¹ Ngayi SimoniPetelo, moombu mpe ntoma na Yesu Klisto, epayi na bango bazui likabo na kondima lolenge moko na biso kati na boyengebene na Nzambe na biso mpe Mobikisi Yesu Klisto. ² Ngolu ezala na bino mpe kimia eyikana kati na boyebi na Nzambe mpe na Yesu, Mokonzi na biso. ³ Nguya na ye NZambe esili kopesa biso biloko yonso na bomoyi mpe na kosambela Nzambe, mpo na boyebi oyo abiangi biso na kembo mpe na malamu na ye mpenza. ⁴ Na yango atieli biso bilaka minene mpe na motuya na ntina ete, na bilaka yango bozua likabo na bino na lolenge na Nzambe, mpe bokima libebi lizali kati na mokili mpona mposa mabe. ⁵ Na ntina oyo mpenza , botia etingia yonso mpona komizwela molende kati na kondima na bino mpe mayele kati na molende. ⁶ Mpe komipekisa kati na boyebi, mpe mpiko kati na komipekisa, mpe kosambela Nzambe kati na mpiko. ⁷ Boboto epayi na ba ndeko na kobondela Nzambe mpe bolingo kati na boboto epayi na ndeko. ⁸ Zambi soko makambo oyo mazali kati na bino mpe mazali koyikama, makobatela bino ete bozala pamba te mpe bozanga kobota mbuma te, mpo na boyebi na Mokonzi na biso Yesu Klisto ⁹ Mpo ete moto oyo azangi makambo yango akufi miso, akomonaka biloko mosika polele te, asili kobosana ete apetwaki na masumu na ye ya kala. ¹⁰ Na bongo bandeko , eleki malamu ete bozala na etingia mpo na kolendisa ebiangeli mpe epimeli na bino. Soko bokosalaka bongo, bokotuta mabaku soko moko te. ¹¹ Zambi nzela na koyingela kati na bokonzi na sek,o na Mokonzi na biso, mobikisi Yesu Klisto ekozwama mpo na bino na malamu mpenza. ¹² Na bongo nako tika te kokanisela bino makambo oyo, uta bisili koyeba yango mpe kolendisama na makambo na solo masili kokomela bino. ¹³ Na banzi ete, ebongi na ngayi kolamukisa bino kati na makanisi mayino ezali ngayi kati na ema oyo. ¹⁴ Nayebi ete, kala mingi te, nakotika hema oyo na nzoto lokola Mokonzi Yesu alakisaki ngayi. ¹⁵ Nako mekana etingia ete ntango yonso nsima na kolongwa na ngayi bokokoka kokanisa makambo oyo lisusu. ¹⁶ Zambi wana wana eyebisaki biso bino mpo na nguya na komonana na Mokonzi na biso Yesu Klisto, tobilaki masese malobami na mayele te, kasi lokola esili biso komona nkembo na ye monene na miso na biso mpenza. ¹⁷ Mpo ete azui lokumu mpe nkembo na maboko na Nzaambe Tata mpe mongongo ebimi mpona ye na nkembo monene monene ete: «Oyo mwana na ngayi, molingami na ngayi, nakosepelaka na ye mingi.» ¹⁸ Toyokaki mongongo yango kobima na likolo, wana ezalaki biso na ye kuna na ngomba na bule. ¹⁹ Tozali kolendisa liloba lisakolami na makasi koleka. Bokosala malamu kotiya mitema na yango, lokola mwinda oyo ezali kopela na esika molili, kino ekotama ntongo mpe moto na nton go ekobima na mitema na bino. ²⁰ Boyeba liboso na yonso ete, bisakweli na makomi ebimaki na makanisi na bato mpenza te. ²¹ Mpo esakweli moko te ebimaki naposa ya moto, kasi bato bawuti na Nzambe balobi wana ezalaki bango kopusana na Molimo Mosantu.