4 ¹ Naih ah hâyđ Zâu Yê-su yămz Ga-li-lê glangh synh nzaox munh, munh hongđ nzongf! Nănh songđ nzac ah saz đangđ ninyh stâyv woa, songx munh yămz woa wăngx synh. ² Nănh nongc woac pây nzaox stiz đungx hungđ Nănh coong, ³ “Mungv bex, naih ah lanh munh seetb ninyh hav nhlimb, ⁴ Hav woax zanyf, naih ah po nhlimb tuih zuc jau đămc, noc taih ston nhlync nzuf. ⁵ Naih ah po tuih zuc njaoz staiz poz, nib phac nhlimb bêux nyah căn. ⁶ Six bah noib seetb taih phaib, songđ njengh caođ nzuf, wâyc zuc nzac đungh max đôz. ⁷ Naih ah po tuih zuc nzym plungz, nzym lub taih nzymx, max hayh săngh pyâu. ⁸ Naih ah po nhlimb tuih zuc nib gongx, bêux taih săngh tuz nyauh, naih ah đomc stynx tuz stamx săpc, naih ah đomc stynx tuz guc săpc, naih ah đomc stynx tuz ah pez.” ⁹ Nănh năngx coong, “Laiv lanh naih bah noomh six zuc nzaz bah noomh mungv năngx gongx!” Yê-su wâyc săngh laix bix nongc woac pây (Ma-thi 13:10-17; Lu-ca 8:9-10) ¹⁰ Zâu Yê-su cănh ah lanh yămz woax zanyf, yămz woa cah synh woax đomc munh, cloon woa săpc nyâyc lanh stâyv-sây buz taih êu Nănh pob manyf woax đomc woac pây phunz nănh stiz mungv. ¹¹ Zâu Yê-su tauz, Tênb-Hungh nyăngz Côkz woax đomc pinyx nyăngz dlayc, nyâuh tuz pâyz nzuf nzof, six cungh ngwoaic munh, yaz zuc nongc woac pây nzaox nănh stiz. ¹² Ayx ha phunz nănh stiz hănđ mangc yâuc max phătc, hănđ mungv yâuc max saz, six coong nănh stiz năngđ pâyz têx, nănh stiz songđ hayh coi nyâuđ tuz quanyf stoif. Yê-su pob manyf hav nhlimb nyăngz woac (Ma-thi 13:18-23; Lu-ca 8:11-15) ¹³ Zâu Yê-su naic stâyb-sây buz, ha nyâuh lauf max zengx saz woax đomc woac pây mah? Năngđ naz nyâuh ayx laix hayh saz tuz pitc hungđ woac pây? ¹⁴ Hav nhlimb nyăngz munh six hav Tênb-Hungh nyăngz cuđ jeenx. ¹⁵ Ah phanx munh six pây năngđ nhlimb tuih zục jau đămc nâyx, munh numđ cuđ jeenx, six zuc Sax-tanx lênh dlih taih zoz yămz nyâuđ woax đomc cuđ jeenx seetb taih. ¹⁶ Naih ah phanx munh six pây nhlimb tuih zuc njauz poz nâyx, nănh stiz numđ cuđ jeenx, lênh dlih numđ nyađ stipx.” ¹⁷ Nănh stiz nyăngz nyâuđ nzac đungh max đôz zeen max lauh, wâyc cuđ jeenx pongh zuc zâuđ nanc, zuc munh ayx peo, nănh stiz taux woa quengx, ¹⁸ Naih ah phanx munh six pây năngđ nhlimb tuih nzac nzym plungz, nănh stiz mungv cuđ jeenx. ¹⁹ Six wâyc stâyv sangc nyăngz jau queenđ nyâuđ, mauh puv quâyx stynh nyanh, cloon muif hungđ dlayc tăng Tênb-Hungh nyăngz woac, songđ bây max săngh pyâu.” ²⁰ Naih ah phanx munh six pây năngđ nhlimb tuih toix nib gongx, nănh stiz numđ Tênb-Hungh nyăngz woac songđ numđ nyađ stipx, songđ săngh tuz jauh, naih ah po stynx tuz stamx săpc, ah po stynx tuz guc săpc, ah po stynx tuz ah pez.” Pu toongz zoz tongđ zoom (Lu-ca 8:16-18) ²¹ Zâu Yê-su năngx bux nănh stiz coong, “Naih mănv pu tuz toongz sac bix zoz tongđ zoom, mah six nzâyz ninyh zaub ănz woa zâuv đi? Toongz max zâyf tăpx ănz woa nzanc mah?” ²² Max naih lungđ hayh pinyx tuz vâyv