¹ Sa Yeso ma ira nigura ni anu gbardang, ma hiri ma ka nyene a nihoho ma cukuno ni, anu u manza ume me wa ka kem me. ² Ma poki anyo ma gun we. ³ "Anu u rigirka wani shi ande sa wa zika ace awe anu u dira a bibe, tigomo ta Asere tuwe tini. ⁴ Anu u rigirka wani anu a tiyom,wa di kem unata u muriba. ⁵ Anu u rigirka wani anu u nata ace, we wani wa di kem unee. ⁶ Anu rigirka wani anu a mukumo nan anu a muriba mu benki, wa di tii. ⁷ Anu rigirka wani anu ugogoni, adi kunna ugogoni uwe. ⁸ Anu rigirka wani anu muriba mu lau, we wani wa di iri Asere. ⁹ Anu ringirka wani anu nyara u ticukum ti huma, we wani adi titi we a hana Asere. ¹⁰ Anu rigirka wani ande sa wa zinu zito barki muriba mu benki, tigomo ta Asere tuwe tini. ¹¹ Shi anu rigirka wani ande sa anabu wa zogizo wa kuri wa yomo shi, wa boo timumum ti buri ti macico ace a shi barki mi. ¹² Zunzukani nan tipuru tirum kang idi kem ukalum udandang asesere. Anime ani, anu waa yomi anu kurzuzo u tize ta Asere, sa wa eh aje ashi. ¹³ She wani muhu mu unee, ingi muhu ma harzina nan urunta u muni, adi wu aneni a kurzo urunta u munin? Barki sa ma curno me adi kponko ni anu wa pattali. ¹⁴ She, wani masaa mu unee, nipin me sa anuka nini abikonkoro ni zome nihunzi ba. ¹⁵ Nani anabu wa ke wa wu ura upitila wa impi in igira, anime waka tari a hira me sa udi nya masaa akura me vat. ¹⁶ Barki ani me ca masaa mashi me ma bezi bati anu wa iri katuma ka riri ka shi me wa nonzuko Ugomo Asere. ¹⁷ Kati i basa ma aye in visi u inko u tize ti anu kurzuzo utize ta Asere. Daki ma aye in cari ni ba, ma aye bati in myincikina tini. ¹⁸ Kadundure kani in boo shi asesere nan adizi adi mari, ada visa me ire imum cingiling anyimo u'inko utize ba, senke a myincika vat. ¹⁹ Barki ani me vat desa ma vete imum icingiling i inde anyimo u'inko utize adi kurzo me unu ucin anyimo a tigomo ta Asere. vat de sa ma tarsa ma kuri ma dungurka anu adi titi me unu udandang asesere. ²⁰ Sa in boo shi, ca muriba mu benki ushi me mu akki ma anu unyettike nan anu ubezi urusa, ida ribe shi anyimo a Tigomo ta Asesere ba ko cinginling. ²¹ Ya kunna uguna agu unu tuba, kati u hu uye ba, desa ma huna uye, ma di ribe uzitou hunguko u titui. ²² In bo shi, desa ma kunna iriba wan uhenu ma di gurna unu hunguko u titui; nan desa ma hira u henu ma zo me anyo a'ire imum ba, ma bari a han me anikubu; desa ma guna, "Hu ubabbana mani!' madi ribe ura wa Asere. ²³ Barki ani me ingi uhaka u nya usadiga wa ringi uhenu uwe me ma zin apuru abit nan hu. ²⁴ U inki usadiga me ahira azalang udenge Asere uka kem me i barka uku eh u nya usadiga me. ²⁵ Ingi uye ma hanan hu anikubu wuna mass ibarka unaa, ka ti uhem ibiki a nikubu ba. In daki ani me ba madi patti we nan unu barka utize, unu barka utize ma patti we nan udanduka a han hu akura anirere aka korso we. ²⁶ Kadundure in boo we, ada suso hu ba senke wa nya vat ikirfi me sa a tarsa we. ²⁷ Ya kunna a buki kati u muri nan vana u eh nani uruma uge sa ma zo me uwe ba. ²⁸ A anime in boo shi ingi unu ma ira vana u eh ma inko iriba, ma mara umura nan me. ²⁹ Ingi nije ni tari tinare tuwe me nidi wu we upilko ukari nini uvete ni. Iteki udiri are ahira anipum nuwe me unu guna areki we uraa. ³⁰ Ingi tari ti nare tuwe me tidi wu we upilko, yoro tini uvette ni. Iteki udiri are ahira a nipum nuwe me unu guna areki nini vat uraa. ³¹ A kuri abuki uguna, desa ma gido unee ume me a ma nya me unyettike uharzina. ³² I mum me sa in kuri in buu shi ine ini ingi unu ma gido unee ume me, inzo barki upilko wa mura nan desa inzo uruma ume mani ba, ma wunna me unaa u madini vat desa ma zika me, me nangi ma zi in madini. ³³ Ya kuri ya kunna a buki anu utuba unu guna, 'kati i wuzi itono i macico ba senke i ziki itono ishi me uhana Asere. ³⁴ Imum sa in kuri in buu shi, ine ini, kati iba toniko ba in aseseri, barki a hira a ticukum ti Ugomo Asere ani. ³⁵ Nani in unee barki sa une uni Ugomo Asere ma patala, nan Urushalima barki sa une uni nipin ni ugomo udang. ³⁶ Kati i toniko in ace ashi ba, barki sa daki ya bari i gamirka usubu u inde unice nishi nirum nani nibit ba. ³⁷ Imum sa irizi i buki ine ini 'e, e,' nani 'hm - hm.' ingi ya aka ani me inu ubur ini. ³⁸ Ya kunna a buki nije anyo a nije, nihini anyo a nihini. ³⁹ A anime mi boo shi kati inyare shi desa ma wunna shi aburi ba. Ingi uye ma vavvi we upo utari tinare u gamirka me ukure me ma vavvi. ⁴⁰ Ingi uye ma nyara ubura uwe udibi upati me ugebtu utozo uwe me. ⁴¹ Vat de sa ma wunna tanu ti umel u inde, hem i wuzi u ma mel mani mare. ⁴² Nya de sa ma iko we, kati i karti desa ma nyara ureme ahira ashi ba. ⁴³ Ya kunna a buki unu guna, 'hem desa ma hem in hu, u ga we uroni ishina iwe me.' ⁴⁴ Aname in gusan shi hem ni ande sa wa nyare shi, i wuzi an desa wa nyinza shi ijasi biringara. ⁴⁵ Bati i cukuno a hana Aco ushi me asesere. De sa ma wuza uwui u nya masaa ahira unu buri nan unu uhuma, ma tuzo unu ubenki nan unu uzatu ubenki ure. ⁴⁶ Nyanini idi kem ingi shi ya hem in ande sa wa hem shi cas? anu kabsa ikirfi i manyanga wa wuza cangi. ⁴⁷ Ingi i issizo si anu henu ushi wani cas, nyanini usass ushi na aye? ande sa wa zi anu bezi u rusa wa wuza ani me cangi? ⁴⁸ Barki ani me cukuno ni gbem kasi acoo ushi me wa sesere sa ma zi gbem.