¹ Eco umfwa Lesa alimibushishe pamo na Kristu, fwayeni ifya ku mulu, uko Kristu aikala ku kuboko kwa kulyo ukwa kwa Lesa. ² Tontonkanyeni pa fintu fya ku mulu, te pa fintu fya pe sonde. ³ Pantu mwebo mwalifwa no mweo wenu walifiswa na Kristu muli Lesa. ⁴ Ulo Kristu akamoneka, uyo uwaba mweo wenu, elo nemwe mukamoneka na ena mu bukata. ⁵ Eco mulenge fifwe,kanshi, ifilundwa fya pano nse - ubulalelale, ukukowela, ulwinso, ulunkumbwa, no mufimbila, ifili ekupepa utulubi. ⁶ NI muli ifi fintu umo ubukali bwa kwa Lesa bukoishila pa bana batabela. Pamo uku belengwa, ni pali ifi fintu ukuti ubukali bwa kwa Lesa bukoishila. ⁷ Ni muli ifi fintu nemwe limo mwaendelemo ulo mwaikele muli fyena. ⁸ Lelo nomba filekeni ukuficita ifi fyonse - icipyu, ubukali, umufulo, imiponto, elo ne fyebo fyakubipa ukufuma mukanwa kenu. ⁹ Mwila kubepa umo ku mu nankwe, apo mwalifula ubuntu bwa ku kale ne micitile ya buko, ¹⁰ kabili mwalifwala umuntu mupya uuko lengwa umupya mu kwishiba ukulingana ne cimpashanya ca uyo kalenga wa ciko, ¹¹ muli iyo ta muli umwina Hela nangu umu Yuda, uwasembululwa nangu uutasembululwa, umusenshi, umuSukuti, umusha, umuntungwa, lelo Kristu ni fyonse kabili ali muli bonse. ¹² Eco, nga abasalwa ba kwa Lesa, aba mushilo kabili abatemwikwa, fwaleni umutima wa nkumbu, icongwe, ubupete, no kutekanya. ¹³ Belelaleni uluse umo no munakwe umfwa umo aba na kafimbo. Beleleni uluse umo no munankwe. Umfwa umo nakwata akantu ka kuilishinyapo ku munankwe, eleleni mu musango umo wine na Shikulu alimwelela. ¹⁴ No ku cila pali ifi fyonse, kweteni ukutemwa, ekulakila ifi fyonse ku kwitabana. ¹⁵ lekeni umutende wa kwa Kristu uteke mu mitima yenu. Ni muli uyo mutende uyo mwaitilwemo mu mubili umo. Kabili mube aba kutotela. ¹⁶ Lekeni icebo cakwa Kristu cikale muli mwe ica cindamisha, ku kusambilisha no ku konkomesha umo no munankwe mu mano yonse, ku kwimba isha malumbo, ne nyimbo sha kutasha ne nimbo sha mu mupashi no kutotela mu mitima yenu kuli Lesa. ¹⁷ Na conse ico mu kocita mu cebo nangu mukucita, citeni mwi shina lya kwa Shikulu Yesu. Ukutotela Lesa Tata ukupitila muli ena. ¹⁸ Mwe bakashi nakileni ku balume benu, ngefyo calinga muli Shikulu. ¹⁹ Mwe balume, temweni abakashi benu, kabili mwiba ne cilubo kuli bena. ²⁰ Mwe bana, nakileni abafyashi benu mu fintu fyonse, ici cakutemuna kuli Shikulu. ²¹ Mwe ba shibo, mwi lakukalifya abana benu, pakwebati ta ba nenwike. ²² Mwe basha, nakileni ba shikulu benu ku buntunse mu fintu fyonse, te ku kubomba kwa pa menso, nga abantu - abakotemuna, lelo mu cishinka ca ku mitima. Tineni Shikulu. ²³ Conse ico mukobomba, bombeni umutima onse nga kuli Shikulu kabili awe te kubantu. ²⁴ Mube aba ishiba muli no ku pokelela ukufuma kuli Shikulu icilambu ca bupyani. Ni Shikulu Kristu mu bombela. ²⁵ Pantu onse ukobifya akopokelela icilambu ku co abifisheko, takwakabe umusobololo.