¹ Mafarisawa nan ma Sadukiyawa wa eh ahira a yeso wa nyari ubatta ume, ca ma bezi we imum idandang sa idi bezi ubari ume me. ² Ma kabirka ma gun we, "Ingi asesere a vuna inu wunjoro, i gu, "Nisizo nisa rizi.' ³ Ingi a asana igu, kani ' Ahira adi curno me, asesere a vuna a kuri a mari nipn.' i irusa ugamirka u muhenu ma asesere, i taa shi ukurzo uzina uganiya me ba. ⁴ Uganiya uburi, anu a malim, wa nyara u inko u ira, ada bezi a we ba. Senke i yunana, abini me yeso ma dusa ma ceki we. ⁵ Sa anu manza ume me wa biki anire nikira, wa ringi wa pirke we uborodi. ⁶ Yeso ma gun we, "Hira ni, i wuzi seke inu yisti wa Farisawa nan ma sadukiyawa." ⁷ Anu manza ume me wa tubi u gamara me acece awe ba wa gu, "Nani uzatu u aye unu borodi me uni." ⁸ Yeso ma sa rusa in agino me ma gu, "Shi anu hem ucing, nyanini ya wunna i zi inu gamara me acece shi i gusa barki i zo shi in u borodi ba? ⁹ Ana me daki ya rusa nani i ringi magitu mu uborodi sa a nya anu madubu ucibi, mu gira mu hono muni ya ori? ¹⁰ nani magitu mu uborodi usanare sa anya madu ma nazi, mu gira muhono muni ya ori? ¹¹ Aneni ya wunna daki ya rusa uguna in boo abanga uborodi uni ba? Ma guna wuza ni seke inu yisti wa anu bezi urusa nan ma Sadukiyawa.'' ¹² A bini me anu manza me wa rusi ugunna wa wuzi seke in anu bezi urusa nan Masadukiya inzo uyisti me sa awuza uborodi ba. ¹³ Sa Yeso ma aye Ukaisariya Ufilibi, ma iki anu manza ume me, ma gu, "Aveni anu wa gusan vana unu?" ¹⁴ Wa gu me, "Aye wa gusa Yuhana unu batisma; aye wa gusi Iliya; ukasu wa gusi Irimiya, nani uye anyimo anu kurzuzo utize ta Asere." ¹⁵ Ma gun we, "Shi naa, mi aveni?" ¹⁶ Siman Bitrus ma kabirka ma gu, "Ho mani vana Asere unu ivai." ¹⁷ Yeso ma kabirka me ma gu, "Hu una re-aje mani, Siman usam u Yunana, unubu binama nan maye mani ma bezi we ba, Acoo um mani sa ma raa anyimo aseseri. ¹⁸ In kuri nbuu we hu Bitrus, mani, anipo nige me indi bari anu tarsa Asere. Ande sa iwono izo me unu bari awe ba. ¹⁹ In di nya we imum upoko u tigomo ta asesere, imum me sa ya tirza unee izin inu tira asesere, imum me sa ya sopo unee izin unu sopo asesere.'' ²⁰ Ba Yeso Ma hunguko anu tarsa ume me titui kati wa buki uye agi me mani vana Asere ba. ²¹ Abini me Yeso ma tubi ubezi anu tarsa ume me ya cukuno me gbas ma ha u Urushalima, maka zito sasas atari ti anu nan anu adandang akatuma ka Asere nan anu nyetike udungara u musa, a hume, rono uku taru mahiri. ²² Ba Bitrus ma titi me nikira ma gbarika me, ma gu, "Asere ma wu ini i wu piit nan hu, ani me ida kem me hu ba Ugomo Asere." ²³ Yeso ma gamirka ma gun Bitrus, "Hira abame unu buri Hu unu nyara irizi ini, ubasa timum ti anabu tini nzo ta Asere ba." ²⁴ Ba Yeso ma gun in anu tarsa ume me, "De sa ma nyara ma tarsum, ca manyari me nice nume ma ziki ugankirka ume me ma tarsum. ²⁵ Desa ma nyara ma buri ivai ime me ma di diri ini, vat disa ma dira ivai ime me barki mi ma di kem ini. ²⁶ Uya ure aje uni unu ma di kem ingi ma kem une vat ma dira ivai imeme? Nyanini unu ma di nya anyo ivai imeme? ²⁷ Vana unu ma di eh nan anu akadura kame me anyimo ani nonzo nai acoo ume me. Abini me ma di nya konde vi imum anyo akatuma kame. ²⁸ Kadundure in boo shi aye ashi me sa wa turi aba me wa da wono ba, wa di iri u aye uvana unu anyimo a tigomo time me."