria Makdalaha waig, Maria Jems Josep ngare anyanere waiga, Salome waiga, nere faronga bagu dada ila agiya hilou-hilou waha bagu ejiya wane. Nere goidu Giduhaigou Itou gogala langa bisemu wodbode ono wane. ² Bori nomo fati ambugou gai eringe amina, nere matmat langa goyane. ³ Nere goi bode, nere nage-nage benou leguruwane. "Faiwei ete no nere hoyo hididu megebu matmat u-u sesemu wane waha, ubeludu aririmu hagahe yo?" ⁴ Saini nere matmat langa maidu jugu bode iegi wane wa, megemu waha ubelumudu aririmu wou urane. Megebu waha no gai anyakaru. ⁵ Nere maidu matmat huanyalanga goi bode, managa gila ete nomo kolos kamba ufaro bagu owo hilou langa yafa gainga uredu, horoto wane. ⁶ Ono wanenga no benou lenigai, "tere adai horoto wagu. Ji isini, tere Gidu Haigou Itou Nasaretha nauge ablakawau langa tofiya tuwane waha, kuru tuwagu ganga maiyaha. No amina jayaha. No belanga inyei uwa. Uragu,haumu belanga no tafa tuwaneha. ⁷ Waha bona tere goidu nomo disaipel lenigi bonade, pita fere letuwagu ,Giduhaigou Itou no tere amuge tigidu bona, Galili lanaga goina. Tere no amina letigai onou, goidu Galili walanga uragu ganga.'' ⁸ Ono wainga, aita nere malala maidu bode, matmat awadu hara wanera. Nere au togo nagainga terere bode, fai ete te letu weguwa, nere umuganeha. ⁹ Giduhaigau Itou no eringe amina bori nomo fati amugou langa jayaiha. Onodu no Maria Magdalaha heigei uwa inyi gainga, no amugedu heigaiha. Giduhaigou Itou no amina aita waha langa hauri inyaba 7 so nigaiha. ¹⁰ Ono wainga, Maria Magdalaha no goidu bona, fai giduhaigou Itou ngate gara golowane waha lenigai. Fai waha nere au togo nagainga mere bode yafane. ¹¹ Maria no beno lenigai, ''Giduhaigou Itou no ago auma yafa gainga urenaha.'' Ono wainga, nere nomo bele waha isidu, huwanyanege ngalengawei uwa. ¹² Inga Giduhaigou Itou nomo Disaipel nga nere taon awadu bodere golodu goyare. Ono garenga, Giduhaigou Itou no hogo ferete heigedu bona, goi nere bagu heigai. ¹³ Ono wainga nere goidu bodere, bele waha malalamudu Giduhaigou Itou nomo Disaipel ila hai nagareha . Ono ware wa, nere neire bele waha bodere huwayange ngalenga weguwa. ¹⁴ Inga Giduhaigou itou nomo Disaipel 11 nere da nyibode yafa ganenga, Giduhaiou Itou nere langa heigai. Onodu nere huwanyanege ngalengawou uwau bona hongoro nigai, onowai wa nere huwanyanege sese wainga, nere fai-aita bagu no gidu jayai waha bode lewane waha, nere huwanyanege ngalengawei uwa. ¹⁵ Onodu no benou lenigai, ''tere ha-ha oruwa langa goidu hilou bele malalamudu fai-aita bagu oruwanga hai nagagu. ¹⁶ Fai no huwanya ngalenga wonga yage biso tona waha, Itou no ege gidu hawonbona. Ariya fai no huwanya ngalengawei uwa waha, no kot langa yae wonbona. ¹⁷ Itou no dodokawou fai nere huwanyanege ngalengade waha owonege langa heigemu wonbona. Ji unyife langa hauri inyaba so nigibode, bele ege hogo fere- fere waha malalamudu lewodbode. ¹⁸ Nere maangi owonege langa yasu wodbode. Onodu nere dada fai dunege kotena waha nyei mata wode wa, dada waha nere ada inyabamu nigonbona . Onodu nere taura fai langa owonege tafabode wonga, taura ege jige ingona bona.'' ¹⁹ Anyakaro Giduhaigou Itou no bele malalamudu lenigi boro wainga, Itou no Giduhaigou Itou haudu ha laluwa langa manai. No Itou owo hilo langa yafana. ²⁰ Ono wainga Disaipel nere ha-ha oruwa langa goidu bode bele malalamudu lewaneha. Anyakaro no nere bagu haruwe tebona, no nebere bele dangamu nagi bona dodoka ila heigemuwai.