¹ Zâu Yê-su cloon nănh nyăngz stâyb sây buz ninyh cayx tauv Yê-lu-sa-lem stengv, Yămz Ô-li-ve zoongz, Bêtv-pha-ri njăngv, Nănh paiđ nănh nyăngz iz lanh stâyb sây buz ninyh đangc. ² Yâuc bux nănh stiz coong, “nyâuh ninyh nzac lâyc cah đangc woax tyuh njăngv, nzac njăngv ninyh woax zanyf, nyâuh phătc ah tauh Maf-lih nyâyf, cloon ah tauh maf-lih jeenz pang ănz woa, nyâuh bix zay zoz jinđ lauf nây phunz yaz. ³ Năngđ naih laiv lanh coong toix laiv lungđ, nyâuh bix bux Coong, “Zâu sămv zuc nongc, nănh stiz songđ phunz nyâuh jinb lauf. ⁴ Nâyx đomc dlayc setb taih wâyc phunz toix nzuf tâuf woac munh coong nyăngz woac. ⁵ Yâuc six zuc bux Si-ôn stengv nyăngz munh coong, “mangc geh! Nyâuh Hungh taih tauv nyâuh nây nzof gôh wev! Nănh nyâuđ dliênc nzongf, nănh zâyh maf-lih janx taih. ⁶ Woa iz lanh stâyb sây buz âyz Zâu Yê-su nyăngz woac seetb ninyh ayx. ⁷ Nănh stiz jinb maf-lih nyâyf cloon maf-lih jeenz lauf, yâuc zoz nănh stiz nyăngz gwuyz lub timc maf-lih cah tănf phunz Zâu Yê-su zâyh ninyh. ⁸ Naih munh đungx nongc nănh stiz nyăngz gwuyz lub timc jau, naih ah phanx nongc njăngx tunb pâub jau đămc. ⁹ Ninyh đangc cloon yămz đangz nyăngz munh tinyh đoih hamv coong, “Hô-sa-na, tanv yămz njangb Quaix woax tauh Đa-vitv Hungh nyăngz sây stunz. Jođ sađ pôz phunz tingz Zâu nyăngz bux taih woax tauh, Hô-sa-na, tanv yămz njangb quaix nyăngz tync woax tauh Tênb-Hungh. ( nzungz-đăngb 118:26-) ¹⁰ Zâu Yê-su nzac Yê-lu-sa-lem stengv woax zanyf, njynh săngh nomz stâyz phangz munh nyâuđ lunc nzuf, songđ lanh naic lanh coong, “lâyc tauh ya munh six mănv nâyv? ¹¹ Songx munh tauz coong, “nây six Ga-li-lê munh Na-sa-letv muôngf nyăngz tâuc woac munh Zâu Yê-su. ¹² Zâu Yê-su nzac Canyx bongc Zâu Tênb-Hungh nyăngz pyau ninyh, luiđ nzuf yeetx stong maif maic nyăngz munh, nănh lokx njynh wănc nyanh nyăngz đaih mâyf, yâuc planc njynh cloon maic noc copz nyăngz tăngx ¹³ Nănh bux nănh stiz coong, “yaz nyăngz pyau munh oix hipđ ayx jođ pôz nyăngz pyau, six nyâuh nongc ayx stac munh mem nyăngz cotb. ¹⁴ Mâyc buđ munh cloon staox quac nyăngz munh taih lov Zâu Yê-su, nănh zany tuz gongx nzuf nănh stiz nyăngz gumc. ¹⁵ Six stayb munh pyây cloon nzaox gâyf stênx stengb phătc Zâu Yê-su ayx nâyx đomc jix-caox njingc nyăngz dlayc, yâuc numđ munh Yămz congx Zâu Tênb-Hungh nyăngz pyau hamv coong, “Hô-sa-na, tanv Đa-vitv Hungh nyăngz sây stunz. Nănh stiz seenz numđ siv nhleenx nzongf. ¹⁶ Nănh stiz naic nănh coong, “stênx stengb max numđ lâyc đomc munh sây coong lungđ mah? Zâu Yê-su tauz coong, “numđ lec! Nyâuh max zengx tuz hođ quaix Canyx-stâub mah? Nyâuh phunz munh sây stăm cloon nzăngđ hođ hopb nu nyăngz munh sây tanv tuz clunh nzongf. ¹⁷ Zâu Yê-su songđ gâyh nănh stiz seetb