13 ¹ خداوندا تا کی مرَه جی خاطر بوری؟ تا کی تی رویَ می جَه وَأگردَأنی؟ ² تا کِی فکر و خیال مرَه اذیت بوکونه و می دیل پور جی غم و غصه بیبه؟ تا کِی می دوشمن پیروزَ بِه؟ ³ ای یَهوه خدا جان، مرَه فَأندر و می دوعایَ مستجاب بوکون، وَأنَأل می زندگی نور خاموشَه بِه، مرَه جی مرگ نجات بدن. ⁴ نوکونه می دوشمنان بوگوید: بر علیه اون پیروزَ بوستیم. وَأنَأل می پریشانی جَه شادی بوکوند. ⁵ من تی رحمتَ توکل دَأرم، می دیل تی نجاتِ جَه شادی کونه. ⁶ خداوندِ رِه سرود خَأنم چره کی مرَه احسان بوکوده.