¹ Six zuc stăngc bux zeen Yê-su nyăngz munh, êu nănh stiz seenz zuc mungv hungh pâu, muif dlih bênc nyâuđ ayx gongx dlayc. ² Yâuc zuc bux nănh stiz năngx gâyf coong woac huđ peo munh, năngx gâyf cloon munh tinyh nzengz. six zuc ayx dlênc stymz tinyh songc yămz. ³ Cah đangc noib pănh oongx max mungv woac, âyz stym nyâuđ nyâyh ayx mauh stâyv sangc muif hungđ numđ nyađ nyăngz jau, ayx huđ dlayc ănz munh, zuc munh hănđ, yâuc lanh hănđ lanh. ⁴ Six pănh nyăngz Njâuv Zâu Tênb-Hungh songđ phunz nănh stiz ayx gongx stăngz munh woax zanyf, ⁵ Nănh njâuv pănh six max zâyf wâyc pănh ayx laiv hungđ gongx nyăngz dlayc. six wâyc nănh hâuđ lênh pănh, yâuc nongc singx lingh stav phunz pănh tuz dlăngc, coi wănc stengb stâyv săngb nyăngz taih.* ⁶ Tênb-Hungh yâuc nongc pănh nyăngz Njâuv Zâu Yê-su taox singx-lingh đungx nzongf phunz pănh. ⁷ Songđ phunz pănh wâyc nănh nyăngz pôz hayh tuz cloon Tênb-Hungh hopđ nyâuđ yâuc tuz stipx stâyv quâyx nyăngz mengc, six pănh mungc oix tuz stipx nyăngz mengc. ⁸ Nâyx zâux woac six seenz nyăngz, yaz oix nongc mâyh coong năngx manyf nâyx đomc dlayc phunz zeen Tênb-Hungh nyăngz munh joomz nyâuđ ayx gongx dlayc, wâyc zuc nâyx đomc gongx nyăngz dlayc hayh stăngc tuz songx munh naih săngh nongc. ⁹ Six zuc pyeenv goib năngx gâyf nzengz cloon cah lof noib stâyv stipx stongz zez tâuh oongx nzongf nyăngz dlayc. yaz bux nyâuh yâuc max tuz zengv đoouc lif gâyf, wâyc zuc nâyx đomc dlayc max săngh nongc, max hayh stăngc tuz laiv lanh munh. ¹⁰ Laiv lanh sêu munh lunc, six zuc bux nănh iz pôz hâyđ, năngx staix max mungv six năngx gâyf ninyh stătx nănh stiz. ¹¹ Wâyc zuc mâyh pâyz tuz nâyx hungđ munh six nyâuđ huđ, nănh stiz ayx longđ nyăngz stoif cănh tingc nănh stiz. ¹² Yaz paiđ A-tê-ma, mah six Ti-zi-cơ, ninyh mâyh woa, mâyh six zuc lêpc nănh stiz ninyh Ni-cô-bô-li, cloon yaz căpx dlonf yămz woa, wâyc zuc yaz six yămz woa quaix tongz dlih gungh. ¹³ Six zuc nongc noic stăngc pob gâyf munh Sê-na, cloon A-bô-lô, max phunz nănh stiz seetb jau yêmv laiv hungđ. ¹⁴ Six zuc bux pănh zeen nyăngz munh zuc nongc săngx huđ hođ ayx gongx nyăngz dlayc, wâyc phunz nănh stiz max yêmv muif noib sămv nongc nyăngz dlayc, max oix phunz nănh stiz yămz stâyv sangc ayx max seetb laiv hungđ. ¹⁵ Cloon yaz yămz nây nyăngz songx yâuf pez yâuc zaoh tayđ mâyh, buz yămz nây zuyz woac zaoh tayđ stăngz buz woax đomc jeenđ. jođ Tênb-Hungh sađ pôz phunz cloon nyâuh songx yâuf pez yămz.