3 ¹ Mâyh zuc ja jeenx bux phunz Satc-đê, Huyđ-đăngb nyăngz Stynz-munh, "Naih Tênb-Hungh nyăngz nhlic nomz mengc hoonh, cloon nhlic nomz stingz tau woax tauh bux coong, “Yaz pâyz mâyh ayx cumh pâuz, mâyh cungb đamz manyh săngh, six mâyh bêf tayc nzof. ² Mâyh zuc sting đyub, nongc jab ayx woax hungđ cumh pâuz max zengx ayx, seenz cayx tayc nzuf gôh, wâyc Zâu Tênb-Hungh mangc phătc mâyh ayx max zengx tuz clunh. ³ Mâyh năngx gâyf nyâuđ cob mâyh tuz numđ munh nzaox quaix mâyh toix laiv hungđ woac, six zuc coi nyâuđ nhlimc stoif, năngđ max đyub têx, yaz six ninyh lov mâyh cayx năngđ stac munh, mâyh yâuc max pâyz laiv zanyf yaz ninyh tauv. ⁴ Six yămz mâyh Satc-đe Huyđ đăngb munh lauf năngx naih batz lanh leđ tuz max phunz nănh stiz nyăngz Gwuyz cah lôh, woax đomc munh songđ tuz zuz gwuyz pec lêpc yaz ninyh, wâyc zuc stiz six jic tuz lêpc yaz. ⁵ Laiv lanh tanyđ tuz hingh six tuz zuz gwuyz pec, yaz yâuc max stotb woax đomc tuz hingh munh nyăngz bux gâyh woa săngh mengc tanz. Nănh stiz songđ tuz yămz yaz nyăngz Pha cloon Stynz-munh cah đangc yâuc nhlimc woax lanh munh six săngh yaz nyăngz munh. ⁶ Laiv lanh naih bah noomh six zuc mungv singx lingh bux phunz Huyđ-đăngb nyăngz woac. Ja jeenx phunz Phi-la-đen-phi huyđ đăngb ⁷ Mâyh zuc ja jeenx zuyz phunz Stynz-munh yămz Phi-la-đen-phi Huyđ-đăngb munh bux stiz coong nâyx; “Nây six ayx đăngb zengh nyăngz seenz gâyf woax tauh bux coong; “Nănh nzauf Đa-vitv Hungh nyăngz ja zâyh, nănh coib yâuc max naih mănv omz tuz, nănh omz yâuc max naih mănv coib tuz goib. ⁸ Yaz pâyz mâyh ayx nyăngz cumh pâuz, mangc geh! Yaz coib ah tungđ jengh ănz lâyc, max naih laiv lanh hayh omz tuz, yaz pâyz tuz mâyh jab six jeenz, six mâyh yâuc mungv âyz yaz nyăngz woac ayx, yâuc max quanyf yaz nyăngz manyh yangh. ⁹ Mangc geh! Naih ah đomc munh limb Sax-tanx, stiz cănh zanyb nănh stiz six ayx Yiu-thai munh, six max zâyf seenz nyăngz, wâyc zuc nănh stiz puv maoh jaf munh, yaz oix ayx phunz nănh stiz quâyc nzac mâyh nyăngz staux synh, yâuc phunz nănh stiz pâyz tuz yaz stăngz mâyh năngđ laix. ¹⁰ Wâyc zuc mâyh ayx âyz yaz nzaox nyăngz woac, yâuc naih stymz tanyđ tuz dlauc wâyb, yâuc max quanyf seenz stymz, tauv nây bamh canz pongh zuc nâyx đomc stâyv nyâuđ dlauc wâyb nyăngz staiz nanc, yaz songđ leđ max phunz mâyh pongh zuc woax đomc staiz nanc. ¹¹ Yaz cayx taih gôh, mâyh năngđ cayb lif năngx gongx mâyh naih nyăngz muif hungđ, nongx gâyf bây laiv lanh taih zab zoz mâyh nyăngz banyh tênb mouc nzâyz ninyh. ¹² Laiv lanh tuz hingh, yaz six oix phunz woax lanh tuz ayx Tênb-Hungh yămz nyăngz gâyf paix toongh nyăngz ah nomz pyau njâuh. Nănh stâyv quâyx max zâuđ seetb gâyf đăngb zengh nyăngz tync, yaz six ja yaz Tênb-Hungh nyăngz bux cloon stingx ănz nănh nyăngz stynb. Yâuc ja Tênb-Hungh woax nomz stengv bux, six tăng Tênb-toongh Côkz nzac taih woax nomz săngb bux (âyz gâyf six săngb Ye-lu-sa-lem côkz), yaz songđ ja yaz nyăngz săngb bux ănz nănh stiz nyăngz stynb. ¹³ Laiv lanh naih bah noomh six zuc mungv năngx gongx Singx lingh coong bux Huyđ-đăngb nyăngz woac. Ja jeenx phunz Lao-đi-sê ¹⁴ Mâyh zuc ja jeenx zuyz phunz Stynz-munh yămz Lao-đi-sê Huyđ-đăngb coong nâyx, “Nây six ayx A-men woax tauh nyăngz woac, Nănh six ayx săngh mengc yâuc ayx zanyx manyf, cloon zâyx muif hungđ taih woax tauh Tênb-Hungh bux coong nâyx, ¹⁵ “Yaz pâyz mâyh ayx cumh pâuz, max joomz yâuc max nămx, tuz mungc mâyh joomz wănh joomz, nămx wănh nămx. ¹⁶ Wâyc zuc mâyh ayx joomz nyutb, max joomz max nămx, yaz songđ cayx nja mâyh seetb yaz nyăngz nzeetx taih. ¹⁷ Mâyh coong mâyh puv quâyx muif hungđ naih dloih nzuf max yêmv lungđ, six mâyh max pâyz tuz mâyh zâuđ zomc zuc dlauc wâyb, seenz numđ hâuđ lênh mâyh zâuđ nanc, yaz numđ munz stymz mâyh mâyc buđ, yâuc blănf stynb yămz. ¹⁸ Yaz songđ bux mâyh, oix zuc maif yaz pu stynx quaix tâuf nyăngz sămz nzâyz lauf nongc ayx puv quâyx, nongc maif gwuyz quav pec zuz, yâuc nongc tăng hayh loi seetb taih numđ nyayz nyăngz tync, yâuc nongc maif mađ lauf hâuh ănz mâyh nyăngz mâyc buđ nzăngđ hayh mangc tuz phătc jau. ¹⁹ Tinyh phanv yaz stăngz woax đomc munh, yaz six mađ yâuc panx nzaox, mâyh six zuc lapz yâuc zuc coi nyâuđ wănc stymz quanyf mâyh ayx nyăngz stoif. ²⁰ Yaz six stâuđ woa cungh gwoaic boz jengh, laiv lanh năngđ numđ yaz nyăngz woac stingb, yâuc coib jengg phunz yaz, yaz six nzac ninyh cloon nănh songc nhlync bah nzămc năngv. yaz yâuc cloon nănh songc yămz. ²¹ Laiv lanh tanyđ tuz hingh yaz songđ phunz woax lanh cloon yaz stâyv woa cah zâyc Hungh tync, năngđ yaz tuz hingh yâuc tuz cloon yaz nyăngz pha, stâyv woa cah zâyc Hungh tync nâyx. ²² Laiv lanh naih bah noomh six zuc mungv Singx lingh bux woac phunz Huyđ-đăngb nyăngz woac. Giăng mangc phătc Tênb-toongh