¹ Paulo na Timote, ababomfi bakwa Kristu Yesu, ku bantu bonse abamushilo bakwa Lesa muli Kristu abali ku Filipi, naba cilolo na bashimapepo mukalamba na bakapyunga. ² Ukusenaminwa kube na mwebo no mutende ukufuma kuli Lesa Shifwe na shikulu Yesu Kristu. ³ Ndatotela Lesa wandi inshita yonse nakwibukisha, ⁴ lyonse, mwipepo lyandi lyonse ilya mwebo bonse, kulenga ipepo lyandi no kusekelela ⁵ Pa mulandu wa bwampano mumbila insuma ukufuma pa bushiku bwakutendeka ukufika na nomba. ⁶ Nebo ndishininkishe palwa ici cintu, ukwebati, uyo uwatampile umulimo usuma muli mwebo fikatwalilila no kucipwililisha mpaka no bushiku bwakwa Yesu Kristu. ⁷ Cili fye bwino kuli nebo ukumfwa muli uyu musango pali mwebo bonse pantu mwaliba mu mutima wandi. Mwebo bonse mwalikumako kuli nebo mu kusenaminwa konse mubufungwa bwandi na mukuipokolola kabili namukushinkisha kwa mbila insuma. ⁸ Pantu Lesa ni kambone wandi, ifyo inkomifuluka mwe bonse mukutemwa kwakwa kristu Yesu. ⁹ Eco ili epepo lyandi: Ukwebati ukutemwa kwenu kufulileko sana kabili sana mukwishiba na mukumfwikisha ¹⁰ Pakwebati mukasuminishe ico icakuwamisha, kabili mwingaba abacishinka abakubula umulandu mpaka no bushiku bwakwa Kristu, ¹¹ abaisulamo ifisabo fyabulungami ifyo ifishila muli Yesu Kristu ku bukata na malumbo yakwa Lesa. ¹² Nomba nkofwaya mwebo mwishibe, bamunyina, ukwebati ifyacitika kuli nebo fyalintwala pa ntanshi ku mbila insuma. ¹³ Napali ici, iminyololo yandi muli Krisitu yalishile kubuta ukupita muli bakalinda bamusumba na kumuntufye onse. ¹⁴ Ababwananyina abengi, balikwete icishininkisho muli Shikulu pa mulandu wa minyololo yandi, kabili balikwete ukushipa mukulanda icebo ukwakubullo mwenso. ¹⁵ Bambi mu cine bakobila Kristu pa mulandu wakalumwa ne fikansa, kabili bambi nabo mu ubusuma. ¹⁶ Aba bena bacicitila mukutemwa, pakwishiba ati ndibikilwe kuno pa kucingilila imbila insuma. ¹⁷ Nomba abakale balikubila Kristu mukuitemwa abene, temucishinka. Bena bakotontonkanya ukwebati bakonundilapo amacushi ulo ndi mu minyololo. ¹⁸ Nomba nindo? Nomba nico munshila yonse - ciibe mumibele nangu mucishinka - Kristu akobilwa, namulici nkosekelela. Ee, kabili nkasekelela, ¹⁹ pantu ndishibile ukwebati ici cikaba mukukakulwa kwandi ukupitila mu mapepo yenu nobwafwilisho bwa mupashi wakwa Yesu Kristu. ²⁰ Umwabelo ukucankwa kwa kulolela kwandi ne subilo ilyo ntakalengwe insoni iyoo, lelo mukushipa, nomba kubati ni lyonse, Kristu akasumbulwa mu mubili wandi, nangu ku mweo nangu mu mfwa. ²¹ Pantu nebo kuba no mweo ni Kristu kabili ukufwa bunonshi. ²² Lelo umfwa nkoikala muli bu mubili, ekwebati fisabo fya kubomba kuli nebo. Lelo nindo iyakusala? Ntaishiba. ²³ Pantu ndi uwakutitikishiwa pakati ka fibili. Ukukabila kwandi kuya no kuba na Kristu, ico eca wama sana ukucila, ²⁴ lelo ukwikalilila muli bumubili kwawamishapo pa mulandu wenu. ²⁵ Kabili pakushininkisha ici, ndishibile ukwebati nkekala no kutwalilila nemwe bonse, ico ni mukuya kwenu pa ntanshi kabili mukusekelela mu citetekelo, ²⁶ pakwebati muli nebo mukwate ukulundapo imilandu yakuitakisha muli Kristu Yesu ulo nkesa kuli mwebo nakabili. ²⁷ Isungeni mwebene munshila iyalingwa iya imbila insuma yakwa Kristu, pakwebati nangu naisa kumimona nangu ntaliko, nkomfwe palwa mwebo, ukwebati mukoiminina abakukosa mu mupashi umo, no mutima umo ukuculila capamo ku cicetekelo cambila insuma. ²⁸ Mwitina mu nshila iyili yonse kuli abo abali balwani benu. Ici cishibilo kuli bena palwa konaulwa kwabo, lelo palwepusukilo lyenu - ici cakufuma kuli Lesa. ²⁹ Pantu calipelwa kuli mwebo apalutu pa mulandu wakwa Kristu tepakumusuminafye kweka, lelo nakabili ukucula pamulandu wakwe, ³⁰ pakukwata ulukakala lumo lwine ulo mwamwene muli nebo, nomba mukoumfwa kuli nebo.