12 ¹ Zâu Yê-su quef coonz nongc woac pây coong ănz stiz: "Naih ah lanh munh songx ah totz tungh cuđ pyâu. Nănh yâuc ayx bah stab wâyh nzêux nzuf, woa đah wynb njaf nănh witb ah nomz cotb nongc nzapc (tungh cuđ) pyâu toongh, nănh zâyv ah nomz coouz lauh nongc phunz munh yămz woa zu mangc đah wynb, yâuc câux songx pyâu munh yămz woa jămđ, nzof nănh songđ quaix pitc nomz phâyz phangz ninyh côz. ² Tauv pyâu suc woax dlih, nănh êu ah tauh pâuz ninyh pongh jămđ lauđ wynb munh, zoz nănh nyăngz pyâu. ³ Jămđ đah wynb munh zoz woax tauh pâuz ninyh bopc, songđ luiđ nănh cungb stynb phătb puf lauf. ⁴ Lauđ wynb Zâu zâyf êu pitc tauh pâuz ninyh, jămđ đah wynb munh bopc nâyx tauh pâuz nyăngz pyây, yâuc ayx peo phunz nănh numđ nyayz. ⁵ Lauđ wynb Zâu zâyf năngx êu ah tauh pâuz ninyh tymb woax tauh zuc nănh stiz tayx; năngx naih đungx tauh lauf năngđ naz, ah phanx zuc stiz bopc, ah phanx zuc stiz tayx. ⁶ Lauđ wynb Zâu cungb năngx naih ah tauh toonz stăngz, nzuf woax hâyđ, songđ êu Nănh nyăngz toonz ninyh nănh yâuc nyâyh coong: "Naih dlih stiz lauf năngx nyangc yaz nyăngz toonz!" ⁷ "Six jămđ tungh cuđ pyâu woax đomc munh lanh bux lanh coong: "Stipx nâyx nomz đah wynb Zâu six lâyc tauh gôh, taih pănh tayx nănh quanyf, nzof Nănh nyăngz jax toongx six săngh pănh nyăngz gôh!" ⁸ Stiz songđ zăpc zoz woax tauh toonz tayx tayc, đănx ninyh wătc ănz woa lauđ wynb cungh ngwoaic!" ⁹ Năngđ naz đah wynb Zâu six ayx laix loz? Nănh songđ ninyh tayx woax đomc jămđ tungh cuđ pyâu nyăngz munh nzuf, songđ jaoz woax nomz đah wynb phunz pitc đomc munh cun. ¹⁰ Nyâuh max toc quaix nâyx yămc canyx stâub nyăngz woac mah? 'ayx pyau stangc nzêmh woax noz njauz pyây, zoz seetb taih nongc ănz pyau joongz six năngx gongx têx. ¹¹ Nây six Zâu ayx nyăngz cumh pâuz, âyz pănh nyăngz mâyc mangc six phătc njingc nzongf." ¹² Nănh stiz pâyz Zâu Yê-su coong woax đomc woac pây plaz zuc nănh stiz, songđ cayx ta lov Nănh tayx, six nănh stiz cumh nzav songx munh, songđ dluyh pyenz phunz Nănh ninyh. Munh naic sâub sôiv nyăngz jau (Ma-thi 22:15-22; Lu-ca 20:20-26) ¹³ Quaix đangz, nănh stiz êu Pha-li-si munh cloon stăngc Hê-lôtv woax đomc munh ninyh lov Zâu Yê-su, stiz oix jaf phunz Nănh coong woac longđ. ¹⁴ Stiz coong: "Stênx stengb lex, buz pâyz coong Mâyh six nyâuđ zac, max mangc toix laiv tauh nyăngz mynb mâyc, njăngb six hav. Zâu Tênb-hungh nyăngz gâyf Mâyh yâuc nzaox tuz seenz. ha buz seetb sôiv phunz Sê-sa Hungh tuz max loz?" ¹⁵ Buz seetb hođ six max hođ?" Six Zâu Yê-su pâyz tuz stiz nyăngz nyâuđ ayx pâyh zac nyâuđ ngokx, Nănh songđ coong: "Nyâuh săngh laix