¹ Mâyh nzaox munh, six zuc nzaox naih coonz tay gongx nyăngz gâyf. ² Six zuc nzaox nyăngv tauh njangb nyăngz munh nzif, ayx dlayc payh tuz munh tanv, yâuc zuc nzaox nănh stiz hayh zeen gongx seenz stymz, stăngz munh yâuc naih noic. ³ Lauf tinyh năngđ, six zuc nzaox woax đomc nyăngv tauh côx nyăngz munh bôf, ayx dlayc payh tuz zeen Tênb-Hungh nyăngz munh, năngx gâyf coong huđ, yâuc năngx gâyf blaz tyu, nănh six zuc nzaox êu munh ayx gongx dlayc, ⁴ Năngđ naz nănh songđ hayh nzaox tuz munh bongf, hayh stăngz hâuđ lênh langh cloon sây. ⁵ Naih tongb manyh bokc dlih langh, yâuc vaic lif jax toongx, wâyc max phunz munh năngx naih woac coong peo Tênb-Hungh nyăngz gâyf. ⁶ Mâyh yâuc zuc nzaox tanyb nênh nyăngz munh naih tongb manyh. ⁷ Ayx muif hungđ gongx nyăngz dlayc nongc ayx jix caox phunz nănh stiz hođ, nzaox gâyf nyăngz săngx huđ, yâuc zuc naih stymz nzaox. ⁸ Six zuc nongc naih coonz tay nyăngz woac taih nzaox, wâyc phunz cloon mâyh tinyh nzengz woax đomc munh songđ zuc nyayz, wâyc phunz nănh stiz lov max naih woac taih pib pănh. ⁹ Six zuc nzaox ayx nâuh woax đomc munh yămz muif hungđ dlayc ayx phunz nănh stiz nyăngz Zâu numđ nyađ, năngx gâyf taux nzeetx. ¹⁰ Yâuc năngx gâyf nymc Zâu nyăngz nyanh, ayx muif hungđ dlayc, six zuc pungx stymz ayx phunz munh pâuh Zâu Tênb-Hungh nyăngz gâyf. ¹¹ Tênb-Hungh nyăngz pôz songđ hynđ yangh seetb taih phunz nyeenh mănh tuz Njâuv. ¹² Nâyx hungđ pôz, six nzaox êu pănh quanyf yămz bamh canz âyz stymz nyâuđ max oix lêpc Tênb-Hungh woax đomc yeetx stong, yămz nâyx nzêuh gungh đi songđ ayx tuz pengh stymz lêpc gongx Tênb-Hungh yâuc hayh cun stynb stayđ. ¹³ Năngđ nâyx ayx zu tauv pănh naih tync mungc nyăngz Zâu Tênb-Hungh cloon Njâuv Zâu Yê-su yămz woa gwăngz-eng cah njaf nzac taih. ¹⁴ Nănh wâyc pănh sez nănh nyăngz mengc tayc suc pănh phunb đangz lauf gâyh đutb huđ nyăngz dlayc, nănh yâuc đaox pănh dlăngc taih pênx nănh nyăngz munh, pănh songđ joomz nyâuđ ayx muif hungđ gongx dlayc. ¹⁵ Mâyh six nongc nâyx đomc woac nzaox munh, nongc nzuf mâyh nyăngz lanyf nzaox munh, yâuc max nongc phunz laiv lanh phătc mâyh stam.