¹ Anga gelang kaku gonong serang gonong nang nomi usanang, suka navera nang ing una nomi Tuhan gomimi mate. ² Anga gelang nang abagang miama Euodia oli miama Sintikhe ing musti apbetal Tuhan gomimi. ³ Ya, tatabi nang abagang, nakaku serang gonong ba apbetal tomi anu, nama hial anga gonong ing malekang iyomi gijahi ging nala tatabi karajang miama Injil gadang, oli Klemens oli ga kaku gonong ging karajang anu, oli ging ebeng ba gine nama miama buku apbetal mi hula mega. ⁴ Suka enavera ae Tuhan gomimi. Nang tang ubagang magala, suka e navera! ⁵ Anga hise umi bala anga nama ajimi uling geli. ⁶ Ing ake pbaliling baruati mia iljoa u mega ganang. Ibase ae il karanu gomimi iyomi anga miama Lahatala ubalelang ae i sambajang oli bagang gomi oli sukur tarimakasi mi. ⁷ Nua hama ba ae Lahatala mia adu anga ajimi i manggarati anga ga tanggoa oli iyomi diganukung ae Yesus Kristus gomimi. ⁸ Anga gelang, nakaku gonong serang gonong ilba ajimi gadang, ilba ajimi geg jia geg mega, ilba ajimolo, ilba iyomi hamolang, ilba ajimi nua, oli ilba nama tajaning, oli il ajimi anu kelang, ilba ajimi ping musti tajaning, ajimi ing musti uganukung. ⁹ Il ajimi ba ing gagola, mia, uhalela, oli nendi ga uling ing ajimi ukarajang, anga se Lahatala ga nua hama anga iyala topuni. PAULUS TERIMAKASI MIAMA NAPARASAJA MOE FILIPI MI ¹⁰ Nang tatabi suka e navera ae Tuhan Yesus gomimi mula vede adi, gaumate mise ingbale miama maginang e ang oli ningdi niuling. Tatabi adu jia ing ipikir uganokung ing miama nio pbei ani ibase i oras ka u banaga. ¹¹ Nening ba nang miama iyala tutuk adi ka bola nang kurang ganasing gomimi banaga, ibase neng di nadiri adi uajar tatabani hi neng di ake kurang ganasing il karanu-karanu gomimi. ¹² Neng di geli se bola il tatabani anga ba kurang gananasing, oli neng di geli se bola apbetal tatabani amba apbetal kurang ganasing bana. Pi biasa gomi oli pipbana garupa tatabani gomimi, apbetal kurang ganasing gomimi anga nang uka paing geli jema, mau petal kubal guni naga ba oli malapal gomi, naga ba apbetal seng gomi oli apbetal seng naga gomimi. ¹³ Il karanu anga nang bisa ukarajang e ga ujali gomi oli Geng ba kuat e dagiri anga miama meneng. ¹⁴ Ani ibase, ing nua hama gene miama nalahama jema oli tamadi angadi ing miama nala paul. ¹⁵ Ingdi ilokang geli se bola, jemaat Filipi anga ba halomang-halomang Injil mi maso, nang Makedonia uhapba Jemaat joaka gitamadi anga miama galapalu ba naga, ging bola il mia teteng gomi naga ba ilba mia maginang gomimi, ingba ilokang. ¹⁶ Oli, naga ba moe Tesalonika ga bandar mi, na kurang na erang gomi ing il mia na panatu ka mianu kelang banaga. ¹⁷ Anga gelang, nang ka i moling anga ba gola banaga, ibase nang gahi ba pbal anga ba ga untu pbal mia enang. ¹⁸ Nang ga ubajar u tarima jema, oli u lebe. Nang il ajipi gie dapa jema angaba nang iyohi, panatu Epafroditus goa. a pembriam anga pbenang se mang manyiama enas, il nua hama anga ba, miama oli Lahatala gomi ga sanang. ¹⁹ Lahatala gang il ajimi mia ala hama miama ga kavasa gadang miama Yesus Kristus ga nua hama gomi. ²⁰ Lahatala ga hamolang oli Pimang ga nua hama sampe gaumate mi. Amin ²¹ Ni vomung miama nama nua hamolang giala hama Yesus Kristus gomimi. Ni vomung adi di miama nama ba ning iman anu anga ba gie adimi di giala hama. ²² Nama nua hamolang ajimi vomung miama enang, ging ba nama ging pau miama Kaisar ga emi balenta. ²³ Tuhan Yesus ga barakah oli roh mia ping tang hela. Amin.