bix taih coong woac stiv yaz? Zoz ah lepz nyanh taih phunz yaz mangc geh." ¹⁶ Stiz zoz ah lepz nyanh taih phunz Nănh, Nănh songđ naic coong: "Nâyx lepz nyanh naih toix laiv tauh nyăngz hanyh cloon toix laiv tauh nyăngz bux?" Stiz tauz: "Sê-sa nyăngz." ¹⁷ Zâu Yê-su coong ănz stiz: "Năngđ naz, toix laiv hungđ Sê-sa nyăngz six phunz Sê-sa, laiv hungđ Zâu Tênb-Hungh nyăngz six zuc phunz Zâu Tênb-Hungh!" nănh Stiz seenz numđ Zâu Yê-su coong woac njingc nzongf. Munh tayc năngx hayh săngh phunb stengb taih (Ma-thi 22:23-33; Lu-ca 20:27-40) ¹⁸ Naih đomc Sa-đu-sê nyăngz munh coong, munh tayc max hayh săngh phunb stengb taih. ¹⁹ Nănh stiz taih naic Zâu Yê-su coong: "Stênx stengb lex, Mô-se ja nâyx đomc gâyf bux buz: "Năngđ coong naih laiv lanh munh zoz au max zengx naih sây bix tayc, nănh nyăngz yâuf six zuc zoz woax tauh nyamz qua phunz nănh naih sây, stipx tah nyăngz six miuh. ²⁰ Buz woa naih nhlic yâuf pez, tah coonz zoongz pyau max zengx naih sây bix tayc. ²¹ Yâuf lauđ nyâyc zoz nyamz qua, max zengx naih sây nănh lauf tayc. tah stamz tauh yâuf lauf năngđ naz. ²² Woa nhlic lanh yâuf pez max zengx naih sây tinyh đoih yâuc tayc nzuf, woax tauh au lauf tayc. ²³ Năngđ naz, tauv săngh phunz stengb taih woax noib, woax tauh au six săngh mănv nyăngz au? songđ wâyc stiz nhlic lanh tinyh đoih tuz nongc nănh quaix" ²⁴ Zâu Yê-su tauz coong: "Nyâuh longđ nzof gôh, nyâuh six max saz Canyx-stâub mah six yeh, nyâuh max pâyz Zâu Tênb-Hungh nyăngz gâyf mah. ²⁵ Tauv munh tayc săngh phunb sengb woax dlih, six năngđ Tynb-toongh nyăngz Stynz-munh nâyx, max zuc zoz au zoz langh. ²⁶ Coong tauv munh tayc năngx săngh phunb stengb taih, nyâuh max tuz toc quaix Mô-se ja coong, tâuf sac njăngx jeenz plungz woax yămc canyx stâub mah? Zâu Tênb-Hungh coong bux Mô-se: "Yaz six Apv-ra-ham nyăngz Zâu Tên-Hungh, Y-sakv nyăngz Zâu Tênb-Hungh, Ya-côpv nyăngz Zâu Tênb-Hungh. ²⁷ Nănh six munh săngh nyăngz Zâu Tênb-Hungh, max zâyf munh tayc nyăngz Zâu Tênb-Hungh. Nyâuh seenz longđ lub nzongf gôh!" Longc seen quaix nyăngz gâyf (Ma-thi 22:34;40; Lu-ca 10:25-28) ²⁸ Naih ah tauh nzaox gâyf stênx stengb taih tauv numđ stiz tinyh nzengz gâyf, numđ Zâu Yê-su tauz woax đomc munh tuz hođ nzongf, woax tauh munh songđ naic Zâu Yê-su coong: "Yeetx stong đoouc lif gâyf, toix laiv tyuh nongc seen quaix?" ²⁹ Zâu Yê-su tauz: "Nongc seen quaix nyăngz gâyf six năngđ nây: "Y-sa-la-ên munh lex, mungv năngx gongx bex! Pănh nyăngz Zâu Tênb-Hungh, six ah tauh Zâu cungv. ³⁰ Six zuc nongc nzuf stymz nyâuđ, nongc nzuf zux ix, nongc nzuf tongb manyh, nongc nzuf jab stăngz