¹ Songx yâuf-pez lex, Yaz oix nongc nyâuh yâuf-pez pâyz tuz Singx-Lingh sađ phunz nyăngz sâuđ-nyâyc. ² Nyâuh yâuf-pez pâyz tuz pănh nyăngz lôx Mengc, pănh max zengx zeen Zâu woax zanyf, pănh yâuf-pez zuc đungx hungđ jaf ninyh paix max hayh coong woac nyăngz miuc hanyh. ³ Yaz songđ oix nongc nyâuh yâuf-pez pâyz tuz max naih laiv lanh stipx Tênb-Hungh Singx-singh nyăngz Munh hayh coong, “phunz Zâu Yê-su zuc zaux.” lauf tinyh năngđ, seetb nzuf max nyunc phunz Singx-lingh yeenv nyăngz Munh, max naih laiv lanh hayh coong, “Zâu Yê-su six ayx Zâu. ⁴ Singx-lingh Sađ phunz nyăngz sâuđ-nyâyc naih đungx hungđ max tinyh năngđ, six cungb naih ah tauh Singx-lingh cungđ. ⁵ Naih đungx hungđ zux ix canyx bongc max tinyh năngđ, six cungb canyx bongc ah tauh Zâu cungv. ⁶ Tênb-Hungh ayx cumh pâuz phunz coz Munh max tinyh năngđ, six Tênb-Hungh phunz coz Munh cănh naih coz Munh nyăngz cumh pâuz ayx, six cungb bongc ah tauh Zâu Tênb-Hungh cungv. ⁷ Muif lanh Munh tuz ah hungđ sâuđ nyâyc phunz Singx-lingh yămz nănh nyăngz nyâuđ, wâyc stăngc songx munh tuz lôif. ⁸ Singx-lingh phunz lauh lanh hayh coong Tongb-manyh woac, năngx phunz pitc tauh hayh Coong Tongb-taiv woac. six lauf ah tauh Singx-Lingh Sađ phunz. ⁹ Lauf woax tauh Singx-lingh phunz lauh lanh naih seenz stymz, yâuc phunz pitc tauh naih sâuđ nyâyc zany gumc. ¹⁰ Singx-lingh năngx phunz lauh lanh naih caz năngh hayh ayx jix-caox njingc nyăngz dlayc, năngx phunz pitc lanh hayh coong Stênx-stengb woac, yâuc phunz ah phanx hayh phân biêtc seenz manđ mah six za manđ, six yămz Singx-lingh phunz nâyx tauh hayh coong pitc hungđ woac, năngx phunz lauh lanh hayh phanv woax đomc pitc hungđ woac. ¹¹ Nâyx đomc dlayc six yămz ah tauh Singx-lingh phunz seetb taih, patz phunz muif lanh Munh âyz nănh nyăngz zux ix phunz laiv lanh hayh tuz laiv hungđ sâuđ nyâyc. ¹² Bamh Munh nyăngz stynb stayđ naih sax hungđ căpx dlonf, nzăngđ căpx săngh ah nomz stynb. Njâuv-Zâu lauf năngđ ha. ¹³ Pănh lauf tinyh năngđ, max cun Yiu-thai Munh mah six Hi-lapc Munh, ayx nâuh mah pungx goib Munh, Pănh muif lanh Munh yeetx stong songđ nyunc ayx quaix womz nyăngz Gâyf, pênx ah nomz stynb, Songc ah tauh singx-lingh, songc hopb ah nomz zan. ¹⁴ Stynb max zâyf cungb naih ah hungđ, six naih đungx căpx dlonf. ¹⁵ Six staux coong, “Yaz max zâyf puf, Yaz yâuc max zâyf ayx Stynb nyăngz ah hungđ,” yaz max ayx stynb nyăngz ah hungđ. ¹⁶ Six coong bah nomh yâuc coong, “Yaz max zâyf mâyc, Yaz songđ max zâyf Stynb nyăngz ah hungđ,” wâyc zuc max zâyf bah noomh coong naz bix max pênx Stynb nyăngz ah hungđ. ¹⁷ Six coong săngh nomz stynb bix cungb mâyc cungđ, ayx laix hayh mungv tuz numđ? Six coong cungb ayx bah noomh cungđ ayx laix hayh homv nzaox? ¹⁸ Six âyz Tênb-Hungh nyăngz zux ix phunz stynb sangc ah hungđ cănh naih ah hungđ nyăngz tync yămz. ¹⁹ Six coong Stynb sangc cungb naih ah hungđ cungv ayx laix săngh tuz ah nomz stynb? ²⁰ Six Stynb songđ’ seenz naih đungx hungđ tinyh tox, nzăngđ hayh săngh tuz pênx ah nomz Stynb. ²¹ Wâyc năngđ nâyx mâyc songđ max hayh coong bux puf, “Yaz max cunc mâyh.” pyây yâuc max hayh coong bux staux, Yaz max sămv zuc nongc mâyh.” ²² Six max zâyf năngđ naz, pănh phătc Stynb sangc naih laiv hungđ đoonh, woax hungđ pănh songđ sămv zuc nongc. ²³ Pănh nyâyh taih Stynb sangc jeenz quaix nyăngz phănc pănh năngx zuc nênc, woax hungđ pănh cănh zuc lif năngx gongx têx, yămz pănh max săngh mangc nyăngz tync. ²⁴ Vâyv nyăngz tync pănh max zâuđ zoongz, Six Tênb-Hungh căpx stynb sangc taih, phunz laiv hungđ zuc lif songđ six zuc zaub năngx gongx. ²⁵ Năngđ naz Stynb sangc nyăngz muif hungđ songđ max hopđ zuc tinyh nzêmh, Stynb nyăngz muif hungđ mâyh mungc yaz, Yaz jămđ mâyh. ²⁶ Six coong Stynb sangc nyăngz ah hungđ zuc munz, njynh stynb songđ munz nzuf, Six coong Stynb sangc ah đoif tuz gongx, njynh stynb songđ tuz hươngz. ²⁷ Nyâuh yâuf-pez six Njâuv Zâu nyăngz Stynb, muif lanh Munh songđ săngh Stynb nyăngz ah hungđ phănc. ²⁸ Tênb-Hungh oonz Munh yămz Huyđ-toongh tah yeetx ayx (Cumh Pâuz) tah nyâyc ayx tâuc woac Munh, tah stamz ayx Stênx-Stengb, naih đomc ayx jix-caox njingc nyăngz dlayc, naih đomc naih sâuđ nyâycz zany gumc. Naih ah phanx naih phănc stăngc Munh, naih đomc naih phănc ayx Quanz, yâuc naih phanx hayh coong pitc hungđ woac. ²⁹ Max zâyf muif lanh hayh ayx cumh Pâuz Munh, max zâyf muif lanh hayh ayx nzaox Gâyf Stênx-stengb, max zâyf muif tauh ayx tâuc woac Munh. max zâyf muih lanh hayh ayx jix-caox njingf nyăngz dlayc.” ³⁰ Mah six hayh zany gumc, mah six hayh coong pitc hungđ woac, mah six hayh phanv pitc hungđ woac.” ³¹ Six nyâuh yâuf-pez six zuc joomz nyâuđ lov Saix quaix nyăngz sâuđ nyâyc. Six nâyx zanyf naih ah tyuh jau gongx nzongf yaz oix nuz phunz nyâuh pâyz.