3 ¹ Năngx naih pitc hâyđ, Zâu Yê-su nzac huyđ toongh ninyh, yămz woa naih ah lanh munh toonz, naih ah saz puf pên quac. ² Yămz woa naih ah đomc munh oix cooux Zâu Yê-su, nănh stiz setx mangc jađ Nănh nongc tingc congz noib zany gumc phunz puf quac munh max zany. ³ Zâu Yê-su bux puf quac munh coong, “Mâyh nyoongz quef taih stâuđ nây jađ. ⁴ Nzof Nănh songđ naic coong, “Tingc congz noib pănh hopđ zuc ayx lungđ? Ayx gongx dlayc, mah six ayx huđ dlayc? Nzâux munh mah six tayx munh? Six nănh stiz max nyaoc. ⁵ Nănh numđ nhleenx songđ wynb mangc stiz, yâuc numđ staoh, songđ wâyc nănh stiz nyâuđ nhlengc nzongf, nănh bux puf quac munh coong, “Stungb mâyh nyăngz puf seetb taih jađ, stungb nănh nyăngz puf seetb taih phătc gongx năngđ nâyx gunf saz. ⁶ Woax đomc Pha-li-si stênx stengb songđ seetb ninyh cloon Hê-lôtv hungh woax đomc munh sangv gwoangh jađ, ayx laix hayh tayx tuz Zâu Yê-su.” Munh đungx ninyh lêpc Zâu Yê-su ⁷ Zâu Yê-su cloon Nănh nyăngz stâyb-sây buz cănh ninyh yămz woa Ga-li-lê coiđ synh, naih munh hongđ nzongf tăng Ga-li-lê stengv taih lêpc Nănh, năngx naih munh đungx tăng Yu-đê stengv tinyh ênz taih woa. ⁸ Ye-lu-sa-lem stengv, Y-đu-mê-a stengv, Jo-đen coiđ tongz phanx, Napv-ta-li stengv, wâyc zuc nănh stiz numđ lănv Zâu Yê-su ayx nyăngz dlayc, songđ tinyh đoih tinyh ênz taih lov Nănh hongđ nzongf. ⁹ Songđ wâyc munh hongđ nzongf, Nănh songđ bux êu stâyb-sây buz buôngh ah saz đangđ jeenz nongc stipx Nănh. Max đanyf munh hayh taih nzapc zuc Nănh. ¹⁰ Wâyc zuc nănh hayh zany tuz munh đungx nyăngz gumc gongx, songđ bây gumc munh muif lanh oix bengx ninyh tauv clatc Nănh. ¹¹ Blaz manđ nyăngz munh, laiv zanyf phătc Zâu Yê-su, six pub nzac Nănh nyăngz cah đangc ninyh hamv coong, “Mâyh six Tênb-Hungh nyăngz Toonz.” ¹² Six Zâu Yê-su zăpx max phunz nănh stiz lănv bux munh, Nănh six mănv.” Yê-su sên săpc nyâyc lanh cumh pâuz munh (Ma-thi 10:1-4; Li-ca 6:12-16) ¹³ Taux woa Zâu Yê-su staox zoongz zâyc ninyh, êu Nănh sên woax đomc munh taih woa, nănh stiz songđ taih dloih woa.” ¹⁴ Nănh njăpc săpc nyâyc lanh taih nongc ayx stâyb-sây cloon Nănh yămz, yâuc êu nănh stiz seetb ninyh lănv cuđ jeenx.” ¹⁵ Nănh yâuc jaoz lanyf phunz nănh stiz hayh luiđ manđ.” ¹⁶ Nănh sên woax đomc săpc nyâyc lanh munh bux six hipđ ayx năngđ nâyx, Si-môn, nănh oonz bux hipđ ayx Phê-rơ. ¹⁷ Gia-cơ, six Sê-bê-đi nyăngz toonz, cloon Gia-cơ, six Giăng nyăngz yâuf, Nănh oonz bux hipđ ayx (Bô-a-netc, âyz gâyf six hipđ ayx bah congz nyăngz