¹ Te Melquisedec, ajwalil yu'un salem, sacerdote yu'un te Dios te toyol aye, te ja la sta sba sok te Abraham k'alal yak ta sujt'el tel-a ta smilel te ajwaliletik sok la xch'ultes. ² Bajt'ta stojol te Abraham te la yak'bey spisil te jun ta slajunebal. te bi'ilil '' Melquisedec'' ya sk'an yal ''toj agwalil''. te yan sbi'ile ja: ''ajawalil yu'un salem'' te sk'an yal ''ajwalil yu'un lumal k'inal''. ³ Mayuk sme stat, xchich man, ja nix te mayuk' xach'ibal sok mayuk' slajibal te sk'aal te skuxlejale. jich yilel te bit'il te snich'an te Diose, melel janax tul sacerdote ta sbat'el k'inal. ⁴ Ilawil bit'il smuk'ul ja iwinik to. Te namey jtatik Abraham la yak te jun ta slajunebal te bit'ik la sta te k'alal la yay te kerajele. ⁵ Ta yan, te snich' nab te levi te ja'ik la yinch'ik ak'bel te sacerdocio yinch'ajik mantal ta sk,anel te jun ta slajunebal yu-un te ants-winik, ja ito, ja yu'un te yermanotak, manchuk me ja nix jich te talemik ta swenta te Abraham. ⁶ Yan te Melquisedek, manchuk me ma ja'uk stsumbaltel, ja'uk me to la stsak te jun ta slajunebal te la yak' te Abrahame sok la xch'ultes ta swenta te bina albile yu'un te kajwaltike. ⁷ Mayuk lotil, te mach'a ya xch'ulteswane ja tulan sk'oplal yu-un te mach'a ya yich' ch'ultesele. ⁸ Ja swentail. te mach'atik stsakik te jun ta slajunebal ch'ich bak'etik, ja'uk me lo albil sk'oplal te kuxul to-e. ⁹ Ya xju jkaltik, te leví, te ja le yich' ak'bel te jun ta slajunebale ja nix jich u'uk la stojo te jun ta slajunebale ta swenta te Abrahame. ¹⁰ Melel te levi ak'bilixtel ta yutil sbak'etal te Abrahame te k'alal ta'ut yu'un te Melquisedec. ¹¹ Ta ora to, te ja'uk ta swenta slektesotik te te sacerdocio yu'un te levi (jich te lume la yich' ak' bel te mantalil te jich k'anuk k'ot ta pasel) bi stu'uk xan tal yan sacerdote, jich bit'il te Melquisedeke, te ma ja'uk pajal sok te Aarone?. ¹² Melel te me la yinch' yante sel te sacerdote, janix jich u'uk ya yinch' yantesel u'uk te mantaliletike. ¹³ La jkaltik spisil to ja ta swenta yu'un te yan ts'umbalil te mayuk junuk buelta xch'uunejik mantal ta sk'ajtijib majt'anil. ¹⁴ Melel te kajwaltike ja sts'umbal te Judá, ja'uk me to te Moisese ma la yal te le xlok' talel-a te sacerdote'etik. ¹⁵ Te bina jkaltike ya xchiknaj ta lek te me la yuk' sba ta ilel te yach'il sacerdote te jich yilel bit'il Melquisedec. ¹⁶ Te bit'il och' ta sacerdote te kajwaltike, ma ta swenta'uk te mantalil yu'un te bak'et ja ta swenta te ay yu'el te stalel kuxul te ma xlaje. ¹⁷ Melel jich' ts'ibubil sk'oplal:''JA'AT SACERDOTA 'AT SBAT'EL K'INAL JICH BIT'IL STALEL TE MELQUISEDEC''. ¹⁸ Jich yu'un la yich lajimbel sk'aplal te sne'elal mantalil, ta skaj te mayuk yip sok mayuk stulal. ¹⁹ Melel te namey mantalile ma ju yu'un lek' teswan. ja'uk me to, ay ba xju ochotik ta swenta ch'unjel kot'antik te pajel chawej ta stojol te Diose. ²¹ Jich k'ot ta pasel, Dios jamal la yal stukel ja'uk me to te yantik sacerdote'etik ma jichuk la yinch'ik albel. ²⁰ Ta yan xan , ja te Jesus to,och'ta sacerdote ta swenta te k'ayel la yal te Diose, melel jich ts'ibubil jilel: '' TE KAJWALTIK K'AXEL LA YAL SOK MA XYANUB TE SNOPJIBAL YU'UN: ''JA'AT SACERDOTE'AT SBAT'EL K'INAL''. ²² Jich yu'un te jesus ya xju yu'un yak' k'otok ta pasel ta lek te tratoe te la yal te Diose. ²³ Yan te yantik sacerdote'etik bayalik ta skaj te ya xlajike ma k'axel xjilik ta at'el. ²⁴ Yan te Jesuse sbat'el k'inal kuxul stukel ja yu'un sacerdote sbat'el kinal. ²⁵ Ja swenta yu'un te ya xju xkolteywan ta yalel ta stojolik te mach'atik ya xtal ta stojol te Diose ta swenta te kajwaltike, kuxul yu'un te yak k'op ta stolik. ²⁶ Melel ja te muk sacerdote te ya xtu'un ku'untike. Stukel mayuk smul, toj, ay yutsil, ma pajal ay sok te mulawiletike, ja muk' k' oem ta ch'ulchan. ²⁷ Stukel ma sk'an milbil mat'anil ta ju jun k'aal ta swenta te mulil yu'un te lume jich bit'il te namey sacerdote.La spasix stukel ta junax buelta te milbil majt'anil te ja la yak'sba stukele . ²⁸ Melel te mantalile ya snak'an te muk' sacerdote'etik te ch'ich bak'et sok te teb sta'elik. Yan te bina k'axel albile te tal ta patil yu'un te mantalile, ja bi ja la snak'an te nich'anile te ja la yich'ix ustesel sbat'el kinal.