36
1
گوناه آدمایِ شریرِ دیلِ میَأن لانه بوکوده، اوشَأن خدا جَه نترسد.
2
چون چنان خوشَأنِ جَه مطمئند کی فکر کوند خدا اوشَأنِ گوناهَ نیدینه و اوشَأنَ محکوم نوکونه.
3
همۀ اوشَأنِ گبان فریب و حیله یه. کارایِ دوروست و عاقلانه یَ ترکَ کوده دَأرد.
4
شبان خوشَأنِ رختخوابِ دورون بدی رِه نقشه دیچیند و راهِ نادورستِ میَأن اُستوارد و شرارتِ جَه اَشَأنَ بد نَأیه.
5
خداوندا، تی محبت تا آسمانان فَأرسه و تی وفاداری تا اَبران.
6
تی عدالت کوه هانِ مَأنستَأنه و تی اَحکام دریائانِ مَأنستَأن عمیقه، ای خداوند تویی کی انسانان و حیوانانَ نجات دهی.
7
ای خداوند، تی رحمت چقدر عظیمه. همۀ آدمیان تی بالانِ سایه جیر پناه گیرد.
8
اوشَأن تی خانه برکتِ جَه سِئرَ بود و تو خودتِ مهربانی چشمه جَه اوشَأنَ وَأخورانی.
9
چره کی چشمۀ حیات تی ورجَه نَهه و تی نورِ میَأنه کی اَمَأن روشنایی یَ دینیم.
10
همیشه تی رحمت اوشَأنی کی ترَه شناسدِ رِه باقی بمَأنه، و تی مهربانی و عدالت دوروستکارانِ اَمرَه همراه بیبه.
11
وَأنَأل کسانی کی مغرورد مرَه حمله بوکوند و یا شریرانِ دس مرَه فراری بده.
12
بیدین شروران چوطو بکفته دَأرد، اوشَأن جوری خاکِ رو بکفته دَأرد که نِتَأند ویریزد.