¹ Zâu Yê-su năngx nongc woac pây nzaox songx munh. ² Nănh coong, “Tênb-toongh Côkz six pây năngđ ah tauh Hungh, bênc coonx hynh phunz nănh nyăngz toonz. ³ Bênc hynh săngh nzuf woax zanyf, nănh songđ êu nyăngz pâuz ninyh banh zeb munh taih, six zeb munh max canx taih. ⁴ Hungh stix nzăngđ paiđ pitc đomc pâuz ninyh bux zeb munh coong, “ngoongh câu lub, cloon ngoongh jeenz cunc buz tayx ayx a bênc hynh săngh dloih nzuf nzof gôh, tinyh đoih ninyh nhlync coonx hynh năngv gôh. ⁵ Six êu nzuf woax đomc zeb munh ayx năngđ max quenđ tauv nănh stiz nâyx, ah phanx ninyh ayx njăngx, ah phanx ninyh ayx stanyb âyx. ⁶ Pitc đomc năngx ayx peo ănz Hungh stix paiđ ninyh nyăngz pâuz. Ah phanx nănh stiz tayx quanyf.” ⁷ Hungh stix siv nhleenx songđ paiđ pengz ninyh mêtc nzuf nănh stiz woax đomc tayx munh nyăngz munh, mêtc njynh nănh stiz nyăngz stengv nzuf.” ⁸ Quaix đangz Hungh stix năngx bux nănh nyăngz pâuz, yaz nyăngz coonx hynh bênc săngh nzuf nzof gôh, banh đangc woax đomc zeb munh max payh tuz taih. ⁹ Six nâyx zanyf nyâuh ninyh woa săpc tâyc jau zav, mangc phătc sax lanh bix êu taih nzac hynh năngx nzuf. ¹⁰ Woax đomc pâuz songđ jămc jau ninyh phătc sax lanh, max cun munh gongx mah six munh huđ êu taih nzuf, nzăngđ tuz munh pong hynh nzuf.” ¹¹ Hungh stix nzac ninyh tex mangc phătc naih ah lanh, nănh max zoongz stynb ninyh nzac coonx hynh. ¹² Hungh stiz songđ naic nănh coong, “pyeoz lex! Săngh laix mâyh bix max zoongz stynb taih coonx hynh nâyx yeh? Woax tauh munh stingđ njâuh max nyaoc. ¹³ Hungh stix songđ êu nănh nyăngz pâuz, zoz nănh stayb puf staux, nzâyz ninyh quanyf ănz woa cungh ngwoaic njih nzămc jêmh, phunz nănh yămz woa pungx stingb haoh yâuc zuc tăpc nyah tanyđ.” ¹⁴ Banh taih nyăngz munh six đungx, six sên taih nyăngz munh tuz stoc.” ¹⁵ Naih ah đomc Pha-li-si munh ta zux ix jaf Zâu Yê-su phunz nănh coong saih. ¹⁶ Songđ paiđ nănh stiz nyăngz stâyb sây buz cloon Lêpc Hê-lôtv Hungh woax jau munh ninyh lov Zâu Yê-su naic coong, “Stênx stengb lex! Buz pâyz tuz mâyh nyâuđ zac, Tênb-Hungh nyăngz jau mâyh yâuc nzaox tuz seenz. Nzof mâyh yâuc max mangc laiv tauh nyăngz mynb mâyc, max cun ayx lub mah six ayx jeenz. ¹⁷ Ha jođ mâyh bux buz jađ, mâyh nyâyh ayx laix, buz seetb sôiv phunz Sê-sa Hungh toix gâyf max?” ¹⁸ Zâu Yê-su pâyz tuz nănh stiz ta zux ix huđ nzongf songđ bux coong, “nyâuh lâyc đomc pâyh zac nyâuđ ngokx nyăngz munh lex! Săngh laix nyâuh bix taih stâyv yaz?” ¹⁹ Zoz ah lepz sôiv nyanh taih phunz yaz tex mangc jađ geh! Nănh stiz songđ zoz ah lepz Đơ-ni-ê nyanh taih phunz nănh. ²⁰ Zâu Yê-su naic, ha nây six toix laiv tauh nyăngz hanyh cloon laiv tauh nyăngz bux weh?” ²¹ Nănh stiz tauz, Sê-sa nyăngz, Zâu Yê-su coong, “toix laiv hungđ Sê-sa nyăngz six zuc phunz Sê-sa, laiv hungđ Tênb-Hungh nyăngz six zuc phunz Tênb-Hungh.” ²² Nănh stiz numđ nâyx đomc woac seenz numđ njingc nzongf, songđ taux woa tyuv gâyh Zâu Yê-su. ²³ Lauf toongx woax noib, naih đomc Sa-đu-si munh taih naic Zâu Yê-su, six Sa-đu-si munh max zeen coong munh tayc bix năngx