¹ Makura Karunga ashuvu dimuhoko do dishetekange Israeli, mukuvatwenyaura navantje muIsraeli ovo vadiro kumona kehe vino vita varwanine muKanani. ² (Kwaviruwanine vino mukushonga shibofa shavita kumapupi gha dimuhokodadipe davaIsraeli ovo vadiliro kuviyiva shimpe.) ³ Odino ndo dimuhoko: vaHompa vatano vavaFilisite, vaKanani navantje, vaSidoni, navaHevi ovo vatungiro mundundu yaLibanoni, kutundilira kundundu ya Bala Herimoni dogoro kuyapita Hamati. ⁴ Odino dimuhoko kwadishure ashi mukonda yaKarunga mukushetikitako Israeli, mukuyuvha ntjene ngava limburukwa kudimuragho odo atapire kuvakurona vavo mwa Mosesa. ⁵ Makura mbunga yaIsraeli ayitungu mukatji kavaKanani, vaHeti, vaAmori, vaPerezi, vaHevi, navaJebusi. ⁶ Vana kadona vavo avavaghupu mukukara vakamali vavo, navana kadona vavo vavene kuvatapakuvana vavo vavakafumu, nakukarera vaKarunga vavo. ⁷ Mbunga yaIsraeli ayiruwana ovyo vyakaliro vyavidona mushikenga mantjo gha Karunga nakuvhurama Karunga waKarunga wavo. Avatongamene Bala na Asherahasi. ⁸ Makura ugara waKarunga aghu hwama kuvaIsraeli, nakuvaghulita mumaghoko gha Kushani-Rishatayimu hompa waAramu Naharayimu. Mbunga yaIsraeli ayikarere Kushani-Rishatayimu mwaka ntantatu. ⁹ Opo yatakumine mbunga yaIsraeli kwaKarunga, Karunga atulitapo muntu umwe ogho ayiro mukuyavatera mbunga yaIsraeli, ogho avayogholiro: Otiniyeli mona rume waKenazi (mughunya Kalebu wamukafumu). ¹⁰ Mpepo yaKarunga ayimunkondopeke, mukupangura Israeli nakurupuka ayende kuvita. Karunga amupa lifundo kwaKushani-Rishatayimu hompa waAramu. Lighoko lya Otiniyeli alifundu Kushani-Rishatayimu. ¹¹ Shirongo ashikara mumpora mwaka dimurongo ne. Makura Otiniyeli mona rume waKenazi afu. ¹² Kutunda opo, VaIsraeli shimpe nka avaruwana ovyo vyakaliro vyavidona mushikenga mantjo gha Karunga, Karunga atapa nkondo kwa Egilori hompa waMowabu mukufunda nankondo da dinene kupitakana vaIsraeli. ¹³ Egiloni akupakerere navaAmoni navaAmaleki mukuyenda nakukafunda vaIsraeli, nakughupa viweka vyamushitata shavikereva. ¹⁴ Mbunga yaIsraeli ayikarere Egiloni hompawaMowabu mwaka murongo na ntantatu. ¹⁵ Opo yatakumine mbunga yaIsraeli kwa Karunga, Karunga atulitapo muntu umwe wakuvhura kuvavatera, Ehudu mona-rume waGera, muBenyameni, mukafumu warumontjo. Mbunga yaIsraeli ayimutumu, naushwi wa vifutwa, kwa Egiloni hompa wa Mowabu. ¹⁶ Ehudu kwakaruwanine mwene rufuro rwakutwepa kuviri rwa kubite yimwe munaure, arutura kuntji yashuma shendi palitungi lyarulyo. ¹⁷ Atapa ushwi wa vifutwa kwa hompa Egiloni wa Mowabu (ngoli Egiloni kwakaliremukafumu wakuneta unene). ¹⁸ Kuruku Ehudu apa atapire ushwi wa vifutwa, atundupo nava ovo vaghushimbiro. ¹⁹ Ngoli Ehudu mweneko, makura tupu ana kuyatika palivango olyo lya lifano lyakutjokora olyo varuwana pepi naGiligali, apiruka nakuvyuka, nakughamba, ''Nakora nambudi yamukaholya-holya kukoye, Hompa wande.'' Egiloni aghamba, ''Mwena!'' Makura navantje ovo kavamukarerango avatundumo munkondwa. ²⁰ Ehudu aya kukwendi. Hompa kwashungilire panaumwendi, pantjendi mukukutendeka kunkondwa yakuwiru. Ehudu aghamba, ''Nakara nambudi yoye yinatundo kwaKarunga.'' Hompa ashapuka mushipundi shendi. ²¹ Ehudu atura lighoko lyendi lyarumontjo nakughupa rufuro kulitungi lya rulyo, nakurutwa murutu rwa hompa. Shikundo sharufuro kwapwelilire mo mumwendi shikwame ghutwepi. ²² Ghutjomonoki warufuro aghuyarupuka kumughongo wendi ano maghadi aghafiki po, ghuye Ehudu kapi arughupiremo rufuro mulipumba lyendi. ²³ Makura Ehudu arupuka pandje mughutara wandjugho nakughara mavero gha nkondwa yakuwiru kuruku yendi nakughapata. ²⁴ Kuruku ghuye Ehudu anapiti, vakareli vahompa avaya, avakenge mavero gha kunkondwa yakuwiru vanaghapata, makura avaghayara, ''Tunahuguvara ashi kuna kukuvatera mwene mukukutendeka kunkondwa yakuwiru.'' ²⁵ Maghayadaro ghavo aghanenepa dogoro avakuyuvhu lincenuno lyaviruwana vyavo opo adilire shimpe hompa kugharura mavero gha kunkondwa yakuwiru. Makura avaghupu ntjapi nakupaturura, na muhona wavo anarara, ana were parughorongwa, ana fu. ²⁶ Vavo shimpe vakareli kunakutaterera, vanatetuka ashi nke varuwana, Ehudu ashenduka nakuyapitira pepi nalivango olyo lyakaliro mafano gha vaKarunga vavipempa vakushonga, makura ashendukiri kuSeyira. ²⁷ Opo ayatikire, afudu mbendo mushirongo shandundu sha Efurayimu. Makura mbunga yaIsraeli ayighurumuka kumwe naye kutunda kundundu, nakuvapititira. ²⁸ Avatantere, ''Nkwamenu, mukondashi Karunga kunakuyenda akafunde vanankore venu, vaMowabu.'' Avamukwama nakukakwata liyenga lya Jorodani lyakurutira kuvaMowabu, nakudira kuvapulitira kehe uno mukuruta mukuro. ²⁹ Ndoro ruvede avadipagha vakafumu vaMowabu vakutika paviha mayovi murongo, navantje vakafumu vankondo nauyivi. Kwato umwe ashendukiro. ³⁰ Ano liyuva lyo Mowabu akara mulipangero lyankondo davaIsraeli, nashirongo ashipwiyumuka namwaka ntantatu. ³¹ Kutunda kwaEhudu mupanguli akwaminoko kwakalire Shamugari mona-rume waAnati ogho adipayiro vakafumu 600 vavafilisiti nashitondo sha ngora. Ghuye naye kwayogholire Israeli mughudito.