¹ Eco nebo nkofwaya mwebo mwishibe ukulwisha kwandi ukukalamba ukonakwete palwa mwebo, palwa abo aba ku Laodikea, na bonse fye abatambona ku mubili ne cinso. ² Nkobomba ukwebati imitima yabo ikoseleshiwe ku kuletwa pamo mu kutemwa na mu bunonshi bwa cishininkisho cakufikapo ica kwiluka, na mu bwishibilo bwa ca nkama ca kwa Lesa, uuli ni, Kristu. ³ Muli ena mwa fiswa fyonse ifyuma fya kushilimuka no bwishibilo. ⁴ Nkolande fi mu kwebati kwiba nangu umo uwa kumifishanya na mashiwi ya bucenjeshi. ⁵ Nangu nebo ntali nemwe ku mubili, lelo ndi nemwe mu mupashi. Nkosekelelela ukumona imbela yenu iya bune kabili no bukose bwenu muli Kristu. ⁶ Ifyo mwa pokelele Kristu Yesu Shikulu, mulekwenda muli ena. ⁷ Mube abakulimbwa muli ena, mube abakukulwa pali ena, mube abakushimpwa mu citetekelo ngefyo mwa sambilishiwe, kabili abafunguluka mukupela amatotelo. ⁸ Moneni ukwebati tapali nangu umo uukomibeleleka ukupitila mu mano no longolo lwa fye, umwabela icishilano ca bantu, ukusangwilwa ku micitile ya mipashi ya pamo calo, no kukana sangwilwa kuli Kristu. ⁹ Ico ni muli ena emo umwisulo wa bu Lesa bonse waikala muli bu mubili. ¹⁰ Mwebo mulisushiwa muli ena, uwaba umutwe pali bu kateka bonse na maka. ¹¹ Muli ena mwebo mwalisembulwilwe no kusembululwa ukushicitwa ku minwe ya buntunse mukufumya umubili wa buntu, lelo ukusembululwa kwa kwa Kristu. ¹² Mwebo mwalishikilwe nankwe mu lubatisho, kabili mwebo mwalibushiwe ukupitila mu kutetekela mu maka ya kwa Lesa, uwa mubushishe ukufuma ku bakufwa. ¹³ Ulo mwebo mwali abakufwa mu mampulu yenu na mu kukana sembululwa ku mibili yenu, alimilengele ukuba aba mweo pamo nankwe kabili alitwelele amampulu yesu yonse. ¹⁴ Alifutile ifya lembwa fya misha ifyaiminine mukushanina ifwebo ne fipope fyafiko. Alifisendele no kufitanika pa capindama. ¹⁵ Alipokolwele amaka ya fya bu kateka ne fya maka ya nsambu kabili alifilengele ukuba ifya kutamba pa lwalala, ukuficinfisha ku capindama. ¹⁶ Eco kanshi, mwilakuleka muntu nangu umo amipingule mu kulya nangu mu kunwa, nangu pa mutebeto nangu umweshi upya, nangu pa nshiku she Sabata. ¹⁷ Ifi fyaba fishingwa fya fintu fikoisa, lelo icituntulu cine ni Kristu. ¹⁸ Mwilakuleka muntu nangu umo uukofwaya ukuicefya no ku shinshimuna bamalaika amipingule mukulufya icilambu cenu. Uyo muntu engila mu fintu ifyo amona kabili alaitumika apabulu umulandu mu matontonkanyo wakwe aya ku mubili. ¹⁹ Ena tekatilila ku mutwe, Ico ukufuma ku mutwe eko umubili onse ukufikafye na pakulundwako no kusuminkaniswa ku mfyufyu ne mishipa filaya no kwikatana pamo; filakula no ku kula ukupelwa na Lesa. ²⁰ Umfwa mwalifwile pamo na Kristu ku micitile ya mipashi ya pano calo, nindo mukoikalila nga baikatwa ku calo: ²¹ "Mwila kwikata, nangu ku sonda, nangu ku kumya"? ²² Fyonse fi fintu fikaloba ulo fokobomba, ukulingana na mafunde elo na masambilisho ya buntunse. ²³ Ifi fikomo filikwete imimonekele ya mano, pakuba ne mipepele ya kuipangila no kuicefya na maka mu kukanya ulunkumbwa lwa mubili. Lelo tafyafwa iyo fipakisha fye umubili.