2 ⁷ ولی خدا لوطَ کی مردی عادل بو و شریرانِ رفتارِ جَه به تنگ بأمو بو، نجات بدَه. ⁸ چون اون مردِ عادلْ کی اوشَأنِ میَأن زندگی کوده، اونچی جَه کی هر روزه دِئه و ایشتَأوسته، اونِ دیلِ پاک بدرد اَمویه و عذاب کشه یه. ⁹ پس دینیم کی خدا دَأنه چوطو وَأستی عادلانَ وسوسه یان و آزمایشانِ جَه دور بدَأره، و چوطو وَأستی شریرانَ عذاب بده تا روزِ داوری فَأرسه. ¹⁰ مخصوصاً اوشَأنی کی خوشَأنِ شهوتانِ زشت و ناپاکِ دونبال شُد، و خداوندِ قدرتَ حقیر دَأند. اَ معلمینِ دوروغی جوری گستاخ و مغرور بوبُسته دَأرد کی حتی بزرگانَ توهین کوند. ¹¹ در حالی کی فرشته یانِ آسمانی کی اَ معلمینِ دوروغی جَه، هم قویترد و هم اقتدارِ ویشتری دَأرد، وختی اَ بزرگانِ محکومیتَ خداوندِ ورجَه اعلام کوند، هیچموقع اوشَأنَ توهین نوکوند. ¹² اَ معلمین، حیواناتِ وَحشی و بیشعوریَ مَأند کی فقط خوشَأنِ غریزه دونبال شُد، و دونیا بأمو دَأرد کی شکار بوبود و هلاکَ بود. اَشَأنْ، هر چیَه کی نفهمد مسخره کوند، پس هون حیواناتِ وَحشی مَأنستَأن جی میَأن شُد. ¹³ بله، اون بدی ایی کی بوکوددِ عوضْ، بدی دیند، اوشَأنِ تفریح کودَأنْ، شادی و خوشگذرانیهایِ گوناه آلوده، اونم روزِ روشنِ دورونْ، اوشَأنْ لکۀ ننگ و رسوایی ید، و خوشَأنَ دوروستکار نیشان دهد تا شیمی ضیافتهایِ کلیسایی دورون شرکت بوکوند، و از اَنکی شمرَه گول بزَه دَأرد خوشحالی کوند. ¹⁴ هر زنی یَ نظرِ بد دَأرد و گوناهکاری جَه سِئرَ نوبود، اَ مَلعونانْ زنأکأنی کی اِراده نَئردَ به دام تَأوأدد، اوشَأنِ دیلانْ پور جی طمع و حسادته، اوشَأنْ خدا لعنتِ جیر ایسَد. ¹⁵ راستِ راهَ گومَه کوده دَأرد و بَلعامْ، بِعورِ پسرِ مَأنستَأن گومراهَ بوستد. بَلعام هم، پولی کی ناراستی جَه بدس اَورده یَ دوس دَأشته. ¹⁶ ولی وختی بَلعامِ اُلاغْ انسانِ مَأنستَأن به حرف بأمو و اونَ سرزنش بوکود، اونْ نبی خو دیوانگی جَه دس بکشه. ¹⁷ اَن معلمینِ دوروغی، چشمه هایِ آبی یَ مَأند کی خوشکَ بوستد، و یا اَبری یَ مَأند کی هر بادی مرَه هر طرف شِه و کسی رِه نفعی نَئره، تاریکی غلیظِ جهنمْ اوشَأنِ رأفأ ایسَه. ¹⁸ چون خوشَأنِ گوناهانَ افتخار کوند و حرفهایِ باطل زند، و اوشَأنی کی تازه زندگی گوناه آلودِ جَه فرار بوکوده دَأردَ به دام تَأوَأددْ و شهوتِ جسمِ جَه استفاده کوندْ و اوشَأنَ گومراهْ کوند. ¹⁹ اوشَأن گوید؛ هر کی نجات پیدا کوده دَأره آزاده هر کاری دوس دَأره بوکونه، و اونِ هیچکار گوناه به حیساب نَأیه! در حالی کی خودشانم آزاد نییِد و فسادِ برده ید، چون هر آدمی اون چیزی برده یه کی اونِ رو مُسلط بوبُسته. ²⁰ چون هر وخت کسی خداوندْ و اَمی نجات دهنده عیسی مسیحِ شناختِ اَمرَه، اَ دونیا گوناهانِ جَه آزادَ بِه، ولی ایبارِ دیگر اون آلودگی یانَ اَسیر بیبه، ²¹ اوشَأنِ رِه بهتر بو کی از اول راهِ عدالتَ نشناختد، تا اَنکی اونَ بشناسد و بازن احکامِ مقدسی کی اوشَأنَ فَأدَه بوبُسته یَ پوشتَ کوند. ²² اونچی کی اوشَأنِ رِه اِتفاق دکفته نیشان دِهه کی اَ مثال راسته کی گویه:«سگْ، خو اِستفراغ طرف وَأگرده، و بوشوسته خوکْ، دوباره لَجنِ دورون غَلْطْ زنه»