Udungara u Yeso abanga u nyinza usadiga
Bikoro 6
1
Wuza ni seke kati katuma kashi me ka cukuno ku hira aje, barki inki Ya wuza ani me ida kem shi imum ahira aco ashi me Asesere ba.
2
Inki idi nya usadiga, kati i wuzi kasi anu unyara uniza sa wa wuza udenge Asere barki anu wa nonzo we, kadure kani in boo shi wa mu kaba ukalu uwe.
3
Anime inki idi nya usadiga, kati i hem tari tina gure ti rusi imum besa ti nare tizi nu wuza me ba.
4
Barki u sadiga u cukuno nihunzi, aco ushi sa ma hira nihunzi ma di nya shi anyo ashi me.
5
Inki idi wu biringara, kati i cukuno kasi anu nyara u niza, sa wa tonzuno aje anu wa wuza biringara, ati denge ta Asere nan tina, bati anu wa iri we kadure me in boo shi wa mu kaba ukalu uwe.
6
Inka idi wu biringara, i ribe anyimo udenge, i korso ana tukum i wu biringara acoo ushi me sa ma hira nihunzi ma di nya shi anyo ashi me.
7
Ingi idi wu biringara, kadi I tarsa ba kasi anu uzatu utarsa utize ta Asere; ubasa uwe adi kunna we barki ugbardang utize tuwe.
8
Kati icukuno kasi we, barki sa acoo ushi me ma rusa imum besa i nyara.
9
A anime senke i wuzi biringara kasi ana, Acoo uru Asesere a kpici niza nuwe.
10
Tigomo tuwe ti cukuno. A wuzi imum iwe anyimo unee kasi u wuza Asesere.
11
Nyan duru imum yare ini hiri.
12
Vette tireme tiru kasi be sa ti verse ande sa ti tarsa we tireme.
13
Kati u han haru ahira aburi anyimo ubata ba, buran duru atari ti unu uburi.
14
inki ya vette ucara abanga wa anabu ni, aco ashi Asere madi vette ashime ni cangi.
15
Inki daki ya vette ucara abanga awe meni ane ani aco ushi me mada vette me ucara abanga ashi me ni ba.
16
Ane ani me, inki idi inta anyo kati i tiri muhenu kasi anu atiyom,ane ani anu nyara u ninonzo wake wa cari muhenu bati anu wa rusi.Kadure im boo shi wa kaba ukalum uwe.
17
Inki izinu u'inta anyo i humuka ace ashi me in mani i kpici muhenu.
18
Kati anu wa iri wa rusi i zin nu inta anyo ba senke aco ashi cas sa ma zi nihunzi ma hira. Acoo ashi me sa ma hira nihunzi, ma di nya shi ukalum.
19
Kati i ori ace ashi me imum unee ba, ahira sa biru-ruk nan ubuma wa cara ni, ahira sa akari wa di puri wa cuzi.
20
A,anime i orso ni ace ashi me imum Asesere, ahira sa iru-ruk nan ubuma wa di cari ni, nani akari me sa wa di puri wa cuzi.
21
Barki ahira me sa ucira u we u rani, abine ani iriba iwe irani cangi.
22
Aje ane ani masaa ma nipum inki aje awe me azi ahuma, vat nipum nuwe nidi myinca in masaa.
23
Inki aje awe me azo me ahuma ba, vat nipum ni di myinca in mareu. Abini me inki masaa me sa ma rani a nipum nuwe mazi mareu, ugbardang umareu me udi zi aneni!
24
Unu ma dake ma tarsi me an sakura ware ba, nani ma kini unu inde ma hem unu inde, nani ma hem unu inde ma izi unu inde me.Udake u tarsi Asere nan ukem ba.
25
Anime in boo shi kati i basa abanga uvengize ushi me, nani imum besa idi ri nani idi si, nani nipum nishi nani turunga sa idi soki. Abana me uvengize u da teki me imum yare ba? nani nipum nishi me ni da teki me turunga?
26
I rani inyin asesere.Wa da bira me nani wa koriko nani wa ori atikere a anime Ugomo Asere ma nyinza we imum yare. Ida teki nuwe inu gongong ba?
27
Aveni anyimo ashi me, barki ubasa abanga ame me ma dake ma kinki tiye tini ce nume?
28
Anime nyanini ya wuna izin ma aye Azesere aturunga? Irani iburi ini ja sa i uza sarki katuma,ida bara turunga ba.
29
Vat in anime in bo shi, sulaimanu me anyimo a ninonzo nume maa wuzi azo gusi iburi igino me ba.
30
Inka Asere ma wunna tikpe tini ja uzu, sa uzinu yata kani me nisizo areki uni atubo, uzu me sa adi wuzi shi ni udi zi aneni shi anu hem ucing?
31
A' anime kati i wuzi ma'aye igusi nyani ti di ri?' nani nyani ti di si? nani nyanini ti di soki?'
32
Anu zatu utarsa utize ta Asere cangi wa nyarsa vat adadu agino me aco ushi asesere ma rusa i nyara vat.
33
Re ni aje inu nyara u tigomo ta Asere nan iriba ubenki, vat adadu agino me adi nya shi.
34
Barki anime, kati i basa barki nisizo ba, in ani me nisizo ni di basa in nice nume, konde uya uwui umyinci ini jasi u nice ni uni.