¹ Vaka chizhango cange, omo motuli na luthseleletho olu, lingeni tu litokethe etu vavenia ku vilinge vije vika tulingitha tujeneke kujela mu mivila yetu na Sipilitu. Tushuameni kujela mu kuvuila Kalunga liova. ² Tuhaneniko lukalo! Kotua vihithilile naumo uahi. Kotua vulumuine nkala ou indi tu lingililemo umo. ³ Keti muku mi mihitha njihandekela evi. Mukonda Nja handeka laja nguange uli mu zhimbunge zhetu, linga tuthse kumo na kuyoya kumo. ⁴ Ange njili na kuthselela kua kama muli yove, lalo Nja kushangala. Nji nashulu na kuzhembezheka. Nji na shulilila na kujolela nambe muvitanga vietu. ⁵ Omo mutuezhile ku Masendonia, mivila yetu koyakele na kuhuima. Vunohani, vatu shatiyalele mungila nkala na vitanga hanja na liova mukati. ⁶ Vuno Kalunga, uje a kazhembazheka vaka kuzheya, ua tuzhembezhekele na kuheta kua Titu. Keti lika na kuheta kuendi ua tuzhembezhekele Kalunga. ⁷ Viakele lalo na kuzhembezheka kuje Titu kuatambuile kuli yove. Ua tulekele via ngozhi yove ya kupulakana, vuthiua vuove, na chishoti chove kuliange. Keho nja jolelele lalo muakama. ⁸ Nambe omu mathona ange a kunehelelele vuthiua, kunji vi liveye. Vuno nja vi liveyele monja muene nguavo mathona ange ana kunehela vuthiwa, nambe omo ha kanthsimbu lika kakandende. ⁹ Ngeci njijolela, keti mukonda moua jujukile, vuno mukonda vuthiua vuove vuna kunehe kulitavela. Uahitile mu vuthiua vua vu Kalunga, mukemo ku ua yandele muamundende omo lietu. ¹⁰ Mukonda vuthiua vua vu Kalunga vuka nehethaho kulitavela echi chikaneha kuovoka nakuliveya chahi. Vuthiwa vuamu lifuti, vukevuo co, vukanehethethaho kuthsa. ¹¹ Tala kuvuaha vika oku kulikanyameka kouna uana muliyove muvuthiua ovu vua vu Kalunga. Kuvuaha vika kulikanyameka kuakele muliove ulekele nguavo ove koua vulumuine.Vukama vuakupua kuiko uapuile vukalu, liova liove, kuliveyela kuove, njangi yove , na na kuyongola kumona hakale kuliuvuathana kuove! Munkala vioshe una liketha ove vavenia mu kukala nguavo mulonga uahi muvilinge evi. ¹² Nambe ngoco nja thonene mathona kuli yove, kunja thonene muomu lia vaka kupanga via kuviha ndi vaje vayandela mu vuvihe, vunoni linga vipanga viove viakuvuaha kulietu linga vavi thsimanethe kuli yove mumesho a Kalunga. ¹³ Muomu lievi tuna likolethela. Mu kuvuezhelelako ku kuzhembezheka kuetu vavenia, tujolela muakama mukonda lia kuvuahelela kua Titu, mukonda Sipilitu yendi ya tenguluka omo lieni. ¹⁴ Nja lishangalele kuliendi kutuala kulieni, kova Nji tambuile. Nambe kamandende, ngue lika vioshe viotua handeka mu kukala vuchili, kulishangala kuetu kutuala kuliove kuli Titu china lisholola kukala vuchili. ¹⁵ Chizhango cendi kuli yove chakama omo avuluka kuononoka kueni, vati momua mutambuile na liova na kujaja. ¹⁶ Nji shangala mukonda njina na luthselelo luakushula muli yeni.