¹ Yeso ma ziki Bitrus adumo atiye utasi, wan yakubu nan uhenu ume me Yuhana, ma ha in we anire nipana zantaran we isisin we. ² Ma gamirka uzina ume me aje awe. Muhenu mume me ma bezi kasi uwui, turunga time me tigamirka kasi masaa. ³ Abini me Musa nan Iliya wa suri wa zi tize nan me. ⁴ Bitrus ma gun in Yeso, "Ugomo Asere, ya wunna uri sa ti raa aba me. Inki u nyara, indi barka madanga ma taru- u inde uwe, u inde u Musa, a u inde u Iliya." ⁵ Sa ma ra anyimo atize abini me,niwiri ni masaa ni impi we, abini me, wa kunna nimyirang aniwiri me, ni gusa, ''Vana u hem um ma zigi me sa ma rumzam iriba. Kunna ni me.'' ⁶ Sa anu utarsa u Yeso wa kunna anime wa rizi adizi, biyau bi miki we wa rizi adizi in mu henu mu we me. ⁷ Yeso ma eh ma dari we, ma gu, ''Hirani kati kunna biyau ba. ⁸ Sa wa yeze ace da wa iri uye ba, wa iri Yeso mani cas. ⁹ Sa wazin unu tuno a nipo me, ba Yeso ma kpadi we, ma gu, "kati i buki uye tiro tige me ba, se vana unu ma hira amucau.'' ¹⁰ Anu tarsa ume me wa iki me, inu gusa, ''Nyanini ya wunna anu nyittike wa gusa gbas Iliya madi tubi u aye?'' ¹¹ Yeso ma kabirka ma gu, ''Ya cukunno kadure Iliya ma di eh ma kurzo vat timumum. ¹² Ine ini in boo shi, Iliya mamu aye, daki wa rusa me ba. A'ani me, wa wuzi me imum be sa wa ira ya wunna we. Una u inde me, vana unu ma di zitti atari tuwe me.'' ¹³ Abini me anu utasra ume me wa tinka mazin in tize anice ni Yuhana unu zorso anu. ¹⁴ Sa wa biki ahira a nigura me, ure unu ma eh ahira ame, ma tungono, aje ame, ma gu. ¹⁵ "Ugomo Asere, kunna ugogoni u vana um, ma zinu zitto kang in ma tirizi, ma harika u rizizzo ura nani myei. ¹⁶ Mi be ma aye we in me ahira anu manza uwe, iye daa wa rusa u huma in me ba." ¹⁷ Ba yeso ma kabirka we ma gu, "shi anu u zati u hem in tize ta Asere, anu u corno me ucara uge me, u hana umaya uni in zi nan shi ? U hana u maya uni indi tiri iriba in shi? Aye ni in me ahira am." ¹⁸ Ba yeso ma bubbuki we, ba ugbergene me ma suri anyimo ame, ba vana ma huma uganiya me. ¹⁹ Anu tarsa u yeso wa eh ahira me nihunzi wa gu, "Nyanini ya wunna ta siziki me u suso ume?" ²⁰ Yeso ma gun we, "Ucing u hem u shi uni wa wunna" kadundure kani in boo shi, gusi i zinu hem cing kasi bihoo bi u mustad, ida ke gu in nipana nigi me, hira aba me ukuri abirko!, nidi hiri ire imum ida game shi ba. ²¹ Usasana u gbergene u gino ma da susso me ba senke in biringara nan u canti anyo. ²² Sa waa da Ugalili, yeso ma gun in anu manza ume me, "Vana unu adi nya atari ti anu. ²³ Adi hu me, rono u taru adi hirza me." anu manza ume me muriba mu corno a we. ²⁴ Sa wa aye ukafarnahum ukasu ushekel ikirfi udenge Asere wa eh ahira a Bitrus wa gu, "Unu dugara ushi me ma nyinza ukasu ushekel ikirfi i manyanga? " ²⁵ Ma gu, "Ee", Sa Bitrus ma ribe anyimo akura, yeso ma tubi tize nan me ma gu, " Nyanini ubasa uwe me Saminu?" Agomo unee wa orso ikirfi i manyanga nan ikirfi u susso nan u ribize in turunga?" Ahira anu awe me nani ahira agenu?" ²⁶ Bitrus ma gu, "Ahira agenu," Yeso ma gun me, "wa kara anu awe me anyimo ubisa me. ²⁷ Barki kati ti wu anu ukabsa u ikirfi i manyanga me wa cari abanga, hana uraba udandang rika niwita, bicere sa wa tuba u meki me ingi wa poko anyo a bini udi iri bishekel u ziki u nya anu kabsa ikirfi i manyanga me im nan iwe."