5 ¹ شومَأن ای ثروتمندان، اون مُصیبتایی کی شیمی سر اَیه وَسی گریه و زاری بوکونید. ² شیمی ثروت تباه بوبُسته و شیمی رختایِ گرانقیمتَ بید بوخورده دَأره. ³ شیمی طلا و نقره مُوران بزَه دَأره و اوشَأنِ مُوران بر علیه شومَأن گب زنه! و آتشِ مَأنستَأن شیمی بدنِ گوشتَ خوره، چره کی روزهایِ آخرِ میَأن ثروت جمعَ کوده اید. ⁴ هَسه اون کارگرانی حقوق کی شیمی مزارعِ میَأن دِرو بوکودد و شومَأن موزیانه اوشَأنَ فأندَه دَأرید بر علیه شومَأن فریاد زند، و کارگرانِ ناله یان تا به آسمان بوجُر بوشو دَأره و خداوندِ متعالِ گوش فَأرسه دَأره. ⁵ شومَأن زمینِ رو عیش و نوش بوکوده اید، و خودتَأنَ ایتَه گوسفندِ پروارِ مَأنستَأن روزِ قربانی رِه آماده کوده اید. ⁶ شومَأن ایتَه آدمِ بی گوناهَ کی هیچ مقاومتی نوکود محکوم بوکودید و بوکوشتید. ⁷ پس ای برأرأن، تا خداوندِ آمونِ موقع صبر بوکونید، چوطو کی ایتَه کشاورز، خو زمینِ بااَرزشِ محصولِ وَسی صبر کونه، و پائیزِ بارانْ، و بهارِ باران رأفأ ایسه. ⁸ پس شومَأنم صبر بوکونید و قوی بیبید، چون اَمی خداوندِ آمونِ موقع نزدیکه. ⁹ ای برأرأن، همدیگرِ جَه شکایت نوکونید، نوکونه شیمی رو هم حُکم بیبه، چون داورِ عادل خودش آمادۀ داوری یه. ¹⁰ ای برأرأن، اَنبیایی جَه کی به نامِ خداوند گب زَئدْ صبر و تحملَ یاد بیگیرید. ¹¹ اَمَأن کسانی کی صبور بودَ خوشبخت دَأنیم، شومَأن دربارۀ اَیوبِ صبر و تحمل بیشتَأوسته اید و دَأنید خداوند آخرسر اونِ رِه چی بوکود، چون خداوندِ مهربانی و بخشندگی حَد و اندازه نَئره. ¹² ولی ای برأرأن، مُهمتر جی همه چیز اَنه، قسم نوخورید، نه به آسمان و نه به زمین و نه به هیچ چیزِ دیگر، بلکی شیمی بله، بله بیبه، و شیمی نه، نه، نوکونه محکوم بیبید. ¹³ اگر کسی جی شومأن مشکل دَأره دوعا بوکونه، اگر کسی شاده، سرود پرستشی بخَأنه. ¹⁴ اگر کسی مریضه، کلیسا شیخانَ دخَأنید تا بأید اونِ رِه دوعا بوکوند، و اونِ پیشانی یَ روغن بمألد و خداوندِ جَه اونِ رِه شفا بخَأید. ¹⁵ دوعایِ باایمان مریضَ شفا دِهه و خداوندْ اونَ ویریزَأنه، و اگر گوناهی بوکوده بِه، آمرزیده بِهه. ¹⁶ پس همدیگرِ ورجَه خودتانِ گوناهانَ اعتراف بوکونید و همدیگرِ رِه دوعا بوکونید تا شفا پیدا کونید. دوعایِ آدمِ دوروستکار قدرتِ زیادِ اَمرَه عمل کونه. ¹⁷ ایلیا اینفر بو اَمی مَأنستَأن، ولی وختی همۀ وجودِ اَمرَه دوعا بوکود کی باران نَواره، سه سال و نیم باران نَوارست. ¹⁸ و بازم دوعا بوکودْ، و آسمانِ جَه باران بوارست و زمینْ محصول بأورد. ¹⁹ ای عزیزِ برأرأن، اگر کسی جی شومَأن حقیقتِ جَه مُنحرفَ بوسته و کسِ دیگری اونَ وَأگردَأنه، ²⁰ بدأنه هر کسی گوناهکاری یَ گومراهی جَه وَأگردَأنه، در حقیقت اونِ جانَ مرگِ جَه نجات بدَأه دَأره و باعث بوبُسته، اونِ گوناهانِ زیادْ، آمرزیده بیبه.