¹ Kuruku rwa mfa da Ehudu, mbunga yaIsraeli shimpe nka ayiruwana ovyo vyakaliro vyavidona mushikenga mantjo gha Karunga. ² Karunga avaghulita mumaghoko gha Jabinihompa wa Kanani ogho apangeliro muHazara. Mukughona wavakavita vendi kwakalire walidina Sisera, ghuye kwatungiremuHarosheti Hagoyimu. ³ Mbunga yaIsraeli ayitakumini kwaKarunga mukuyivatera, mukonda Sisera kwakalire naturukara twavita twavikugho mafere ntane nakuhepeka mbunga yaIsraeli nankondo mwaka dimurongo mbiri. ⁴ Weno Debora, mupumbwi wamukamali (mukamali wa Lapidoti), akara muyenditi wavipangura muIsraeli ruvede ro. ⁵ Ghuye karuwanenanga nakushungira munda yashitondo shangone sha Debora shapakatji kaRama na Beteli mushirongo shandundu sha Efurayimu, ano mbunga yaIsraeli nko kayiyendanga kukwendi mukukashayikitapo dimutangu davo. ⁶ Atumu Baraka mona-rume wa Abinoyamu wamuKadeshi muNafutali. Amutantere, ''Karunga, Karunga waIsraeli , kuna kukurawira, 'Yenda kundundu yaTabora, nakupitura vakafumu mayovi murongo vavakaNafutali na vaZebuluni. ⁷ Ame ngani yita Sisera, mukughona wavakavita vaJabini, akugwanekere nove kumukuro waKishoni, naturukara twendi twavita na vakavita vendi, ano ame ngani kupa lifundo kukwendi.''' ⁸ Baraka amutantere, ''Ntjene tuyende kumwe, name ame kuni yenda, ngoli ntjeneshi kapi ghuyenda name, name kapi niyenda.'' ⁹ Debora aghamba, ''Ame kuvhura niyende nove. Ngoli, mundjira oyo unakayenda kapi ghuyipitititra mumfumwa yoye, mokondashi Karunga kwaghulita Sisera mulighoko lyamukamali.'' Makura Debora ashapuka nakuyenda na Baraka kuKadeshi. ¹⁰ Baraka ayita vaZebuluni na vaNafutali vavakafumu mukuyakupakerera paKadeshi. Vakafumu mayovi murongo avamukwama, na Debora ayendi kumwe naye. ¹¹ Makura Heberi (wamuKeni) atundumo muvaKeni -ghuye kwakalire ruvharo rwa Hobabu (tamweyi ya Mosesa) - akatomeka tende yendi pepi naghunyandi muZayananimu pepi naKadeshi. ¹² Opo vamutantilire Sisera ashi Baraka mona-rume waAbinoyamu anapiti kundundu yaTabora, ¹³ Sisera ayita navantje vakaturukara twavita vendi, turukara twavita twavikugho mafere ntane, navakavita navantje ovo akalire navo, kutundilira Harosheti Hagoyimu vayende kumukuro waKishoni. ¹⁴ Debora atantere Baraka, ''Yenda! mukondashi lino liyuva Karunga alikupo mukufunda Sisera. Kapishi Karunga ana kukupititiro ndi?'' Makura Baraka aghurumuka kutundilika kundundu yaTabora navakafumu mayovi murongo ovo vamukwamino. ¹⁵ Karunga apiyaganita Sisera navakaturukara twavita na vakavita vendi navantje kughutwe warufuro. Ano Sisera avatukamo mukarukara kendi kavita nakuputangana parupadi. ¹⁶ Ngoli Baraka atjida turukara twavita na vakavita dogoro kuHarosheti Hagoyimu, ngoli vakavita navantje va Sisera kwavadipaghire kurufuro rwautwe, kwato mukafumu aparukiro. ¹⁷ Ngoli Sisera aduka parupadi kutende yaJayeli, mukamali waHeberi wamuKeni, mukondashi kwakalirepo mpora pakatji kaJabine hompa waHazori na lira lya Heberi wamuKeni. ¹⁸ Jayeli arupuka mukuwana Sisera nakumutantera, ''Vyuka, ntilyande, vyuka kuno kwande washatjira.'' Makura avyuka kukwendi nakuyangena mutende yendi,nakumufika na ngugho. ¹⁹ Sisera atantere Jayeli, ''Nakanderere mpeko tumema ninwe, mukondashi ame linota.'' Ghuye apaturura kuntjako yashipapa yamashini nakumupa mashini anwe, nakumufikanka waro. ²⁰ Amutantere, ''Yimana palivero lya tende. Ntjeneshi ayepo muntu umwe nakukupura, 'Muntu mo mu ndi?', ghamba shi, 'Mwato'.'' ²¹ Makura Jayeli (mukamali waHeberi) aghupu ntugho yatendenashidjamito avikara mulighoko lyendi nakuyenda mukaholya-holya kukwendi, mukondashi ghuye kwakalire turo twakufa nakukenga, amupampara ntugho yatende kuruha rwamutwe wendi dogoro ayikatjimpama mulivhu, kumwe nakufa. ²² Ano Baraka kwatjidire Sisera, Jayeli arupuka avagwanekere naye nakumutantera, ''Yiya, nikakuneghede mukafumu ogho ghuna shana.'' Makura avangene mo naye, nakuwana Sisera anarara anafu, na ntugho yatende kuruha rwamutwe wendi. ²³ Ano liyuva olyo Karunga kwafundire Jabini, hompa waKanani, kumeho yambunga yaIsraeli. ²⁴ Nkondo da mbunga yaIsraeli kwanenipire unene mukurwita Jabini hompa wa Kanani, dogoro avamuhanaura po.