4 ¹ Nâyx đomc dlayc quaix blătc, yaz mangc phătc cah zâyc gungh woa Tênb-toongh Côkz naih ah tungđ jengh coib goib ănz woa, yaz numđ zeetx hâyđ stingb cayx năngđ blungh blex stingb nâyx bux êu yaz coong; "Mâyh staox nây taih yaz oix nuz phunz mâyh mangc đangz noib six naih laiv hungđ seetb taih. ² Lênh dlih tuz Singx lingh canyz tongf yaz, songđ mangc phătc woa Tênb-toongh naih ah nomz Hungh tync, yâuc phătc naih ah tauh stâyv woa sămz tonz đany. ³ Stâyv woa Hungh tync woax tauh cayx năngđ njauz poou zâuz pec nzomz cloon pyaoc pyênz, yâuc naih năngđ côngz cangx quinb woa Hungh tync cah zâyc, woax cuyb côngz cangx six mengz ymz đăngb. ⁴ Woa Hungh tync naih nhlic săpc stâyx nomz tăngx quib woa cah synh nzêux nzuf. cloon nhlic săpc stâyx lanh munh côx zuz gwuyz pec stâyv woa, nănh stiz pyây yâuc đongx sămz banyh tênb mouc stâyv woa Hungh tync, woax đomc nhlic săpc stâyx nomz đah mâyf cah đangc. ⁵ Yămz woa Hungh tync yâuc naih bungh bitc tâuf eng nzăpc-nzăpc têx, yâuc naih bah congz pletz clinyb clinyb têx, woa Hungh tync cah đangc, yâuc naih tâuf tăng Tênb-Hungh woa nhlic nomz mengc hoonh seetb taih sac woa nhlic zây sămz toongz. ⁶ Yămz woa Hungh tync cah đangc mangc phătc naih năngđ ah nomz coiđ womz cayx năngđ munh sây canyx đăngb zengh, yâuc phătc naih pyâyz tauh stengb hauđ, cah đangz cah đangc naih mâyc pong stynb nzuf. ⁷ Zeetx tauh six cayx năngđ njanh zongh, nyâyc tauh cayx năngđ ngoongh wăngh câu, tah stamz tauh mynb cayx năngđ bamh munh, tah stâyx tauh cayx năngđ pungb wăngh đayv. ⁸ Woa pyâyz tauh stengb hauđ, muif tauh naih joz lepz đatz, woa stynb cloon đatz, cungh gwoaic cloon đatz cah njaf yâuc naih mâyc pong nzuf, nănh stiz ayx nzungz hamv quaix noib quaix munf max sec, nănh stiz hamv coong, “Đăngb zengh, đăngb zengh, lemđ quaix nyăngz Zâu Tênb-Hungh, “Six lôx noib yămz, nâyx zanyf yămz, đangz phanx năngx taih woax tauh. ⁹ Laiv zanyf, woa pyâyz tauh stengb hauđ ayx nzungz hâuđ tanv stâyv quâyx săngh tauv banc stâyv banc đaic woax tauh. ¹⁰ Woa nhlic săpc stâyx lanh munh côx songđ quâyc nzac paix, săngh tauv banc stâyv banc đaic woax tauh Hungh, nănh stiz mutx (banyh tênb mouc) tăpx ănz woax tauh Hungh cah đangc, yâuc ayx nzungz tanv coong, ¹¹ “Zâu six buz nyăngz Tênb-Hungh! Mâyh jic tuz buz tanv mâyh, yâuc zanyb mâyh, mâyh six payh tuz stipx lanyf ayx Hungh woax tauh, songđ wâyc mâyh six zâyx muif hungđ seetb woax tauh, zuy njênf âyz mâyh nyăngz zux ix zâyx seetb taih yâuc tuz săngh yămz nây." Naih mănv coib tuz nâyx glonc stâub?