¹ Nâyx zanyf, Yaz oix lănv tauv đangc dlih, nyâuh Yâuf-pez ja jeenx naic nyăngz jau, Munh toonz max cloon munh nzif phâyx six năngx gongx têx! ² Six wâyc zuc naih pongz lauh nyăngz jau đungx, Munh baox yâuc zuc zoz au, nzof munh sab yâuc zuc zoz langh.” ³ Max tuz lanh zaiđ lanh, Pux-tayb yâuc zuc lanh Nênf lanh.” ⁴ Langh yâuc max naih gâyf cun tuz nănh nyăngz Stynb, au yâuc max naih gâyf cun tuz nănh nyăngz Stynb, iz pux stayb njynh max naih gâyf cun tuz phănc stynb.” ⁵ Max cuyb lanh vanh lanh max songc zâuv phâyx, iz pux tayb six zuc sangv Gwoangh njif max songc tync phâyx ah đapc thơih gian, Nongc clo-Zâu, Blătc nzuf nâyx đomc săngx huđ, Năngx zuc tinyh songc tync phâyx, Max nongc phunz Sax-tanx naih congv taih jaf nyâuh Yâuf-pez pamf Stoif.” ⁶ Yaz coong năngđ nâyx phunz nyâuh Yâuf-pez njif max songc tync phâyx, nâyx six max zâyf Zâu nyăngz lanyf zăpx nyâuh yâuf pez đêh.” ⁷ Cuyb tuz muif tauh Munh cayx năngđ yaz nâyx, Six coz Munh tuz Tênb-Hungh sađ phunz nyăngz Sâuđ-nyâyc max tinyh năngđ, ah lanh tuz nâyx hungđ, pitc lanh tuz pitc hungđ.” ⁸ Six nâyx zanyf, Yaz lănv bux max zengx zoongz pyau nyăngz munh, Cloon au qua, Tanz Stynb yămz năngđ yaz nâyx six năngx gongx têx. ⁹ Six coong toix laiv lanh max tanyđ tuz têx, Bix phanv zoongz pyau geh! Zoongz pyau six năngx gongx têx, zoongz pyau nyăngz jau joomz bongh năngđ tâuf pu nyâuđ njaf nâyx.” ¹⁰ Six Yaz năngx naih ah Zâux woac quynb tauv zoong pyau nyăngz Munh, nây six max zâyf yaz nyăngz woac, Nây six Zâu nzaox, au max cuyb gâyh langh.” ¹¹ Six coong au năngđ quengx langh têx, Six max cuyb zoz pitc tauh, Năngx zuc nongc lôx nyăngz langh, Langh yâuc max cuyb quengx au.” ¹² Six yaz năngx quynb tauv pitc đomc Munh, Nây six yaz nyăngz woac, Max zâyf Zâu coong nyăngz woac, Six coong năngđ naih tix tauh Jix-tuz Munh, Nănh nyăngz au max zeen Zâu, Six nănh pungx Stymz cloon au yămz têx, Nănh yâuc max nongc gâyh nănh nyăngz au.” ¹³ Six coong năngđ naih tix tauh zeen Zâu Munh nzif sab, Nănh nyăngz langh max zeen Zâu, Bix nănh pungx stymz cloon langz yămz têx, Nănh lauf max nongc gâyh nănh nyăngz langh.” ¹⁴ Langh max zeen, Six wâyc zuc nănh nyăngz au zeen, Nănh songđ Tuz đaox dlăngc wâyc nănh nyăngz au, au max zeen, Six nănh nyăngz langh zeen, au songđ wâyc Nănh nyăngz langh tuz đaox dlăngc, Six nâyx zanyf nyâuh yâuf pez nyăngz toonz sab tuz dlăngc pênx Zâu nyăngz Munh.” ¹⁵ Six coong woax tauh max zeen Zâu nyăngz Munh, Max cun au mah Pha, oix quengx Nănh nyăngz langh mah six au, Toix pănh zeen Zâu nyăngz Munh, Yâuc max nongc hađ nănh Yămz, nyămh dlongh phunz nănh ninyh, wâyc zuc Tênb-Hungh hipđ pănh ayx pengh oonz yămz nyăngz Munh.” ¹⁶ Nyâuh ayx au nyăngz Munh lex! nyâuh năngđ laix Hayh pâyz tuz pănh hayh Njâuv tuz pănh nyăngz langh? Ayx langh nyăngz Munh lex! nyâuh ayx laix hayh pâyz Njâuv tuz nyâuh nyăngz au?” ¹⁷ Năngđ laix Yâuc pac, âyz Zâu paiđ phunz coz Munh năngđ laix nâyx Yămz, Tênb-Hungh êu coz Munh taih woax zanyf, Coz Munh yâuc zuc năngđ woa nâyx Yămz, Nâyx tyuh six qui takv yaz njăpc phunz huyđ toongh.” ¹⁸ Laiv lanh tuz êu taih zeen woax zanyf, Nănh nyunc ayx quaix catz nyăngz gâyf đangc, Yâuc max nongc pyeenv ayx quaix catz nyăngz gâyf. Laiv tauh max zengx ayx quaix catz nyăngz gâyf, Bix tuz êu taih đangc, Yâuc max zuc năngx ayx nzof gôh. ¹⁹ Hănđ six quaix max quaix lauf max nongc seen bah laiv, Nongc seen quaix six six zuc ayx âyz Tênb-Hungh nyăngz lanyf.” ²⁰ Tênb-Hungh êu taih woax zanyf, Muif lanh munh yămz năngđ laix, Yâuc zuc yămz năngđ woa Nâyx.” ²¹ Laiv tauh ayx nâuh bix tuz Tênb-Hungh êu