¹ Ici ecebo cakwa Yawe, ica ishile kuli Hosia umwana mwaume wakwa Beri minshiku shakwa Usia, Yotamu, Ahasi na Hesekia, imfumu shaku Yuda, namunshiku shakwa Yeroboamu umwana mwaume wakwa Yoashi, imfumu yaku Israeli. ² Ilyo Yawe alandile pakutampa ukupitila kuli Hosia, asosele kuli ena ati, "kabiye, bula palobe umukashi cilende. Akakwata abana abo abakatumbuka mulibucilende bwakwe. Pantu icalo nacikwata bucilende apakalamba kukulaba Yawe." ³ Eico Hosia aile nokupa Gomeri umwana mwanakashi wakwa Dibulaimu, kabili ali imita kabili afyele umwana umwaume. ⁴ Yawe asosele kuli Hosia ati, "umwite ishina Yesireli, nalabika impela kubufumu bwa nganda yakwa Israeli. ⁵ Cala citika pabushiku ubo nkonaula ifita fyabena Israeli mumupoka poka wa Yesireli." ⁶ Gomeri aimitia nakabili no kufyala umwana mwanakashi. Elyo Yawe asosele kuli Hosia ati, "umwite ishina lyakwe ati Lo-Ruhama, pantu nshabe noluse munganda yakwa Israeli, ukuti ndebelela lyonse. ⁷ Lelo nkaba noluse pabanganda yakwa Yuda, kabili nkabapususha palwandi, Yawe Lesa wabo. Nshakabapusushe kufita, ulupanga, ubulwi, bakabalwe, nangu abaume bapali bakabalwe. ⁸ Nomba panuma Gomeri asimwine Lo-Ruhama, alimite nokufyala umwana mwaume naumbi. ⁹ Elyo Yawe asosele ati, "umwite ishina lyakwe ati Lo-Ami, pantu tamuli bantu bandi, kabili nshili Lesa wenu. ¹⁰ Lelo impendwa yabantu bakwa Israeli bakaba ngo mucanga wamululamba lwabemba, ulunga pimwa nangu ukupendwa. Cikaba ifyo casoselwe kuli bena ati, 'tamuli bantu bandi,' cikasoswa kuli bena ati, 'muli bantu bakwa Lesa uwamweo.' ¹¹ Abantu bakwa Yuda nabantu bakwa Israeli bakakolongana pamo. Bakasonta intungulushi imo palwabo abene, kabili bakaninika ukufuma mu calo, pantu ubushiku bwakwa Yesireli bukaba ubukalamba.