¹ Six coong yămz nyâuh lâyf Yâuf-pez nyăngz mungh tongx naih toix laiv tauh naih tinyh zab nyăngz dlayc, Nănh stiz yâuc tinyh ênz ninyh lov max zeen Tênb-Hungh nyăngz stămđ Stoif-Munh bênc dlayc? Săngh laix yâuc max lov zeen Tênb-Hungh nyăngz munh bênc?” ² Nyâuh Yâuf-pez max pâyz tuz Tênb-Hungh nyăngz pec stigx six zuc stămđ bamh canz mah? Six coong pănh stămđ bamh canz, Nâyx đomc ănz Stêu dlayc, pănh Yâuf-pez bix max Stămđ tuz mah?” ³ Nyâuh Yâuf-pez max pâyz tuz pănh six zuc stămđ Stynz-munh mah? Năngđ naz pănh songđ hayh stămđ tuz yămz nây Stâyv sangc nyăngz Tongh hangh nyăngz dlayc.” ⁴ Six coong nyâuh Yâuf-pez naih tăngx măkx nyăngz dlayc, ha săngh laix nyâuh yâuc max ênz ninyh coouv Huyb-toongh max mangc stam woax đomc stămđ Stoif quanz bênc dlayc? ⁵ Yaz coong năngđ nâyx phunz nyâuh Yâuf-pez nyayz, Zăkv-zeenx nyâuh Yâuf-pez woa six naih munh naih Tongb-manyh hayh pob tuz nâyx đomc dlayc!” ⁶ Six nyâuh naih lanh cooux lanh nyăngz dlayc, Yâuc oix ênz ninyh phunz max zeen nyăngz Munh stăngc pob dlayc? ⁷ Nyâuh Yâuf-pez naih lanh cooux lanh nyăngz dlayc, Songđ phunz nyâuh ayx longđ, Munh ayx peo nyâuh săngh laix yâuc max seetb jab tanyđ? nyunc stâyb six năngx gongx têx, max zâyf mah?” ⁸ Six nyâuh Yâuf-pez ayx bah stamx bah stix lanh jaf lanh, Năngx jaf tauv pitc tauh zeen Zâu Munh.” ⁹ Nyâuh Yâuf-pez max pâyz mah? ayx max zanyx nyăngz Munh six max tuz yămz Tênb-Côkz. ¹⁰ Nongx gâyf bây stymz lub ayx pongz lauh nyăngz Munh jaf nyâuh, Paix miuc hanyh, ayx stac, Coong woac huđ peo munh, hopb tyu bynz, Mauh tax’ hungđ, woax hungđ ya munh, Six max tuz nzac Tênb-toongh Côkz đêh.” ¹¹ Đangc dlih nyâuh Yâuf-pez naih batz lanh ayx nâyx đomc dlayc, Six nâyx zanyf, nyâuh Yâuf-pez coouv Njâuv-Zâu Tênb-Hungh nyăngz singx-lingh tuz đaox dlăngc, nyâuh Yâuf-pez songx tuz cloon Tênb-Hungh hopđ nyâuđ.” ¹² “Naih munh coong, “Yaz naih gâyf ayx tuz muif hungđ dlayc, Six max zâyf muif hungđ săngh nongc, Muif hungđ yaz naih gâyf ayx tuz, Six yaz max phunz toix lungđ ayx yaz nyăngz Zâu.” ¹³ Nhlync hopb six wâyc nyâuđ, nyâuđ six wâyc Nhlync hopb, Six Tênb-Hungh oix mêtc nzuf njynh iz hungđ, Pănh nyăngz stynb stayđ six max zâyf nongc pamf pongz lauh nyăngz jau, Six pănh njâuh phunz Zâu, Zâu songđ njâuh phunz pănh.” ¹⁴ Coouv nănh nyăngz quyênh, Tênb-Hungh ayx phunz Zâu năngx săngh phunz stengb taih, Nănh yâuc năngx ayx phunz pănh tayc blătc nyăngz munh năngx săngh phunb stengb taih.” ¹⁵ Nyâuh Yâuf-pez max pâyz tuz pănh nyăngz Stynb stayđ six Njâuv-Zâu nyăngz Stynb stayđ mah? ha yaz cayx nzâyz Njâuv-Zâu nyăngz Stynb ninyh ayx pênx Maic phăngh nyăngz munh nzif sab mah? max tuz đêh! ¹⁶ Wâyc zuc Canyx-Stâub ja coong, “iz lanh munh six Săngh ah nomz Stynb, “wâyc năngđ nâyx nyâuh Yâuf-pez pâyz tuz Coong, “nyâuh văngf woax tauh Maic phăngh nyăngz munh nzif sab, “Six cloon nănh pênx ah nomz Stynb. ¹⁷ “Six toix laiv tauh cloon Zâu căpx dlonf, woax tauh songđ cloon Zâu songc Stynz hoonh.” ¹⁸ Six zuc pyeenv goib pongz lauh nyăngz Stoif, Munh pamf toix lungđ Stoif, Stoif six yămz bamh Munh nyăngz Stynb stayđ cungh ngwoaic, Six pamf pongz lauh nyăngz Stoif, Songđ hoiđ zuc pănh nyăngz Stynb.” ¹⁹ Nyâuh Yâuf-pez max pâyz Mah? Pănh nyăngz Stynb six congx toongh Singx-lingh nyăngz tync, Yămz nyâuh Yâuf-pez nyâuđ njaf, nyâuh Yâuf-pez tuz Stipx tăng Tênb-Hungh phunz taih nyăngz Singx-lingh, Pănh nyăngz Stynb six max zâyf Săngh pănh nyăngz, Six săngh Tênb-Hungh nyăngz.” ²⁰ Wâyc zuc Tênb-Hungh maif pănh Yâuf-pez Saix nzongf, Pănh songđ zuc nongc pănh nyăngz Stynb bongc phunz Zâu nyăngz manyh yangh tuz Gwăngz-eng.”