Toonz), ¹⁸ Năngx naih Any-đê, Phi-lipv, Ba-tô-lô-miu, Ma-thi, Tô-ma, Any-đê, nyăngz toonz Gia-cơ, Tha-đê, stăngz Côkz woax tauh Si-môn.” ¹⁹ Năngx cloon maic Zâu woax tauh Yu-đa, ikv-sa-ca-li-ôtv. Naih ah đomc munh coong Yê-su blaz manđ (Ma-thi 12:22-32; Lu-ca 11:14-23, 12:20) ²⁰ Zâu Yê-su phunb đangz lauf pyau woax zanyf, naih munh đungx taih nzomf woa hongđ nzongf, Zâu Yê-su cloon stâyb-sây buz njynh max naih săngx huđ nhlync năngv. ²¹ Nănh nyăngz pyau munh numđ lănv nâyx đomc dlayc, songđ coonx ninyh leđ nănh, songđ wâyc numđ munh lănv coong nănh max đăngb. ²² Naih ah đomc nzaox gâyf stênx stengb tăng Ye-lu-sa-lem stengv taih nănh stiz coong, “Nănh zuc Bê-ên-sê-bun manđ ayx, wâyc zuc Nănh nongc manđ hungh nyăngz lanyf luiđ manđ. ²³ Zâu Yê-su songđ êu nănh stiz taih, nongc woac pây coong bux nănh stiz, “Sax-tanx ayx laix hayh luiđ tuz Sax-tanx? ²⁴ Six coong naih ah nomz côkz tinyh phunz tinyh bopc, woax nomz côkz ayx laix hayh yămz tuz wăn? ²⁵ Năngđ coong naih ah siênz pyau munh max songc nyâuđ bix tinyh bopc têx, woax siênz pyau munh six zuc stutc nzuf. ²⁶ Năngđ coong Sax-tanx nyăngz côkz, cănh nzengz Sax-tanx phunz ayx sax đomc, nâyx peob bopc woax peob têx, nănh nyăngz côkz six zuc stutc nzuf gôh. ²⁷ Max naih mănv nzac munh njoongh munh nyăngz pyau zab zoz nănh nyăngz laiv hungđ, bix max zuc stayb nănh quaix đangc. Hopđ zuc stayb nănh quaix đangc, nzăngđ hayh zoz tuz nănh nyăngz jax toongx. ²⁸ Yaz coong seenz bux nyâuh, munh longđ yeetx stong stoif, cloon coong peo muif zâux woac, năngx hayh tuz quanyf stoif. ²⁹ Six laiv lanh coong pamf Singx linyh six max hayh tuz quanyf stoif, nănh songđ cănh zuc stâyv quâyx đamz toongz. ³⁰ Nănh coong năngđ nâyx, six wâyc munh coong Nănh blaz manđ.” Yê-su nyăngz pyau munh (Ma-thi 12:46-50; Lu-ca 8:19-21) ³¹ Zâu Yê-su nyăngz nzif, cloon Nănh woax đomc yâuf ninyh stâuđ woa pyau cungh ngwoaic, êu munh muf bux nănh. ³² Munh đungx stâyv quib Nănh, songđ naih munh ninyh bux Nănh coong, “Stênx stengb lôix, mâyh nyăngz nzif cloon mâyh nyăngz yâuf taih yămz lâyc pyau cungh ngwoaic lov Mâyh.” ³³ Zâu Yê-su tauz, “Laiv lanh ayx yaz nyăngz nzif cloon yaz nyăngz yâuf pez?” ³⁴ Nănh songđ mangc quaix stâyv Nănh cah synh woax đomc munh ninyh yâuc coong, “Lâyc đomc six yaz nyăngz nzif cloon yaz nyăngz yâuf pez. ³⁵ Toix laiv lanh ayx âyz Tênb-Hungh nyăngz âyx, woax lanh six săngh yaz nyăngz nzif, cloon yaz nyăngz yâuf pez.” Hav nhlimb nyăngz woac pây (Ma-thi 13:1-9; Lu-ca 8:4-8)