¹ Yaz mangc songđ phătc Pa-jiz yungh stâuđ woa Si-ôn zoongz, Cloon nănh yămz woax đomc munh, six 144. 000 lanh munh, naih nănh nyăngz bux, cloon nănh Pha nyăngz bux staox ănz woa pyây nyah. ² Yaz mungv numđ naih stingb buib woa gungh stymz cayx năngđ womz lub buib, cayx năngđ bah côngz haoh, yaz mungv yâuc numđ naih stingb buib cayx năngđ munh quetb lanyh njămh. ³ Stiz ayx ah gwoanc săngb nzungz yămz Hungh tync cah đangc, yămz woa pyâyz tauh stengb hauđ, cloon munh côx nyăngz cah đangc, seetb nzuf 144. 000 lanh munh tuz suc Njâuv gâyh nib mync, max naih laiv lanh hayh saz tuz woax gwoanc nzungz. ⁴ Nâyx đomc munh baox njif tuz đăngb, max zengx naih wâyx cloon munh nzif, pa-jiz yungh ninyh laiv, nănh stiz yâuc lêpc đangz, woa six 144. 000 lanh munh tuz suc, yâuc Njâuv stiz gâyh bamh canz nongc ayx stanyb lanyh congx phunz Zâu Tênb-Hungh, cloon pa-jiz yungh. ⁵ nănh stiz nyăngz nzeetx max zengx naih coong woac puv maoh, stiz max naih săngh nzêmh. ⁶ Yaz phătc zetz lanh Stynz-munh đayv woa đamx gungh, nzâyz banc stâyv cuđ jeenx ninyh lănv bux muif stingx nyeenh mănh, muif nomz Côkz, Coong muif hungđ woac. ⁷ Nănh hamv lub coong, “seenz zuc cumh nzav Tênb-Hungh, wâyc zuc tauv săngx huđ, nănh stămđ bamh munh, nyâuh zuc canyx bongc zâyx gungh nib, zâyx coiđ, zâyx cloon nof womz sting woax tauh." ⁸ Năngx naih tah nyâyc lanh Stynz-munh ninyh lêpc tah yeetx tauh cah đangz yâuc hamv Coong, “Ba-bi-lôn stengv lub lex, plupc lakb! pjukc lakb zef gôh, nănh stiz ayx phunz muif nomz Côkz munh hopb pongz lauh tyu, âyz gâyf six Tênb-Hungh hănđ pongz lauh nyăngz tyu." ⁹ Tah stamz lanh Stynz-munh ninyh lêpc cah đangc woa iz lanh stynz-munh, nănh hamv coong, “Laiv lanh canyx paix stengb hiv, cloon nănh nyăngz miuc hanyh, yâuc tăpb yeenx ănz pyây nyah, cloon puf woax đomc munh. ¹⁰ Stiz six zuc hopb Tênb-Hungh zămđ hănđ stoif nyăngz tyu jetz ănz woa zan. laiv lanh hopb songđ munz năngđ wuôngh tâuf pu nănh yămz woa đăngb zengh Stynz-munh cloon pa-jiz yungh cah đangc. ¹¹ Wâyb nănh stiz woax lâuh tâuf sâuv đynz đynz têx staox gungh ninyh tauv banc stâyv banc đaic, laiv lanh congx paix stengb hiv, cloon nănh nyăngz miuc hanyh, năngx cloon woax đomc tuz tăpb yeenx ănz pyây nyah cloon puf nyăngz munh, stiz six zuc tanyđ dlauc wâyb quaix noib quaix munf max naih laiv dlih tuz sec. ¹² Nây six Tênb-Hungh woac bux êu zeen nănh nyăngz munh, seenz zuc nongc naih stymz tanyđ, yâuc zuc ayx âyz nănh nyăngz lanyf, naih seenz stymz yămz Zâu Yê-su. ¹³ Yaz numđ naih stingb yămz woa Gungh stymz, “mâyh zuc ja nâyx đomc woac; "poou phunz laiv lanh tăng nây staox ninyh, tayc six tayc yămz Zâu cah njaf; "Singx-lingh tauz; coong; "zâyf gôh, "phunz stiz tuz sec hitb conv, stiz ayx congz lekc cănh lêpc nănh stiz nzuf. ¹⁴ Yaz mangc phătc naih ah lanh cayx năngđ munh nâyx, nănh zâyh ah tungđ vănx pec nzac taih, pyây đongx sămz banyh tênb moouc, nănh puf nzauf bah tôz njayf njemh. ¹⁵ Zâyf naih pitc tauh Stynz-munh Tăng woa congx Hungh tync seetb taih, nănh hamv bux zâyh vănx woax lanh Stynz-munh Coong, “nongc mâyh nyăngz bah tôz quănf bamh canz jengz zunb gôh, wâyc zuc tauv bamh canz jengz zunb bengc săngx huđ suđ nzof. ¹⁶ Stâyv woa vănx cah zâyc woax tauh, songđ quanyf nănh bah tôz nzac nib taih, bamh canz nib tâyc songđ zuc quănf sâub nzuf. ¹⁷ Zâyf naih pitc tauh Stynz-munh tăng woa congx Hungh tync seetb taih, nănh nzauf ah zungz bah tôz njayc. ¹⁸ Zâyf Naih pitc lanh Stynz-munh, naih quênh cun tâuf woax lanh, yămz woa congx Hungh tync seetb taih coong bux woax lanh Stynz-munh, zoz mâyh lâyc bah tôz quănf nib mync tungh cuđ pyâu gôh, wâyc tauv săngx huđ tungh cuđ pyâu suđ nzof." ¹⁹ Stynz-munh songđ quanyf nănh bah tôz nzac nib taih, sâub dlonf bamh canz tungh cuđ pyâu ănz nzac Tênb-Hungh siv totc nyăngz mayx ngatc. ²⁰ Woax nomz Ngatc pyâu mayx tongđ, ănz woa singh cungh ngwoaic, naih samđ njâuc seetb taih, samđ yămx bengc maf clangz đi, yămx ninyh đao ah ton jau cox 300 gâyf.