7 ¹ ای می خدا یهوَه، مرَه نجات بدن جی کسانی دس کی مرَه تعقیب کوند. ² نوکونه اوشَأن شیرِ مَأنستَأن مرَه تیکه پارَه کوند و کسی نِئسِه کی مرَه نجات بده. ³ ای می خدا یهوَه، اگر گوناهی بوکوده دَأرم یا کسیَه ظُلم بوکودم، ⁴ یا اگر می دوستانَ خیانت بوکودِم یا بی علت و ناحق می دوشمنانِ مالَ غارت بوکوده دَأرم. ⁵ اونموقع وَأهَأل کی می دوشمنان مرَه تعقیب بوکوند و مرَه بیگیرد، وَأهَأل می زندگی یَ زمینِ رو پامالَ کوند و مرَه خاکِ اَمرَه یکسان کوند. ⁶ ای خداوند ویریز و غضب بوکون، می دوشمنانِ خشمِ وَسی ویریز، و می وَسی اوشَانِ جولو بِئس و عدالتَ برقرار بوکون. ⁷ همۀ قومَأنَ تی دؤر جمعَ کون و جی بوجُر اوشَأنِ رو داوری بوکون. ⁸ خداوند همۀ مردمانَ داوری کونه، خداوندا می دوروستکاری یَ بیدین و می داد فَأرس و مُطابقِ می راستی مرَه داوری بوکون. ⁹ ای خدایِ عادل کی همۀ مردمِ دیلِ و فکرِ جَه خبر دَأری، شریرانِ شرارتَ جی میَأن بوبور و دوروستکارانَ اُستوار بگردان. ¹⁰ می سپر خدایه، اون دیل پاکانَ نجاتِ دِهِه. ¹¹ خدا داوره عادله و همه روز شریرانَ محکوم کونه. ¹² اگر انسان توبه نوکونه، خدا خو شمشیرَ تیزَ کونه و خو کمانَ فَأکشِه و آمادَه کونه، ¹³ و اونِ رِه سلاح های مرگ آمادَه کوده و خو تیرانَ آتش زنه. ¹⁴ فَأندر اون کسی کی شرارت و فتنه جَه حامله بوبُسته، دوروغ زأئِه. ¹⁵ چاله کنه و اونَ گؤد کونه، ولی دکفه چاهی دورون کی خودش بِکده دَأره. ¹⁶ اونِ فتنه خودشِ سر رو وَأگرده، و اونِ ظُلم اونِ فرقِ رو بیجیر اَیِه. ¹⁷ خداوندَه اونِ عدالتِ رِه شُکر کونم، و خداوندِه مُتعالِ نامِ رِه سرود خَأنم.