1 ¹ یعقوبْ، خدا و خداوندْ عیسایِ مسیحِ بنده، اسرائیلِ دوازده طایفه یَ کی جهانِ میَأن پراکنده یدْ سلام گویه. ² ای برأرأن، هر وخت اَنواع و اَقسامِ آزمایشانَ مُبتلا بوبُستید، شادی بوکونید. ³ چون دَأنید وختی شیمی ایمان اِمتحان بیبه، شیمی صبر و تَحمل ویشترَ بِه. ⁴ پس وَألید شیمی صبرْ ویشترَ بِه تا ایتَه انسانِ بالغ و کامل بیبید، و هیچ چیزَ مُحتاج نیبید. ⁵ اگر شیمی میَأن کسی حکمت نَئره، خدایی جَه بخَأیه کی همه چیزَ سخاوتمندی اَمرَه بخشه بی اَنکی سرزنش بوکونه، و حتماً اونَ عَطا بِهِه. ⁶ ولی اونْ وَأستی ایمانِ اَمرَه بخَأیه و خو فکرِ دورون شک ندَأره، چون هر کی شک کونه، دریا موجَ مَأنه کی بادِ اَمرَه اَطرف اوطرف شِه. ⁷ اَجور کسْ گومان نوکونه کی خدا جَه چیزی فأگیره. ⁸ چون آدمی ایسِه دودل، و هیچ موقع نتَأنه تصمیم قاطعی بیگیره. ⁹ مسیحیانی کی فقیرد نوَأستی خوشَأنَ حقیر بدَأند، بلکی وَأستی افتخار بوکوند چون خدا ورجَه سربلندد. ¹⁰ و مسیحیانی کی ثروتمندد هم افتخار بوکوند کی اَ دونیا مال و اَموالْ اوشَأنِ گنج نییه، چون اَ دونیا ثروتْ علفِ گولَ مَأنه کی زود جی میَأن شِه. ¹¹ هوطو کی وختی خورشید طلوع کونه خو گرمایِ سوزانِ اَمرَه علفَ خوشکَ کونه و اونِ گولْ فیوِه و اونِ قشنگی جی میَأن شِه، آدمِ ثروتمند هم خو کسب و کارِ دورون پژمُرده بِهه و جی میَأن شِه. ¹² خوش بحال کسی کی آزمایشانَ تحمل کونه، چون وختی امتحانانِ جَه سربلند بیرون بأمو، اون تاجِ حیاتَ کی خدا خو دوستدارانَ وعده بدَه دَأره فأگیره. ¹³ هیچ کس وختی وسوسه بِهِه نوگویه:«خدایه کی مرَه وسوسه کونه» چون خدا هیچ بدی جَه وسوسه نیبه و بدی جَه هم بدوره، پس کسی یَ وسوسه نوکونه کی بدی بوکونه. ¹⁴ وختی کسی وسوسه بِهِه، اونِ شَهوته کی اونَ فریب دِهه و به دام تَأوَأده. ¹⁵ شهوتْ کی حامله بِهِه گوناهْ زَأیه، و گوناه کی رُشد کونه مرگَ باعث بِه. ¹⁶ 16 ای عزیزِ برأرأنْ، گومراه نیبید. ¹⁷ خدا طرفِ جَه فقط بخشش هایِ خُب و کامل اَمره رِسِه، هون خدایی طرفِ جَه کی همۀ روشنائیانِ پئرِه و اونِ میَأن هیچ تغییرْ، و یا تیرگی ایی وجود نَئره. ¹⁸ اون اَطو اِراده بوکوده کی بواسطۀ اِنجیلِ پیغامْ، اَمرَه ایتَه تازه زندگی ببخشه تا اَمَأنْ اونِ مخلوقاتِ نوبر بیبیم. ¹⁹ پس ای عزیزِ برأرأن، توجه بدَأرید، هر کس وَأستی ویشتر گوش بده، کمتر گب بزنه و دِئرْ عصبانی بیبه. ²⁰ چون عصبانیت وَأنأله اوطویی کی خدا خَأیه اَمَأن خوب و دوروستکاربیبیم. ²¹ پس هر جور نجاست و هرجور شرارتَ خودتَأنِ جَه دورَه کونید، و فروتنی اَمرَه خدا کلامَ کی شیمی دیلانِ میَأن بکاشته بوبُسته یَ قبول بوکونید، چون اَ کلامْ، قدرت دَأره شیمی جانَ نجات بده. ²² شومَأن وَأستی کلامَ عمل بوکونید، نه اَنکی فقط گوش بدید، پس خودتَأنَ گول نزنید. ²³ چون کسی کی کلامَ گوش کونه ولی اونَ عمل نوکونه، کسی یَ مَأنه کی آینه دورون فَأندره ²⁴ و خو قیافه یَ دینه، ولی تا ایبچه آینه جولو جَه دوره بِه، خو قیافه یَ جی خاطربوره. ²⁵ ولی اونی کی شریعتِ کاملْ، کی شریعتِ آزادی ایسه یَ چوم بودوخته دَأره، فقط اونَ فأندره و توجه دَأره، و اَطو نییه کی گوش بوکونه و جی خاطر بوبوره، بلکی کلامَ عمل کونه، و خداوندْ اونِ کارانِ میَأن اونَ برکت دِهه. ²⁶ اونی کی خورَه مسیحی دَأنه ولی نتَأنه خو زبانِ جولویَ بیگیره، خورَه گول زنه، اونِ دینداری باطله. ²⁷ دینداری پاک و بی عیب، اَمی پئرْ خدا نظرِ جَه اَنه کی مُصیبتِ موقع یتیمان و بیوه زنأکانَ توجه بوکنیم و اوشَأنِ دسَ بیگیریم و خودمانَ اَ دونیا آلودگی یانِ جَه دور بدَأریم.