85 ¹ ای خداوند، اَ سرزمینَ لطف بوکوده ای، تو بنی اسرائیلَ دوباره به اَیَ وَأگردَأنه ای. ² تی خودتِ قؤمِ گوناهانَ ببخشه ای و همۀ اوشَأنِ تقصیراتَ عَفو بوکودی. ³ خودتِ غصبِ جَه وَأگردستی و تی خشمِ آتشَ خاموشَ کودی. ⁴ ای اَمی نجاتِ خدا، اَمرَه دوباره خودتِ حضورِ جَه قبول بوکون و اَمرَه غیظ نوکون. ⁵ تو تا اَبد خَأیی اَمی دسِ جَه عصبانی بیبی؟ خودتِ خشمَ هَطو نسل در نسل خَأیی طول بدی؟ ⁶ آیا نخَأیی اَمرَه ایتَه تازه قوّت عطا بوکونی، تا اَمَأنی کی تی قؤمیم تی حضورِ جَه شادی بوکونیم؟ ⁷ خداوندا، خودتِ رحمتَ اَمرَه آشکارَ کون و تی نجاتَ اَمرَه عطا بوکون. ⁸ اونچی کی یَهوَه خدا گویه ایشتَأوم، چره کی اون خو قؤم و خو مقدسانَ وعدۀ صلح و سلامتی دِهِه تا دوباره خوشَأنِ جهالتِ طرف وَأنگردد. ⁹ اون کسانی یَ کی اونَ احترام نهدَه حتماً نجات دِهه تا عظمت و جلال دوباره اَمی سرزمینِ میَأن ساکن بیبه. ¹⁰ محبت و وفاداری همدیگرِ اَمرَه ملاقات کوند و عدالت و سلامتی همدیگرَ مأچی دهد. ¹¹ وفاداری زمینِ جَه رُشد کونه و عدالت جی آسمان زمینَ فأندره. ¹² خداوند اونچی کی خوب یَ اَمرَه فَأده و اَمی زمین فراوان محصول اَوره. ¹³ عدالت اونِ پِشِ جَه حرکت کونه و راهَ اونِ قدمانِ رِه آمادَه کونه.