stengv ninyh phâyx Bê-ta-ni njăngv ah munf. ¹⁸ Tah nyâyc noib nănh phunz đangz lauf stengv tauv bah đămx jau yâuc nyâuđ sab. ¹⁹ Mangc phătc woa jau synh naih ah zâyz vănx tauh njăngx, nănh ninyh tex mangc max phătc naih pyâu cungb phătc naih nomh cungv, nănh nuz woax zâyz vănx tauh njăngx coong, “blătc nây stâyv Quâyx mâyh max tuz săngh pyâu nzof gôh, woax zâyz vănx tauh njăngx lênh dlih caođ. ²⁰ Stâyb sây buz phătc njingc nzongf songđ naic nănh Coong, “ha săngh laix lâyc zâyz vănx tauh njăngx bix caođ tuz căn nâyx yeh? ²¹ Zâu Yê-su tauz, “yaz coong seenz bux nyâuh, nyâuh năngđ zeen max blungh plănb têx, nyâuh lauf hayh ayx tuz cayx năngđ yaz ayx phunz lâyc zâyz vănx tauh njăngx nâyx, nyâuh năngx hayh êu zoongz zâyc stuic nzac coiđ ninyh, zoongz zâyc songđ mungv nyâuh nyăngz woac gôh. ²² Six coong nyâuh năngđ zeen têx, nyâuh clo Zâu jođ laiv hungđ songđ tuz. ²³ Zâu Yê-su nzac layf paix pyau ninyh nzaox munh woax zanyf, stayb munh pyây cloon pec stingx nyăngz munh côx taih naic nănh coong, “mâyh naih nhleenz tâuv gâyf ayx lâyc đomc dlayc nâyx yeh? Mănv phunz lâyc đomc gâyf mâyh yeh?” ²⁴ Zâu Yê-su tauz, ha yaz lauf naic nyâuh ah zâux đangc, nyâuh năngđ lănv bux yaz têx, yaz nzăngđ lănv bux nyâuh, coong yaz naih toix laiv hungđ gâyf ayx nâyx đomc dlayc. ²⁵ Ha six toix mănv phunz Giăng naih lanyf stăngc munh ayx quaix womz nyăngz gâyf? Tăng Tênb-Hungh phunz mah six tăng bamh munh phunz taih? Nănh stiz songđ sangv gwoangh coong, “ha pănh cayx tauz coong ayx laix? Pănh năngđ coong, “tăng Tênb-Hungh phunz taih, nănh yâuc hayh tauz coong, “ha săngh laix nyâuh yâuc max zeen Giăng? ²⁶ Nzof pănh năngđ tauz coong bamh munh phunz taih gôh yâuc cumh nzav songx munh max pâyz nănh stiz cayx ayx laix ănz pănh, wâyc zuc songx munh stunx Giăng six săngh ah tauh tâuc woac munh.” ²⁷ Nănh stiz tauz Zâu Yê-su coong, “buz max pâyz đêh, Nănh bux coong, “ha yaz lauf max lănv bux phunz nyâuh pâyz toix laiv tauh phunz yaz naih gâyf ayx nâyx đomc dlayc đêh. ²⁸ Nyâuh nyâyh ayx laix yeh? Naih ah lanh munh naih iz lanh toonz, naih ah noib nănh ninyh bux toonz lub coong, “sây lex! Nâyx noib mâyh ninyh woa tungh côh lauđ winb ayx cumh pâuz bef! ²⁹ Toonz lub tauz coong, “yaz max oix ninyh đêh, six blătc Quaix đangz nănh năngx coi nyâuđ ninyh ayx cumh pâuz. ³⁰ Woax tauh Pha năngx ninyh bux woax tauh toonz jeenz coong, “sây lex! Nâyx noib mâyh ninyh ayx cumh pâuz bef! Toonz jeenz tauz, êuh, six Quaix đangz nănh max ninyh. ³¹ Nây iz lanh toonz toix laiv tauh âyz Pha nyăngz woac ayx loz? Nănh stiz tauz, toonz lub, Zâu Yê-su bux nănh stiz coong, “yaz coong seenz bux nyâuh, sâub sôiv nyăngz munh cloon maic phăngh ayx pongz lauh nyăngz munh nzif tuz nzac Tênb-toongh