mâyh nyăngz Zâu Tênb-Hungh!" ³¹ Nyâyc tyuh six năngđ nâyx: "Yâuc zuc stăngz munh cayx năngđ cănh stăngz pănh nâyx! Max naih toix laiv tyuh gâyf năngx lub quaix nâyx iz tyuh gôh!" ³² Woax tauh nzaox gâyf stênx stengb tauz coong: "Stênx stengb lex, Mâyh seenz coong tuz hođ nzongf! Zâu Tênb-Hungh seenz năngx lub quaix, seetb blătc Nănh, max naih pitc tauh Zâu. ³³ Munh nongc nzuf nyâuđ, nongc nzuf tongb manyh, nongc nzuf jab stăngz zâu Tênb-Hungh, yâuc stăngz munh cayx năngđ cănh stăngz pănh nâyx, âyz nây iz tyuh gâyf ayx six năngx gongx têx pu congx nyăngz stanyb lanyh." ³⁴ Zâu Yê-su phătc nănh tauz tuz yoiz nzongf, songđ coong: "Mâyh gâyh Zâu Tênb-Hungh nyăngz côkz max côz bah laiv nzof gôh!" Tăng woa taih max naih mănv nzađ naic Nănh toix laiv hungđ. Njâuv Zâu six ayx Đa-vitv nyăngz sây stunz? (Ma-thi 22:41-46; Lu-ca 20:41-44) ³⁵ Yămz congx Zâu Tênb-Hungh nyăngz pyau nzaox munh woax dlih, Zâu Yê-su naic coong: "Săngh laix nzaox gâyf stênx stengb bix coong (Jix-tuz) săngh Đa-vitv hungh nyăngz sây stunz? ³⁶ Singx lingh cănh phunz Đa-vitv coong: "Zâu coong bux yaz nyăngz Zâu: mâyh Stâyv yaz byaox phanx cah synh bex! Zu yaz phunz mâyh nyăngz yônz zaz ănz nzac mâyh nyăngz staux đi ninyh.' ³⁷ Đa-vitv cănh hipđ nănh ayx Zâu, ha nănh ayx laix hayh săngh Đa-vitv nyăngz stunz neh?" woax đomc munh songđ numđ nyađ mungv Nănh nzaox. Zuc buôngh nzaox za gâyf stênx stengb (Ma-thi 23:1-36; Lu-ca 20:45-47) ³⁸ Nănh nzaox stiz coong: "Six zuc buôngh nzaox gâyf stênx stengb, nănh stiz oix zuz gwuyz đao yăngh quaix ninyh quaix lauf, max yâuc ninyh woa caiz sangc njaf oix nongc munh đeh, (zaoh) nănh stiz. ³⁹ Ninyh huyđ toongh nănh stiz yâuc sên tync gongx stâyv, nzac hynh nănh stiz sên stâyv cah zâyc phanx hynh coonz. ⁴⁰ Nănh stiz yauc munh nzif qua nyăngz jax toongx nhlync, yâuc ca đanyc coouv Zâu năngx đao yauc munh. Nâyx đomc munh six zuc tingc stoif năngx niđ têx!" Au qua pungx hođ nyanh (Lu-ca 21:1-4) ⁴¹ Zâu Yê-su stâyv stătx pungx hođ nyanh hoomh mangc munh pungx hođ, naih munh đungx puv quâyx pungx hođ nyanh đungx nzongf. ⁴² Yâuc naih ah tauh munh nzif qua zâuđ zomc taih pungx iz noz tongh stynh, cox ah su nyanh nâyx. ⁴³ Zâu Yê-su êu stâyb-sây buz taih bux stiz coong: "Yaz bux nyâuh, nâyx tauh munh nzif qua nănh pungx hođ nyăngz nyanh năngx đungx têx muif lanh. ⁴⁴ Woax đomc munh naih đungx, nănh stiz cungb pungx ah tikx cah đany lêc, six nâyx tauh munh nzif qua zâuđ nzuf, six nănh nzâyz (njynh poou) mengc nyăngz nyanh taih pungx hođ nzuf." Yê-su coong congx Tênb-Hungh nyăngz pyau zuc mêtc (Ma-thi 24:1-2; Lu-ca 21:5-6)