max bây plongx yangh. ²³ Toix laiv lanh naih bah noomh, bix nzaz bah noomh mungv năngx gongx.” ²⁴ Nănh năngx nzaox coong, “Nyâuh zuc nongc stymz nyâuđ mungv năngx gongx, nyâuh nongc toix laiv hungđ gaob phunz munh, Zâu Tênb-Hungh lauf nongc woax hungđ gaob clao phunz nyâuh, songđ pâu năngx đungx têx. ²⁵ Songđ wâyc toix laiv lanh naih, six tuz pâu năngx đungx têx, toix laiv lanh max naih, nănh hănđ naih tix hungđ, lauf zuc zoz nzâyz ninyh nzuf.” Nhlimb bêux nyah nyăngz woac pây ²⁶ Nănh năngx coong, “Zâu Tênb-Hungh nyăngz côkz, six pây năngđ ah lanh munh seetb ninyh hav nhlimb ănz nănh woa njăngx njaf nâyx. ²⁷ Nănh phâyx mah six quef, bah noib zax, mah six bah nzămc, nhlimb cănh nzoi nyah bêux seetb taih nănh lôx max pâyz. ²⁸ Nib cănh ayx phunz nhlimb bêux taih, tah yeetx six săngh miuh, tah nyâyc six poongx seetb blauh pyac mâyđ. ²⁹ Tauv blauh wăngh, nănh nzăngđ nzâyz bah tôz ninyh quănf, songđ wâyc tauv săngx huđ sâub zunb nzof.” Njayz jaix nhlimb nyăngz woac pây (Ma-thi 13:31-32, 34; Lu-ca 13:18-19) ³⁰ Nănh năngx coong, “Pănh cayx nongc nhleenz tâuv pây tuz zuc Tênb-Hungh nyăngz côkz loz? ³¹ Zâu Tênb-Hungh nyăngz côkz six năngđ ah nomz njayz jaix nhlimb, songx nzac nib ninyh woax zanyf, nănh six năngx jeenz quaix muif hungđ njayz nhlimb. ³² Six tauv nănh bêux taih, năngx lub quaix muif hungđ njayz. Zav quah lub, Tauv zâuv yămz gungh nyăngz noc năngx taih ayx njaof ănz nănh nyăngz quah mem glomx.” ³³ Zâu Yê-su năngx nongc woac pây nzaox đungx hungđ phunz songx munh mungv, dluyh âyz songx munh mungv saz tuz đungx, mah six stoc.” ³⁴ Max naih laiv hungđ, Zâu Yê-su max nongc woac pây nzaox songx munh, cungb nănh stiz cănh yămz, Nănh nzăngđ phanv nâyx đomc woac pây phunz stâyb-sây buz mungv.” Yê-su zăpx êu nzaox tingc (Ma-thi 8:23-27; Lu-ca 8:22-25) ³⁵ Tauv woax noib gungh cayx nzămc, Zâu Yê-su bux stâyb-sây buz coong, “Pănh clăngv quaix woax nganc wăngx synh ninyh gôh.” ³⁶ Cloon songx munh tinyh gâyh, stâyb-sây buz songđ ênz Nănh ninyh, Nănh stâyv woa đangđ njaf, năngx naih pitc saz đangđ lêpc cloon ninyh. ³⁷ Max laic nyâyh naih tâu bungc nzaox lub, sâyb womz bomf vatb nzac đangđ njaf ninyh đangđ womz cayx pong gôh.” ³⁸ Six Zâu Yê-su yămz woa đangđ tây, pâub tungh nzomx phâyx mâyc njoomh. stâyb-sây buz songđ êu Nănh nyoongz quef yâuc bux coong, “Stâyb -Pha lôix, Pănh cayx zuc tuih womz tayc gôh, Mâyh max numđ stauh waz?” ³⁹ Zâu Yê-su nyoongz quef seetb lanyf, zăpx êu nzaox cloon coiđ womz tingc, “Nănh coong tingc gôh, toongx sangf coiđ womz tingc nzuf, muif hungđ stingf njâuh dekc-têx. ⁴⁰ Zâu Yê-su coong ănz stâyb-sây buz, săngh laix nyâuh bix cumh nzav? Nyâuh lauf max zengx naih njyh zeen mah?” ⁴¹ Stâyb-sây buz numđ cumh nzav songđ lanh naic lanh coong, “Lâyc tauh munh six mănv bix njynh nzaox cloon womz mungv Nănh nyăngz woac nâyv?” Yê-su zany tuz gongx naih manđ nyăngz munh (Ma-thi 8:28-34; Lu-ca 8:26-39)