hayh tuz săngh phunb stengb taih.” ²⁴ Nănh stiz naic coong, “Stênx stengb lex! Mô-sê nzaox coong, “naih ah lanh munh toonz, six nănh max zengx naih sây nănh tayc blătc nzof, nănh nyăngz yâuf zoz nyamz qua nongc ayx au, phunz nănh naih sây, stunx nongc ayx tah nyăngz sây, nongc stipx tah nyăngz six miuh. ²⁵ Buz nây naih đomc nhlic lanh yâuf pez, tah coonz zoongz pyau max zengx naih sây six nănh tayc blătc nzof. Nănh nyăngz yâuf songđ zoz nyamz qua. ²⁶ Yâuf lauđ nyâyc yâuf lauđ stamz, năngx muf tauv nzuf byăng woax tauh yâuf đany, yeetx stong tinyh đoih nongc nyamz qua ayx au nzêux nzuf, max zengx naih sây, nănh stiz tinyh đoih tayc nzuf.” ²⁷ Quaix đangz woax tauh munh nzif zâyf lauf tayc nzof. ²⁸ Năngđ naz munh tayc blătc tauv năngx săngh phunb stengb taih woax noib, woax tauh munh nzif six săngh toix laiv tauh nyăngz au? Songđ wâyc nănh stiz tinyh đoih nongc nănh nzêux nzuf nzof. ²⁹ Nyâuh longđ nzuf nzof gôh, songđ wâyc nyâuh max pâyz tuz Canyx-stâub yâuc max pâyz tuz Tênb-Hungh nyăngz lanyf. ³⁰ Tayc ninyh nyăngz munh tauv săngh phunb stengb taih woax zanyf, six cayx năngđ yămz Tênb-toongh nyăngz Stynz-munh max zoz au max zoz langh. ³¹ Coong tauv munh tayc năngx săngh phunb stengb taih nyăngz jau, nyâuh max zengx tuz toc quaix Tênb-Hungh nyăngz woac mah?” ³² Zâu Tênb-Hungh coong, “yaz six Apc-la-ham, cloon I-sakv nyăngz Tênb-Hungh, yaz six munh săngh nyăngz Tênb-Hungh, yaz max zâyf munh tayc nyăngz Tênb-Hungh. ³³ Songx munh numđ Zâu Yê-su nzaox coong naz, nănh stiz seenz numđ njingc nzongf.” ³⁴ Pha-li-si munh numđ lănv coong Zâu Yê-su ayx bây Sa-đu-si munh max naih woac tauz, nănh stiz songđ tinyh đoih taih căpx dlonf nzomf woa.” ³⁵ Nănh stiz nyăngz gwoanc naih ah tauh nzaox gâyf stênx stengb oix lov jau jaf Zâu Yê-su coong woac longđ. ³⁶ Songđ naic coong, “stênx stengb lex! Yeetx stong đoouc liv Gâyf six toix laiv tyuh nongc năngx seen quaix? ³⁷ Zâu Yê-su tauz coong, “six zuc nzuf stymz nzuf nyâuđ, nongc nzuf tongb manyh, nongc nzuf mengc hoonh, nongc nzuf zux ix, stăngz mâyh nyăngz Zâu Tênb-Hungh.’ ³⁸ Nây six nongc seen quaix, yâuc năngx lub quaix nyăngz gâyf gôh.’ ³⁹ Tah nyâyc tyuh lauf năngđ ha, six zuc stăngz munh cănh năngđ stăngz pănh nyăngz stynb nâyx.” ⁴⁰ Mô-sê nyăngz gâyf cloon woax đomc tâuc woac munh nzaox nyăngz gâyf, six nongc nây iz tyuh gâyf ayx coonz tay.” ⁴¹ Pha-li-si munh năngx nzomf woa woax zanyf, Zâu Yê-su naic nănh stiz, ⁴² “Ha nyâuh nyâyh ayx laix? Njâuv Zâu six săngh toix laiv tauh nyăngz sây stunz? Nănh stiz tauz, “ Njâuv Zâu six Đa-vitv Hungh nyăngz sây stunz.” ⁴³ Nănh năngx naic coong, “ha săngh laix Singx-lingh phunz Đa-vitv Hungh hipđ Njâuv Zâu ayx Zâu? Đa-vitv Hungh coong, ⁴⁴ “Zâu coong bux yaz nyăngz Zâu, mâyh stâyv yaz nyăngz byaoh phanx, zu tauv yaz phunz mâyh nyăngz yônz-zaz nzac mâyh nyăngz staux đi.” ⁴⁵ Đa-vitv Hungh cănh hipđ nănh ayx Zâu, ha Njâuv Zâu ayx laix săngh Đa-vitv Hungh nyăngz sây stunz?” ⁴⁶ Max naih mănv hayh tauz, tăng woax noib staox ninyh max naih mănv nzađ naic nănh laiv hungđ.”