Côkz năngx đangc têx nyâuh. ³² Wâyc zuc Giăng taih nuz phunz nyâuh pâyz tuz pengh stymz nyăngz jau, six nyâuh lauf max coi nyâuđ mungv nănh, six sâub sôiv nyăngz munh, cloon ayx pongz lauh maic phăngh nyăngz munh nzif coi nyâuđ zeen nănh, six nyâuh phătc nzuf nâyx đomc dlayc, six wâyc zuc Quaix đangz nyâuh lauf max zeen nănh.” ³³ Ha nyâuh năngx mungv pitc tyuh woac pây timb bef! Naih ah lanh munh nănh songx ah nomz đah winb tungh côh pyâu, nănh wâyh bah stab, yâuc pêtz ah nomz cotb, nongc nzapc tungh cuđ pyâu toongh, năngx zengx ah nomz coouz lauh nongc phunz jămđ lauđ munh yămz woa jămđ, ayx tuz nănh câux munh ninyh jămđ, songđ seetb jau quaix pitc đoif ninyh côz côz ha. ³⁴ Tauv pyâu suc nyăngz săngx huđ, nănh paix pâuz ninyh pongh jămđ lauđ wynb nyăngz munh zoz nănh nyăngz pyâu. ³⁵ Woax đomc jămđ lauđ wynb nyăngz munh zăpc zoz woax tauh pâuz taih bopc, naih ah phanx nănh stiz tayx, ah phanx nănh stiz bopc, ah phanx nănh stiz zoz njauz pyây ôx tayc. ³⁶ Lauđ wynb Zâu zâyf paiđ pitc peob pâuz ninyh năngx đungx têx cah đangc woax hâyđ, six woax đomc jămđ pyâu nyăngz munh lauf ayx peo ănz woa đomc pâuz năngđ ninyh đangc woax đomc pâuz nâyx. ³⁷ Nzuf woax hâyc lauđ wynb Zâu nyâyh coong, “naih dlih jămđ pyâu nyăngz munh hayh nyangc yaz nyăngz toonz lêc đêh. ³⁸ Six woax đomc jămđ lauđ wynb nyăngz munh jenx phătc Zâu nyăngz toonz, nănh stiz coonx lanh bux lanh coong, “yac lâyc tauh ya six Zâu nyăngz toonz, taih pănh tayx nănh quanyf, nâyx đomc tax hungđ six săngh pănh nyăngz nzuf. ³⁹ Nănh stiz zăpc zoz woax tauh toonz, đănx seetb lauđ wynb cungh ngwoaih ninyh tayx quanyf ayx quengx. ⁴⁰ Năngđ naz lauđ wynb Zâu lauf tauv nănh six ayx phunz woax đomc jămđ lauđ wynb nyăngz munh? ⁴¹ Nănh stiz tauz, naih dlih Zâu six ninyh mêtc nzuf woax đomc munh huđ munh, bix jaoz woax nomz lauđ wynb phunz pitc đomc munh cun nănh nyăngz pyâu. ⁴² Zâu Yê-su naic nănh stiz coong, “nyâuh max zengx tuz hođ Quaix nâyx đomc Canyx-stâub mah? Ayx pyau stangc nyăngz munh nzêmh woax nomz njauz pyây zoz seetb taih nongc ănz woa pyau joongz six năngx gongx têx, nây six Zâu ayx nyăngz dlayc, âyz bamh munh mangc seenz phătc njingc nzongf.” ⁴³ Yaz coong seenz bux nyâuh, Zâu Tênb-Hungh max phunz nyâuh yămz nănh nyăngz Côkz, six cungb bây ayx hopđ nănh nyăngz nyâuđ woax đomc munh nzăngđ tuz yămz.” ⁴⁴ Toix laiv lanh jomf zuc woax nomz njauz pyây six zuc lunc nzuf, laiv lanh bây zuc woax nomz pyây bopb zuc six zuc yungc pênx văn nzuf. ⁴⁵ Stayb munh pyây cloon Pha-li-si munh numđ Zâu Yê-su coong nâyx đomc woac, plaz zuc nănh stiz. ⁴⁶ Nănh stiz cayx ta zăpc zoz nănh, six nănh stiz cumh nzav songx munh, wâyc zuc songx munh mangc nănh six săngh ah tauh tâuc woac munh.”