25 ¹ ای خداوند می جانَ تی طرف بلندَ کونم، ای خدا ترَه توکل دَأرم. ² پس وَأنَأل کی شرمنده بوبوم و می دوشمنان شادی بوکوند. ³ بله، هر کس ترَه اُمیدوار بیبه هیچموقع سرافکنده نیبه، ولی اوشَأنی کی بی دلیل خیانت کوند شرمنده بود. ⁴ ای خداوند، تی راهَ مرَه نیشان بدن و خودتِ اَحکامَ مرَه یاد بدن. ⁵ مرَه خودتِ حقیقتِ طرف رهبری بوکون و مرَه تعلیم بدن، چره کی تو می خدایِ نجاتی و من ترَه توکل دَأرم. ⁶ خداوندا، خودتِ لطف و رحمتِ ازلی یَ به یاد بأور. ⁷ می جوانی اَیامِ گوناهانَ به یاد نأور، بلکی ای خداوند، خودتِ رحمت و مهربانی وَسی فقط خودمَه به یاد بأور. ⁸ خداوند مهربان و عادله و هَنه وَسی راهِ راستَ گوناهکارانَ نیشان دِهه. ⁹ اون آدمایِ فروتنَ کارایِ دوروستِ طرف هدایت کونه و خو راهَ اوشَأنَ تعلیم دهه. ¹⁰ خداوندِه همۀ راهان رحمت و راستیه کسانی رِه کی اونِ اَحکامِ جَه ایطاعت کوند و اونِ عهد و پیمانَ دارد. ¹¹ ای خداوند، تی نامِ وَسی می گوناهانَ بیامرز، چره کی پیلدانه ید. ¹² اگر کسی خداترس بیبه، خدا راهِ راست اونَ نیشان دهه. ¹³ و اون همیشه خو کارانِ دورون موفق بِهه و اونِ زَأکأن زمینِ وارث بِهِد. ¹⁴ خداوند کسانی یَ اعتماد دَأره کی خداترسد و اونِ جَه ایطاعت کوند، خداوند خو عهدَ اوشَأنِ اَمرَه دوَده. ¹⁵ می چومَأن خداوندَ اُمید دوَسته دَأره و اونِ جَه انتظار کمک دَأرم، اون می پاهانَ دامِ جَه بیرون اَوره. ¹⁶ ای خداوند، مرَه مُلتفت بوبون و رَحم بوکون، چره کی تنها و درمانده بوبُسته دَأرم. ¹⁷ می دیل تنگی یان زیادَ بوسته، مرَه می مشکلاتِ جَه نجات بدن. ¹⁸ می غَمأن و می دردأنَ نظر تَأوَأد و همۀ می گوناهانَ پاکَ کون. ¹⁹ بیدین می دوشمنان چقدر زیادد و چقدر می جَه نفرت دَأرد. ²⁰ می جانَ حفظ بوکون و مرَه نجات بدن وَأنَأل شرمنده بوبوم، چره کی ترَه پناه بأورده دَأرم. ²¹ بیبِه کی می راستی و دوروستکاری می جَه محافظت بوکونه، چره کی ترَه توکل بوکودم. ²² ای خدا، بنی اسرائیلَ همۀ سختیانِ جَه نجات بدن.