¹ Abanname, anuhenu in dake in buki tize nan shi gusi ande sa wa rusa tize ti Asere, azo gusi ande sa wa raa anyimo apum ba, kasi ahana aneze anyimo Ugomo Asere. ² Ma hamza shi in mahene mani azo me ini imum yare i gangang ba, barki daki ya biki ahira me ba. ³ Barki aname i daza anyimo a nipum, inki is in a nan matara ma rani anyimo ashi me azo shi anu apum wani ba, ikuri ita shi uguna i haka tanu anabu? ⁴ Barki inki uye ma guna, "In raa amaru a Bulus" uye ma guna "In ra amaru Afollos" azo me ticukum ti nipum tini in zini ba? ⁵ Abanna me aveni mazi wa Apollos me? Arere wani ahira ade sa ya hem in me, de sa Asere a nya me katuma. ⁶ Mi ma wuza tibira, Afollos ma wuzi myei ni, Ugomo Asere ma wuna ini ya una. ⁷ Barki ani me una tibira nan unu wuza u myei ma zo me imum ba, Ugomo Asere mani ma uzan ini. ⁸ Una tibira wan unu u wuza u myei vat katuma ka weme ka inde kani, abanna me vat uwe me wa di kem ukalum, rep nan katuma ka meme. ⁹ Haru ahira age me aroni akatuma wani ku Ugomo Asere, shi uruu Ugomo Asere wani, ubarka Ugomo Asere. ¹⁰ Usuro uruma iriba be sa Asere anyam ucukuno una je uhira, ma tuba nitini me uye ma zinu tara aso azesere me, ca konde uya unu ma wuzi ma haki ma hiri aso me sa ma tara azesere me. ¹¹ Abanna, daki uye ma rani sa ma di wuzi katuma kage be sa kadi aki ka ge sa amu nuka, me mami Yeso Ugomo Asere. ¹² Aname inki uye matara aso azesere anitini ni azumo kyel- Kyel, nani azumo ariri nani apo aniza, nani utiti nani ukpe, nani uwui. ¹³ Katuma kam eme kadi pokino rono uwui ugino sa u ehze, adi guti nikara ni katuma sa konde avi ma wuza kani. ¹⁴ Vat de ba sa katuma kame me ka tonno ma di ri ukalum. ¹⁵ De be sa katuma kame me ura wa re kani ma di cukunon in tari ti hura me cangi ma di suri in matum anyimo ati uraa. ¹⁶ Ani ita shi uguna shi me udange Ugomo Asere uni i zi, abanna me bibe bi Ugomo Asere bira anyimo ashi me. ¹⁷ Inki uye ma cara udenge Asere, Asere adi cari me ni, abanna me udange ca Asere uzati u madini, ane ani shi izi. ¹⁸ Kati irangi acess ashi me, inki uye ushi me ma hira ma rusa abanga uganiya ugeme, cat ma cukuno unu u rusa abanga. ¹⁹ Barki urusa abanga unee uge me ibabana ini ahira Asere, sa nyettike "Ma mensi anu urusa abanga anyimo a malim mawe me." ²⁰ "U aye ana me, Ugomo Asere ma rusa ubasa abanga wa anu urusa imum ishalala ini. ²¹ Ane ani ukasu utira u bigiri u zoni ahira anu! barki vat imumum ishe ini. ²² Nani Bulus, nani Afollos, nani kefas nani unee, nani uvenke, nani iwono nani timum mum tikani me, nani timum tige sa ti ehze vat tishe tini. ²³ Ayene shi Ugomo Asere wani Ugomo Asere wa Asere mani.