taih yâuc max nongc stauh, Six coong laiv tauh tuz naih mengc ayx pungx goib nyăngz Munh Phanv ayx gôh.” ²² Laiv lanh năngx ayx nâuh woax zanyf, Bix tuz Zâu êu taih, nănh songđ tuz pênx pungx goib nyăngz Munh, lauf tinyh năngđ, Laiv tauh tuz ayx pungx goib nyăngz Munh, Bix tuz Zâu êu taih, Nănh songđ pênx Njâuv Zâu nyăngz nâuh.” ²³ Nyâuh Yâuf-pez tuz muif hungđ saix nzongf, Songđ max nongc năngx ayx nâuh phunz pitc Tauh.” ²⁴ Yâuf-pez lex, Tênb-Hungh êu nyâuh yâuf pez taih woax zanyf, Coz munh ayx laiv hungđ Munh, Six zuc ayx woax hungđ munh yămz Zâu nyăngz cah đangc.” ²⁵ Nâyx zanyf, Yaz lănv tauv max zengx zoongz pyau nyăngz Munh. Yaz max zengx numđ naih Zâu nyăngz lanyf lănv tauv nâyx đomc dlayc, Nây six cănh yaz nyăngz ix jiênx riêng, Six nyâuh Yâuf-pez năngđ zeen yaz lauf Tuz, wâyc tuz Zâu hâuđ-lênh yaz. Yaz songđ pungx woac bux nyâuh.” ²⁶ Wâyc zuc nâyx yeenv stâyv zâuđ nzongf, Yâuf-pez năngđ nâyx yămz six năngx gongx têx. ²⁷ Six coong nyâuh Yâuf-pez năngđ naih au yâuc max nongc lov jau quengx au, Six laiv tauh năngđ max zengx naih au Yâuc max Nongc Năngx ninyh lov au.” ²⁸ Six Coong nyâuh Yâuf-Pez Năngđ oix zoz au têx, Lauf max pamf laiv lungđ Stoif đêh, nzof munh nzif sab oix nongc langh lauf max zâyf pamf laiv hungđ Stoif six, Zoongz pyau nyăngz Munh six hayh pongh zuc Zâuđ nanc yămz nây stâyv sangc, Yaz songđ oix stăngc nyâuh pyeenv gâyh nâyx đomc zâuđ nanc nyăngz dayc.” ²⁹ Yâuf-pez lex, Yaz oix coong nyăngz âyz gâyf six năngđ nâyx, Nây bamh canz nyăngz săngx huđ max naih đao, Naih au nyăngz munh six zuc yămz năngđ max naih au nâyx.” ³⁰ Haoh nyăngz munh six zuc yămz năngđ max Haoh, Hônb-hiđ nyăngz Munh six zuc yămz năngđ max naih hônb-hiđ. Maic tax’ hungđ nyăngz munh six zuc yămz năngđ max naih lungđ.” ³¹ Nongc bamh canz nyăngz tax’ hungđ woax đomc, Yâuc max nongc phunz woax đomc zoz nzuf săngx huđ, wâyc zuc nây Bamh canz pănh tuz phătc nyăngz six năngx quaix nzuf.” ³² Yaz oix nyâuh Yâuf-pez gâyh quanz Stymz, Max zengx zoongz pyau nyăngz Munh cungb oix ayx hopđ Zâu nyăngz nyâuđ.” ³³ Six zoongz pyau nyăngz munh, Cungb săngx tauv stâyv sangc nyăngz jau, ayx laix hayh ayx tuz hopđ au nyăngz nyâuđ.” ³⁴ woax lanh munh ah dlih songđ zuc ayx iz hungđ cumh Pâuz, Njynh stymz nyâuđ cloon Mengc-hoonh oix ayx hopđ Zâu nyăngz nyâuđ, Yâuc zuc ayx hopđ au nyăngz nyâuđ, Munh nzif naih langh nyăngz munh nănh oix ayx Đăngb zengh phunz Zâu, Yămz stâyv sangc cungb numđ stauh max pâyz ayx laix hayh ayx tuz hopđ phunz nănh nyăngz langh.” ³⁵ Yaz coong năngđ nâyx six wâyc stăngc nyâuh, Max zâyf cangđ nyâuh Yâuf-pez, Yaz oix nongc nyâuh Yâuf-pez yămz tuz hopđ Toix gâyf, Njengx congv phunz Zâu, Max quenb nyâuđ tauv pitc hungđ dlayc.” ³⁶ Six coong năngđ naih laiv lanh munh sab nhlimc nzeetx săngh Pănh, Bix zoz, Nănh năngđ numđ tinyh oix nyăngz tâuf sac hongđ nzongf, Sac nănh stiz oix zoongz pyau, iz lanh nyămh dlongh zoongz pyau lauf max pamf Stoif.” ³⁷ Laiv lanh Năngđ nyâyh coong nănh max cânh zoongz pyau, Nănh songđ tuz dluyh Stymz ayx dlayc, Six coong woax lanh max căpx hôn cloon Nănh nyunc woac nyăngz Munh, woax tauh zâyf ayx năngx toix têx.” ³⁸ Zoongz pyau woax tauh ayx năngx toix têx mah six max zoongz pyau woax tauh ayx năngx toix têx.” ³⁹ Six coong langh năngx yămz sax Stoiz, au yâuc năngx naih zoongz pyau nyăngz jau stayb nănh sax stoiz, Langh năngđ tayc blătc, au oix zoz laiv lanh yâuc tuz, Six tinyh phanv zoz zeen Zâu nyăngz Munh.” ⁴⁰ au max nongc langh six năngx gongb têx, Nây six yaz nyăngz ix Jênx, Yaz nyâyh taih yaz naih Tênb-Hungh nyăngz singx lingh.”